Inarapaapko ti Agbalin a Sirkero

Insalaysay ni Zoya Dimitrova

Natungpal ti arapaapko idi agtawenak iti 15, ket siraragsak nga agbibiahe ken agpabpabuyaak iti sirko. Ngem naaksidenteak idi Setiembre 4, 1970. Madama idi a maipalpallatokak, ngem pagammuan ta nanabtuogak iti daga.

NAYANAKAK idi Disiembre 16, 1952 idiay Sofia, Bulgaria. Kabbalayko idi ti manangko ken dagiti nagannakmi. Komunista idi ti Bulgaria ket mapampanuynoyan ti relihion nupay saan a maiparparegta. Saan a mamati iti Dios ti kaaduan nga umili, ket dagidiay manamati kaykayatda nga ilimed ti pammatida. Nupay akuen ti pamiliak nga Orthodox ti nakaikamenganda, saan a naisuro kaniak ti maipapan iti Dios ken diak pinanunot nga adda Dios.

Ubingak pay idi nagbalinak nga interesado iti amin a kita ti isport nangnangruna ti gymnastics. Idi agtawenak iti 13, adda lalaki nga immay iti eskuelaanmi ket agbirbirok iti babai a masanay nga agbalin a sirkero. Siak ti inrekomenda ti maestrok iti gymnastics. Magagaranak nga aglugan iti naggapu idiay America a kotse ti manedyerko tapno interbiuen ken subokendak ti grupo dagiti parasanay. Naragsakanak ta siak ti napili. Daytoy ti rugi ti nainget ken narigat a panagsanay ken panagensayok a nagpaut iti nasurok a dua a tawen. Nalpas ti panagsanayko idi agtawenakon iti 15, ket nangrugin ti karerak iti sirko. Idi damo, nagpabuyaak iti nadumaduma a paset ti Bulgaria ken kalpasanna kadagiti pagilian ti dati a Soviet Union ken uray idiay Algeria, Hungary, ken iti dati a Yugoslavia.

Tallo a tawen a tinagiragsakko ti karerak. Ngem idi agpabpabuyaak idiay Titov Veles, Macedonia, naaksidenteak iti panagsirkok kas nadakamat itay. Nakakalumbitin a nakabalinsuek ti kaparehak, ket impallatoknak nga agsirsirko iti angin sa allawatennak koma iti panagpababak. Diak nagaw-at dagiti imana, ken nagsat ti tali a naikabit iti bagik isu a natinnagak iti daga iti kangato nga innem a metro. Intaraydak iti ospital, ket naduktalan a natukkol ti takiag, paragpag, ken durik. Nakamuttalengak iti sumagmamano nga aldaw ken awan malagipko iti napasamak. Idi simmayaat bassiten ti kasasaadko, nabigbigko a paralisadoak gayamen manipud siket nga agpababa. Ngem gapu ta ubingak pay, impagarupko a makapagnaakto manen babaen iti therapy wenno operasion ken makasubliak pay ketdi iti sirko.

Iti simmaganad a dua ket kagudua a tawen, napanak iti nadumaduma a sanatorium (klinika a pagpaimbagan), a ninamnamak nga umimbagak. Idi agangay, nasken nga akseptarekon a nagpatinggan ti karerak. Imbes nga agpabpabuyaak iti nadumaduma a lugar, nakatugawak laengen iti wheelchair.

 Rugi ti Baro a Biag

Gapu iti aktibo a biagko idi, impagarupko a diakto maanusan daytoy a panagbalbaliw. Nagsagabaak iti depresion ta impagarupko nga awanen ti namnamak. Kalpasanna, idi 1977, sinarungkarannak ti maysa nga agtutubo a lalaki nga agnagan Stoyan. Pinastrekko ta naammuak a kabsatna gayam ti dati a kaduak iti sirko. Bayat ti panagsaritami, dinamagna no adda pay namnamak nga umimbag ket insungbatko nga awanen gapu ta maup-upayak. Nasakit ti nakemko idi imbagana a ti Dios laengen ti makatulong kaniak, ket kinunak, “No adda Dios, apay ngarud a kastoy ti kasasaadko?”

