Talaga Kadi a Maseknan ti Dios Kenka?

MARIKNAM kadi nga adda mangay-ayat kenka? Wenno adda dagiti gundaway a mariknam nga awan ti maseknan kenka? Iti daytoy okupado ken managimbubukodan a lubong, nalaka a patiem a kasla awan kaimudingam wenno awan kaes-eskam. Maitunos iti panangiladawan ti Biblia iti kaaldawantayo, adu ita ti agimbubukodan ken saan a maseknan iti sabsabali.​—2 Timoteo 3:1, 2.

Aniaman ti edad, kultura, lenguahe, wenno puli dagiti tattao, napateg a mangipakitada ken maipakitaanda iti ayat. Sigun iti dadduma a report, ti sistema ti nerbiotayo ket nangruna a nadisenio a makarikna iti ayat ken dungngo. Ni Jehova a Dios, a nangparsua kadatayo, ad-adda a maawatanna ti panagkasapulantayo iti ayat ken panangipateg. Ania ti riknam no impasiguradona kenka a napategka kenkuana? Apresiarem la ketdi dayta. Talaga kadi a masiguradotayo nga interesado ni Jehova kadagiti imperpekto a tattao? Maseknan kadi iti tunggal maysa kadatayo? No kasta, kasano nga agbalin a makaay-ayo kenkuana ti maysa a tao?

Talaga a Maseknan ni Jehova

Agarup 3,000 a tawen ti napalabasen, nagsiddaaw ti salmista a managbuteng iti Dios idi nakitana ti kinangayed ti nabituen a tangatang. Saanna a pinagduaduaan ti nakatantan-ok a kinadayag Daydiay nangparsua kadagiti di mabilang a bituen. Iti panangutobna iti kinanaindaklan ni Jehova ken iti kinanumo ti tao, inyebkas ti salmista ti panagsiddaawna iti naayat a pannakaseknan ni Jehova: “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao tapno sipapanunotka kenkuana, ken ti anak ti naindagaan a tao tapno aywanam?” (Salmo 8:3, 4) Nalaka laeng nga ipapan nga adayo unay wenno okupado unay ti Katan-okan isu a saannan a maasikaso dagiti imperpekto a tattao. Nupay kasta, ammo ti salmista a napateg ti tao iti imatang ti Dios nupay nanumo ken ababa ti biagtayo.

Impanamnama ti sabali pay a salmista: “Ni Jehova makasarak iti ragsak kadagidiay agbuteng kenkuana, kadagidiay agur-uray iti naayat a kinamanangngaasina.” (Salmo 147:11) Makatukay iti rikna ti sasao dagitoy a salmo. Saan a basta maseknan ni Jehova kadagiti tattao, no di ket ‘aywanan’ ken ‘maragragsakan’ pay kadakuada.

 Naipaganetget met daytoy iti maysa a padto iti Biblia a mangiladawan kadagiti mapaspasamak iti kaaldawantayo. Babaen ken mammadto Haggeo, impamatmat ni Jehova a maikasaba iti intero a lubong ti naimbag a damag ti Pagarian ti Dios. Ania ti resultana? Ti maysa ket: “Umayto dagiti matarigagayan a banag dagiti amin a nasion; ket daytoy a balay punnuekto iti dayag.”​—Haggeo 2:7.

Ania dagitoy a “matarigagayan a banag” a naummong manipud kadagiti amin a nasion? Saan la ketdi a material a kinabaknang dagitoy. (Haggeo 2:8) Saan a balitok ken pirak ti mangparagsak iti puso ni Jehova. Maragsakan kadagiti tattao nga agdaydayaw kenkuana gapu iti ayatda, nupay imperpektoda. (Proverbio 27:11) Dagitoy ti “matarigagayan a banag” a mangipadayag kenkuana, ket napateg kenkuana ti napasnek a debosionda ken ti naregta a panagserbida. Maysaka kadi kadakuada?

Kasla di nakappapati a ti Naindaklan a Namarsua ti uniberso ibilangna dagiti imperpekto a tattao kas matarigagayan a banag. Kinaagpaysuanna, daytoy a kinapudno ti mangtignay koma kadatayo a mangawat iti napasnek nga awisna nga umadanitayo kenkuana.​—Isaias 55:6; Santiago 4:8.

“Maysaka a Makaay-ayo Unay”

Ti lakayen a mammadto a ni Daniel naaddaan iti karkarna a kapadasan iti maysa a sardam. Bayat nga agkarkararag ni Daniel, giddato a dimteng ti maysa a natan-ok a sangaili nga agnagan Gabriel. Nagkitada idin ken Daniel ket mabigbigna nga anghel dayta ni Jehova. Inlawlawag ni Gabriel no apay a giddato a nagpakita: “O Daniel, ita rimmuarak tapno pagbalinenka nga addaan pannakatarus buyogen ti pannakaawat . . . agsipud ta maysaka a makaay-ayo unay.”​—Daniel 9:21-23.

