Inton Umubingen Dagiti Lallakay ken Babbaket
Umadanika iti Dios
Inton Umubingen Dagiti Lallakay ken Babbaket
ASINO ti maragsakan kadagiti epekto ti panaglakay—kas iti nagkuretret a kudil, agkutukot a tumeng, ken nakapuy a panagkita ken panagdengngeg? Mabalin a maisaludsodmo, ‘Apay pay laeng a pinarsuanatayo ti Dios a mangtagiragsak iti kinaagkabannuag, no ipalubosna met la nga agdanagtayo kadagiti epekto ti panaglakay?’ Ngem adda naimbag a damag—saan a panggep ti Dios a lumakaytayo. Imbes ketdi, siaayat a pinanggepna a luk-atannatayo kadagiti epekto ti panaglakay! Panunotem ti sasao a naibaga ken patriarka a Job, a mabasa iti Job 33:24, 25.
Usigem ti situasion ni Job, maysa a nasungdo a lalaki a dungdungnguen ni Jehova. Saan nga ammo ni Job a kinuestionaran ni Satanas ti kinatarnawna, a kinunana a pagserserbianna ti Dios gapu laeng iti agimbubukodan a panggep. Agtalek ni Jehova ken Job ket ammona a kabaelanna nga ikkaten ti epekto ti panangdangran ni Satanas, isu a pinalubosanna a masubok ni Job. Gapuna, ni Satanas “kinabilna ni Job iti naut-ot a busali manipud iti dapan ti sakana agingga iti kuppokuppona.” (Job 2:7) Inigges ti lasag ni Job, ket nagkeggang, ngimmisit, ken nagregreg ti kudilna. (Job 7:5; 30:17, 30) Mailadawam kadi ti tuok a marikriknana? Iti laksid dayta, nagtalinaed a matalek ni Job a kunkunana: “Agingga a mauyos ti biagko saankonto nga ikkaten kaniak ti kinatarnawko!”—Job 27:5.
Ngem adda dakkel a biddut ni Job. Idi ipagarupna a dandanin matay, naseknan unay iti panangitan-okna iti bagina, nga ‘indeklarana a nalinteg ti bukodna a kararua imbes a ti Dios.’ (Job 32:2) Ti pannakangiwat ti Dios a ni Eliu tinubngarna ni Job. Ngem adda met positibo a mensahe ni Eliu ken Job manipud iti Dios: ‘Maispal koma (ni Job) manipud iyuulog iti abut (ti gagangay a tanem)! Nakasarakak iti subbot! Ti lasagna agbalin a nasalsalibukag ngem iti kinaagtutubo; isu agsubli kadagiti aldaw ti kired ti kinaagtutubona.’ (Job 33:24, 25) Naaddaan la ketdi ni Job iti namnama kadagita a sasao. Saanen nga agsagaba agingga a matay. No agbabawi ni Job, maay-ayo ti Dios a mangawat iti subbot agpaay kenkuana ket bang-aranna ni Job manipud iti adu a rigatna. a
Sipapakumbaba nga inawat ni Job dayta a pannubngar, ket nagbabawi. (Job 42:6) Nalawag nga inawat ni Jehova ti subbot nga agpaay ken Job, ket dayta ti nangabbong iti biddutna ken nangiwaya iti pananggunggona ken panangisubli kenkuana ti Dios kadagiti pukawna. “Binendisionan [ni Jehova] ti naud-udi a tungpal ni Job nga ad-adda ngem iti punganayna.” (Job 42:12-17) Anian a bang-ar ni Job idi naimbagan ti nakaar-ariek a sakitna, ken idi immawat iti dadduma pay a bendision, ket arigna a ti lasagna “nasalsalibukag ngem iti kinaagtutubo”!
Ti subbot nga inawat ti Dios agpaay ken Job ket limitado ti pategna ta nagtalinaed nga imperpekto ken natay met laeng idi agangay. Nupay kasta, adda nasaysayaat a subbot para kadatayo. Gapu iti ayat ni Jehova, impaayna ti Anakna a ni Jesus kas subbot agpaay kadatayo. (Mateo 20:28; Juan 3:16) Amin a mamati iti dayta a subbot ket mabalin nga agbiag nga agnanayon iti paraiso a daga. Iti dayta nga asidegen a baro a lubong, saanton a lumakay dagiti tattao a matalek iti Dios. Ngarud paregtaendaka a mangammo no kasano a makitamto ti tiempo inton ti ‘lasag dagiti lallakay ken babbaket ket nasalsalibukag ngem idi agtutuboda.’
Singasing a basaen iti Biblia iti Abril:
[Footnote]
a Ti Hebreo a sao a naaramat ditoy para iti “subbot” ket kaipapananna ti “panangabbong.” Iti kaso ni Job, ti subbot ket mabalin a maysa a daton nga animal, nga awaten ti Dios tapno maabbongan ti biddut ni Job.—Job 1:5.
