Adda Kadi Organisasion ti Dios?

ADDA urnos a makita iti amin a parsua ti Dios. Kas pagarigan, usigem ti pannakaorganisar ti “simple” a selula ti lebadura. Ti kaadu ti pasetna ket gistay kapadpada ti adu a piesa ti dakkel nga eroplano a Boeing 777 . Ngem uray lima laeng a micron a ti diametro ti selula, adda naituding a lugar ti amin a pasetna. Nupay kasta, saan a kas kadagiti eroplano, mabalin nga agpaadu ti kasta a selula. Anian a nakaskasdaaw nga urnos ken pannakaorganisar!​—1 Corinto 14:33.

Saan laeng a kadagiti pisikal a parsua ti pakakitaan iti kasta nga urnos. Ipakita ti Biblia a naan-anay met nga organisado dagiti espiritu a parsua, maitunos iti panggep ti Namarsua. Iti maysa a sirmata, nakita ni mammadto Daniel ti nagadu nga anghel iti nailangitan a trono ti Dios, ket kinunana: “Adda sangaribu a rinibu a nagtultuloy a nagserbi kenkuana, ken sangapulo a ribu a maminsangapulo a ribu a nagtalinaed a sitatakder iti mismo a sanguananna.” (Daniel 7:9, 10) Panunotem laengen no kasano a naorganisar ti nakaad-adu nga anghel​—nasurok a sangagasut a milion​—tapno maitungpalda dagiti bilin ti Dios a pakagunggonaan dagiti adipenna ditoy daga!​—Salmo 91:11.

Ti Namarsua a ni Jehova a Dios ti Kangatuan nga Organisador, ngem saan a nakayakay wenno istrikto unay. Imbes ketdi, isu ket naayat ken naragsak a Dios a maseknan iti pagimbagan ti amin a parsuana. (1 Timoteo 1:11; 1 Pedro 5:7) Nabatad daytoy iti pannakilangenna iti nagkauna a nasion ti Israel ken kadagiti Kristiano idi umuna a siglo.

Kinaorganisado ti Nagkauna nga Israel

Ni Moises ti inaramat ni Jehova a Dios tapno maorganisar dagiti Israelita para iti pudno a panagdayaw. Usigem laengen ti panagkampoda bayat ti temporario a panagnaedda iti let-ang ti Sinai. Sigurado a nagulo ti bambanag no napalubosan ti tunggal pamilia a kumporme ti pagkampuanda. Iti Linteg nga inted ni Jehova babaen ken Moises, naikkan ti tunggal tribu iti espesipiko nga instruksion no sadino ti pagkampuanda. (Numeros 2:1-34) Naglaon met dayta iti espesipiko a pagalagadan iti salun-at ken kinadalus​—kas pagarigan, no pakaibellengan ti ibleng ti tao.​—Deuteronomio 23:12, 13.

Idi simrek dagiti Israelita iti Naikari a Daga, organisadodan a nasion. Nabingbingay ti nasion iti 12 a tribu, ket adda nailatang a daga para iti tunggal tribu. Ti Linteg ni Jehova saklawenna ti tunggal aspeto ti panagbiag ti tao​—panagdayaw, panagasawa, pamilia, edukasion, negosio, taraon, panagtalon, panagtaraken iti animal, ken dadduma pay. b Nupay espesipiko ken detalyado ti dadduma a linteg, ebkas amin dagita ti pannakaseknan ni Jehova iti ilina. Kinaragsak ti imbunga dayta kadakuada. Ti panagtulnog dagiti Israelita kadagita a naayat nga urnos ti namagbalin kadakuada kas naisangsangayan nga ili ni Jehova.​—Salmo 147:19, 20.