Iti dayta a panagsaritami ken Stoyan, a nabiit pay a nagbalin a Saksi ni Jehova idi nga agtartrabaho idiay United States kas sirkero, siaanus nga inlawlawagna kaniak dagiti nakaskasdaaw a kari ti Biblia para iti masanguanan. Naragsakanak a makaammo nga asidegen nga agbalin a paraiso ti daga. Natukay ti pusok iti pammatalged nga “awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) Magagaranak unay a maisubli ti sigud a salun-atko! Dagus nga immanamongak a regular a mayadalan iti Biblia, ket dayta ti nangrugian ti baro a biagko. Nasarakak met laengen ti pakaibatayan ti pudno a namnama.

Segseggaak ti linawas a panagadalko iti Biblia. Ni Stoyan ti damo a nangyadal kaniak sa simmaruno ni Totka, maysa a nakasingsingpet a babai a Saksi. Babaen iti tulongna, napartak a rimmang-ay ti pannakaammok iti kinapudno a linaon ti Biblia, ket indedikarko ti biagko ken Jehova a Dios. Awan idi ti taga-Sofia a kualipikado a mangbautisar kaniak, isu nga inurayko ti isasarungkar ti kabsat a taga-Macedonia. Nabautisaranak iti bathtub iti apartmentko idi Setiembre 11, 1978, agarup makatawen sipud panangrugik a makipagadal iti Biblia. Napalaus ti ragsakko iti panagbautisarko kas maysa kadagiti Saksi ni Jehova, ket naaddaanak iti pudpudno a panggep iti biag.

Kasla apuy a gumilgil-ayab iti unegko ti kinapudno a naadalko iti Biblia. Sigagagar nga inranudko ti naammuak a namnama iti tunggal tao nga umay iti pagtaengak. Ngem awan met kadakuada ti mangipangpangag, nalabit impagarupda a naapektaran ti isipko gapu iti pannakaaksidentek.

Nakaro a Biddut

Maparparitan idi dagiti Saksi ni Jehova idiay Bulgaria, ket adda laeng sumagmamano a Saksi iti intero a pagilian. Awan ti matabunuak a gimong ti kongregasion ken manmano a makalangenko dagiti kapammatiak. Diak met impagarup a napeggad ti nasinged a  pannakilangen kadagidiay di mangal-alagad kadagiti prinsipio ti Biblia. Gapuna, nakaaramidak iti nakaro a biddut.

Kanayon a maburibor ti konsiensiak, ken nariknak ti saem ti pannakayadayo ken Jehova a Dios. Nadudog ti pusok ken mabainak ngem sipapasnek nga inkararagko a pakawanennak ni Jehova. Idi agangay, naisubli ti espiritualidadko gapu iti tulong dagiti naayat a Kristiano a panglakayen, ket nagsubli manen ti rag-ok iti panagserbi ken Jehova. Agyamanak unay iti pribilehiok nga agserbi ken Jehova buyogen iti nadalus a konsiensia ken ti pannakitimpuyogko iti nadalus nga organisasionna!

Naragsak Nupay Baldado

Nadadael ti arapaapko gapu iti pannakaaksidentek 40 a tawenen ti napalabas, ket addaak laeng itan iti wheelchair. Ngem awan ti pagbabawyak, a kas ket tay awanen serserbi ti biagko. Natulongannak ti kinapudno iti Biblia a mangbigbig nga awan kaimudingan ti inarapaapko a biag. Nakitak ti nakas-ang a nagbanagan dagiti dati a katrabahuak a nangitultuloy iti karerada iti sirko. Iti sabali a bangir, nasarakak ti kapatgan a gameng​—ti personal a relasionko iti Namarsua, ni Jehova a Dios. Nangyeg daytoy iti dakdakkel a rag-o ngem iti aniaman a maipaay kaniak ti biag kas sirkero.