Iti sabali pay a gundaway, maysa kadagiti anghel ni Jehova ti nagkuna ken Daniel: “O Daniel, sika a makaay-ayo unay a lalaki.” Sa pinabilegna ni Daniel ket kinunana: “Dika agbuteng, O makaay-ayo unay a lalaki. Maaddaanka koma iti talna.” (Daniel 10:11, 19) Namitlo ngarud a nadeskribir ni Daniel kas “makaay-ayo unay.” Daytoy nga ebkas kaipapananna met ti “maay-ayat unay,” “mararaem unay,” ken “paborito.”

Sigurado a nasinged ni Daniel iti Dios ken ammona la ketdi nga inanamongan ni Jehova ti naimpusuan a panagserbina. Ngem dayta nga ebkas ti dakkel a panagayat ti Dios nga inyallatiw dagiti anghel a mensaherona ket nabileg la ketdi a pammatalged. Di pakasdaawan nga insungbat ni Daniel: “Pinapigsanak.”​—Daniel 10:19.

Ti makaliwliwa a salaysay maipapan iti kinadungngo ni Jehova iti matalek a mammadtona ket nailanad iti Sao ti Dios agpaay a pakagunggonaantayo. (Roma 15:4) Ti panangutob iti ulidan ni  Daniel makatulong kadatayo a mangtarus no ania ti aramiden ti maysa a tao tapno agbalin a makaay-ayo iti naayat a nailangitan nga Amatayo.

Regular nga Adalem ti Sao ti Dios

Napasnek ti panagadal ni Daniel iti Kasuratan. Ammotayo daytoy ta kinunana a mismo: “Siak . . . babaen kadagiti libro nailasinko ti bilang dagiti tawen . . . maipaay iti pannakatungpal dagiti panagwalangwalang ti Jerusalem.” (Daniel 9:2) Karaman kadagiti libro nga adda idi kenkuana ket dagiti naipaltiing a surat da Moises, David, Solomon, Isaias, Jeremias, Ezequiel, ken dadduma pay a mammadto. Mailadawantayo ti kasasaad ni Daniel a napalawlawan iti adu a lukot, nga okupado unay nga agbasbasa ken mangidildilig kadagiti naimpadtuan a sasao a nainaig iti pannakaisubli ti pudno a panagdaydayaw idiay Jerusalem. Bayat nga awan pakasingaanna, nalabit iti siled iti pangatepan ti balayna, awan duadua nga inut-utobna ti kaipapanan dagita a sasao. Ti naganetget a panagadalna ti nangpabileg iti pammatina ken nangpasinged iti relasionna ken Jehova.

Kasta met, natubay ti personalidad ni Daniel ken naapektaran ti intero a kabibiagna gapu iti panagadalna iti Sao ti Dios,. Sigurado a ti pannakaisuro kenkuana ti Kasuratan bayat ti kinaubingna ti nakatulong kenkuana nga agbalin a determinado kas agtutubo a mangtungpal kadagiti alagaden iti Linteg ti Dios mainaig iti taraon. (Daniel 1:8) Idi agangay, situtured nga indeklara ni Daniel ti mensahe ti Dios kadagiti agtuturay ti Babilonia. (Proverbio 29:25; Daniel 4:19-25; 5:22-28) Pagaammo ti kaaduan a nasaet, napudno, ken mapagpiaran ni Daniel. (Daniel 6:4) Kangrunaanna, naan-anay a nagtalek ken Jehova imbes a nakikompromiso tapno laeng maispalna ti biagna. (Proverbio 3:5, 6; Daniel 6:23) Di pakasdaawan a “makaay-ayo unay” ni Daniel iti imatang ti Dios!

Kinapudnona, nalaklaka itan ti panangadaltayo iti Biblia ngem idi panawen ni Daniel. Dagiti dadakkel a lukot ket nagbalinen a nalaka nga ukagen a libro. Adda kadatayo itan ti kompleto a Biblia, a pakairamanan ti naisurat a rekord no kasano a natungpal ti sumagmamano kadagiti padto ni Daniel. Addaantay met iti adu a katulongan iti panagadal ken panagsukimat iti Biblia. a Ar-aramatem kadi a naimbag dagita nga alikamen? Adda kadi regular nga eskediulmo a mangbasa ken mangutob iti Biblia? No kasta ti aramidem, mapatanormonto ti nabileg a pammati ken mapatibkermo ti relasionmo ken Jehova, kas ken Daniel. Ti Sao ti Dios ti agbalinto a mapangnamnamaan a giya iti biagmo, ket dayta ti mangipatalged kenka iti naayat a pannakaseknan ti Dios.