Pudno a ni Moises ket nalaing a lider, ngem saan a dayta ti mamagballigi kenkuana. Imbes ketdi, agpannuray dayta iti kinasungdona iti urnos ti Dios. Kas pagarigan, kasano ngata nga inkeddeng ni Moises no sadino ti pagnaanda iti let-ang? Impaay ni Jehova ti munmon nga ulep  a mangigiya kadakuada iti aldaw ken ti munmon nga apuy iti rabii. (Exodo 13:21, 22) Ni Jehova ti mismo a nangorganisar ken nangigiya iti ilina, nupay adda gundaway a nagaramat iti tattao. Kasta met laeng ti inaramidna idi umuna a siglo.

Kinaorganisado Dagiti Immuna a Kristiano

Kas resulta ti naregta a panangasaba dagiti apostol ken adalan, nabuangay dagiti Kristiano a kongregasion iti adu a paset ti Asia ken Europa idi umuna a siglo. Nupay nagduduma ti ayan dagitoy a kongregasion, saanda nga agbukbukod a grupo. Imbes ketdi, organisadoda ken ay-aywanan ida dagiti naayat nga apostol. Kas pagarigan, ni apostol Pablo tinudinganna ni Tito nga agbati idiay Creta “tapno urnose[nna] dagiti amin a masapul a maurnos.” (Tito 1:5, Ti Baro a Naimbag a Damag Biblia) Dinakamat pay ni Pablo iti suratna iti kongregasion ti Corinto nga adda dagiti kakabsat a “nalaing a mangorganisar,” wenno “organisador.” (1 Corinto 12:28, The New Testament in Modern Speech; The Bible in Contemporary Language) Ngem siasino ti makinggapuanan iti kasta nga urnos? Kinuna ni Pablo a “ti Dios binukelna” wenno inorganisarna ti kongregasion.​—1 Corinto 12:24.

Dagiti nadutokan a manangaywan iti kongregasion Kristiano ket saan nga appo dagiti padada a manamati. Imbes ketdi, ‘katrabahuanda’ ida a sumursurot iti panangigiya ti espiritu ti Dios, ken mainanama nga agbalinda a “pagulidanan ti arban.” (2 Corinto 1:24; 1 Pedro 5:2, 3) Ti napagungar a ni Jesu-Kristo ti agserserbi kas “ulo ti kongregasion,” saan a maysa a tao wenno maysa a grupo ti imperpekto a tattao.​—Efeso 5:23.

Idi saanen a makituntunos ti kongregasion ti Corinto kadagiti dadduma a kongregasion, insurat ni Pablo: “Ania? Dakayo aya ti naggapuan ti sao ti Dios, wenno agingga laeng aya kadakayo ti dimmanonanna?” (1 Corinto 14:36) Inaramat ni Pablo daytoy a saludsod tapno aturenna ti pampanunotda ken tapno tulonganna ida a mangtarus a saanda koma nga agtignay nga agbukbukod. Dimmakkel ken rimmang-ay dagiti kongregasion idi sinurotda ti bilin dagiti apostol.​—Aramid 16:4, 5.

Ebkas ti Ayat ti Dios

Iti ngay agdama? Mabalin nga adda dagidiay agkedked a makitimpuyog iti maysa a narelihiosuan nga organisasion. Nupay kasta, ipakita ti Biblia a kanayon nga ar-aramaten ti Dios ti organisasionna a mangitungpal iti panggepna. Agpada nga inorganisarna ti panagdayaw ti nagkauna nga Israel ken ti panagdayaw dagiti immuna a Kristiano.

Saan kadi a nainkalintegan ngarud a kunaen nga idaldalan pay laeng ni Jehova a Dios ti ilina, kas inaramidna iti napalabas? Wen, ti panangorganisar ken panamagkaykaysa ni Jehova kadagiti agdaydayaw kenkuana ket ebkas ti naayat a panangaywanna kadakuada. Iti kaaldawantayo, us-usarenna ti organisasionna tapno maitungpal ti panggepna iti sangatauan. Ania ti pakabigbigan ti organisasionna? Amirisem dagitoy a punto:

▪ Dagiti pudno a Kristiano organisadoda a mangitungpal iti annongenda. (Mateo 24:14; 1 Timoteo 2:3, 4) Binilin ni Jesus dagiti pasurotna nga ikasabada ti naimbag a damag ti Pagarian iti amin a nasion, ket imposible a maaramidanda dayta no awan ti sangalubongan nga organisasion. Kas panangyilustrar, nalaka laeng ti mangpakan iti maysa a tao, ngem no rinibu wenno minilion ti kasapulan a pakanen, nasken nga adda organisado a grupo ti tattao a sangsangkatunos nga agtrabaho. Tapno maitungpal dagiti pudno a Kristiano ti annongenda, agserserbida iti “abagan-abaga,” wenno “agtutunos[da] iti panagserbi” iti Dios. (Sofonias 3:9, Byington) Makapagtrabaho kadi a situtunos ti nadumaduma a nasion, lenguahe, ken puli no awan ti nagkaykaysa nga organisasion? Sigurado a saan.

▪ Dagiti pudno a Kristiano organisadoda a mangsaranay ken mangparegta iti tunggal maysa. No agmaymaysaka nga umuli iti bantay, mapilim no sadino ti kayatmo a pagnaan. Awan met ti kaduam nga asistiram. Ngem no maaksidente wenno marigatanka, agpeggad ti  biagmo ta awan ti tumulong kenka. Talaga a saan a nainsiriban ti panangiputputong iti bagi. (Proverbio 18:1) Iti umasping a pamay-an, masapul nga agtitinnulong ken agsisinnaranay dagiti Kristiano tapno maitungpalda ti bilin ni Jesus. (Mateo 28:19, 20) Iti kongregasion Kristiano, maipapaay kadatayo dagiti agkakapateg a pammilin, panangsanay, ken pammaregta a naibatay iti Biblia tapno makapagtultuloytay amin nga agserbi. Sadino koma ti pakasursuruantayo iti daldalan ni Jehova no awan dagiti naorganisar a Nakristianuan a gimong?​—Hebreo 10:24, 25.

▪ Dagiti pudno a Kristiano organisadoda nga agserbi iti Dios a sangsangkatunos. Bayat nga umim-imdeng dagiti karnero ni Jesus iti timekna, agbalinda a “maymaysa nga arban” iti sidong ti panangidaulona. (Juan 10:16) Saanda a naiwaras iti nagduduma a relihion ken grupo; saan met a nagduduma ti doktrinada. Imbes ketdi, ‘agsasaoda amin a sangsangkatunos.’ (1 Corinto 1:10) Tapno adda panagkaykaysa, masapul nga adda urnos. Tapno adda urnos, nasken nga adda organisasion. Ti laeng nagkaykaysa a panagkakabsat ti bendisionan ti Dios.​—Salmo 133:1, 3.

Gapu iti naimpusuan a panagayat iti Dios ken iti kinapudno a linaon ti Biblia, adu ti naguyugoy a makitimpuyog iti maysa nga organisasion a mangipakpakita kadagiti nadakamat a pakabigbigan. Kas maysa nga organisasion ken nagkaykaysa a grupo, ikagkagumaan dagiti Saksi ni Jehova iti intero a lubong nga aramiden ti pagayatan ti Dios. Naipanamnama kadakuada: “Agtaengakto iti tengngada ken magnaakto iti tengngada, ket siakto ti Diosda, ket isudanto ti ilik.” (2 Corinto 6:16) Mabalin a sagrapem daytoy a nagsayaat a bendision no agdayawka ken Jehova a Dios a kaduam ti organisasionna.

[Footnotes]

[Ladawan iti panid 13]

Organisado ti kampo dagiti Israelita

[Dagiti Ladawan iti panid 14, 15]

Kasapulan ti kinaorganisado tapno maitungpal ti sangalubongan a panangasaba

Panangasaba iti binalaybalay

Saranay kadagiti nadidigra

Panagtataripnong

Panagbangon iti pagtataripnongan