Reggetam ti Agkararag

Managkararag ni Daniel. Umiso dagiti kiniddawna iti Dios. Kas agtutubo, mabalin idi a mapapatay no saanna a maibaga ti kaipapanan ti tagtagainep ni Ari Nabucodonosor ti Babilonia. Sitatalek a nagkiddaw iti suporta ken pannalaknib ni Jehova. (Daniel 2:17, 18) Adu a tawen kalpasanna, sipapakumbaba a binigbig ti matalek a mammadto ti kinaimperpektona ket impudnona ti basolna agraman ti basol dagiti kailianna sa impakaasina ti pammakawan ni Jehova. (Daniel 9:3-6, 20) Idi saan a matarusan ni Daniel ti bambanag a naipaltiing kenkuana, kiniddawna ti tulong ti Dios. Iti naminsan, ti anghel a simmarungkar ken Daniel tapno mangipaay iti kanayonan a pannakaawat, impasiguradona kenkuana a naipangag ti kararagna.​—Daniel 10:12.

Ngem saan laeng a basta immararaw iti Dios ti matalek a ni Daniel. Kuna ti Daniel 6:10: “Mamitlo pay ketdi iti maysa nga aldaw nga . . . agkarkararag ken mangidatdaton iti daydayaw iti sanguanan ti Diosna, kas iti regular nga ar-aramidenna.” Nabigbig ni Daniel nga adu ti rason tapno idaydayaw ken pagyamananna ni Jehova, a kasta ti regular nga inaramidna. Wen, ti panagkararag ket napateg a paset ti panagdaydayawna, a saanna a maisardeng uray agpeggad ti biagna.  Awan duadua a gapu iti daytoy a natibker a pammatina, inay-ayat unay ni Jehova ni Daniel.

Anian a nagsayaat a sagut ti pribilehio a panagkararag! Saanmo koma nga ipalubos a lumabas ti maysa nga aldaw a dika man la nakisarita iti nailangitan nga Amam. Laglagipem a pagyamanan ken idaydayaw ti Dios gapu iti amin a kinaimbag nga ipakpakitana. Ipeksam dagiti pakadanagan ken pakaseknam. Lagipem no kasano a nasungbatan dagiti kiddaw wenno ararawmo, ket agyamanka. Saanmo nga ap-apuraen ti agkararag. No ngarud ipeksatayo ken Jehova ti linaon ti pusotayo babaen ti kararag, mariknatayo a mismo ti ayatna. Gapuna, ‘agreggettayo nga agkararag’!​—Roma 12:12.

Idaydayawmo ti Nagan ni Jehova

Saan nga agpaut ti panaggayyem no managimbubukodan ti maysa. Pudno met dayta iti relasiontayo ken Jehova. Ammo ni Daniel daytoy a banag. Usigem dagitoy a pagarigan ti napalalo a pannakaseknanna iti pannakaidayaw ti nagan ni Jehova.

Idi sinungbatan ti Dios ti kararag ni Daniel babaen ti panangipalgakna iti tagtagainep ni Nabucodonosor ken ti kaipapanan dayta, kinuna ti mammadto: “Bendito koma ti nagan ti Dios manipud tiempo a di nakedngan agingga a mismo iti tiempo a di nakedngan, gapu iti sirib ken kinamannakabalin​—ta kukuana ida.” Kalpasanna, idi impakaammo ni Daniel ti tagtagainep ken ti kayuloganna, maulit-ulit nga imbagana nga imbuksilan dayta ni Jehova, ket impaganetgetna nga Isu laeng ti “Manangipalgak kadagiti palimed.” Kasta met, idi impakaasi ni Daniel ti pammakawan ken pannakaispal, inkararagna: “O Diosko, . . . ti bukodmo a nagan naipanagan iti siudadmo ken iti ilim.”​—Daniel 2:20, 28; 9:19.

Adu ti gundawaytayo a mangtulad ken Daniel no iti panagkararag. Mabalin nga iyebkastayo a maseknantayo iti ‘pannakasantipikar ti nagan’ ti Dios. (Mateo 6:9, 10) Saantayo koma nga ipalubos a maumsi ti nasantuan a nagan ni Jehova gapu iti dakes nga aramidtayo. Imbes ketdi, kanayon koma nga idaydayawtayo ni Jehova babaen ti panangiranudtayo iti maad-adaltayo maipapan iti naimbag a damag ti Pagarianna.

Iti lubong a pagbibiagantayo, pudno a saan a maseknan ken awanan panagayat ti kaaduan a tattao. Nupay kasta, makaliwliwa a maammuantayo a talaga a maseknan ni Jehova iti tunggal agdaydayaw kenkuana. Kas kunaen ti salmista: “Pagragragsakan ni Jehova ti ilina. Palibnosenna dagidiay naemma [babaen] iti pannakaisalakan.”​—Salmo 149:4.

[Footnote]

[Blurb iti panid 21]

Imparangarang ti Dios ti panagayatna ken Daniel babaen ti panangibaonna ken anghel Gabriel a mangparegta iti mammadto

[Blurb iti panid 23]

Gapu iti napinget a panagadal ken panagkararag ni Daniel, natubay ti personalidadna ken inay-ayat unay ti Dios