Kanayonanna, nagrag-oak ti pannakakitak iti adu pay a nakaammo iti kinapudno iti Biblia ken nangidedikar iti biagda iti naayat a Diostayo, ni Jehova. Manmano laeng dagiti Saksi iti Bulgaria idi inrugik ti makipagadal iti Biblia idi 1977. Idi damo a nairehistro dagiti Saksi ni Jehova idi 1991 kalpasan a narpuog ti Komunista a turay, awan pay sangagasut a Saksi iti intero a pagilian. Anian a ragsakko a makakita iti agtultuloy nga iyaadu dagiti agibumbunannag iti Pagarian nga immabuten iti agarup 1,800!

Adu pay laeng ti kasapulan a maaramid iti Bulgaria. Adu a tattao ti agbirbirok iti pannakaammo iti Sao ti Dios, kas ipamatmat ti 3,914 a timmabuno idi 2010 iti Memorial ti ipapatay ni Kristo. Bigbigek a pammaneknek daytoy ti pamendision ni Jehova iti nanumo  a panangrugi ti trabaho idiay Bulgaria. Nakitak a mismo a ti “bassit” nagbalin a “mannakabalin a nasion,” kas naipadto iti Isaias 60:22.

Gubuayan pay ti rag-o ken maysa a pudpudno a tampok ti biagko ti pannakairuar ti Baro a Lubong a Patarus iti Nasantuan a Kasuratan iti lenguahe a Bulgarian idi Agosto 2009 iti “Agtalinaedkayo nga Agbantay!” a Kombension Distrito idiay Sofia. Natungpal met laengen ti arapaapko a pannakairuar daytoy a Biblia iti bukodko a lenguahe! Dakkel la ketdi ti maitulong daytoy tapno ad-adu pay a taga-Bulgaria ti makaammo iti kinapudno iti Biblia.

Nupay limitado ti maaramidak iti pannakaikasaba ti naimbag a damag ti Pagarian ti Dios gapu iti an-annayek, siraragsak nga iranranudko ti kinapudno iti Biblia kadagiti kaarrubak ken siasinoman nga umay iti pagtaengak. Adda naminsan a pinukkawak ti lumablabas a kaarrubak bayat nga addaak iti balkonko. Pinatganna ti awisko a sumrek ket inranudko kenkuana ti sumagmamano a makaparegta a sasao iti Biblia. Dagus nga inawatna ti tukonko a panagadal iti Biblia. Kasta unay ti ragsakko idi nabautisaran kas kabsatko iti pammati. Naaddaanak iti pribilehio a timmulong iti uppat nga indibidual a nangidedikar iti biagda ken Jehova.

Ibilangko a gubuayan ti kadakkelan a rag-o ken pammaregta ti regular nga itatabunok kadagiti Nakristianuan a gimong a kaduak ti nasurok a sangagasut a kakabsat, nga imbilangko a kapamiliak. Marigatanak a tumabuno kadagiti gimong ti kongregasion ta awan ti probision ti gobierno para kadagiti agbiahe a natataengan ken baldado. Ngem apresiarek unay ti naayat a panangasikaso kaniak ti maysa nga agtutubo a lalaki. Kada gimong, bagkatennak manipud iti apartmentko sa ilugannak iti kotsena a mapan idiay Kingdom Hall, sa isublinak met laeng iti pagtaengak. Anian a yamanko ken Jehova ta nagbalinak a paset ti naayat a naespirituan a pamilia!

No lagipek ti napalabas, makunak a naiduma unay ti nagbanagan ti biagko no idilig iti arapaapko idi ubingak. Gapu iti panagserbik ken Jehova, nariknak ti napalaus a ragsak a posible ita ken naaddaanak iti naraniag a namnama iti masanguanan. Napateg kaniak ti kari ti Dios a “kumalay-atto daydiay pilay a kas iti panagkalay-at ti kalakian nga ugsa.” (Isaias 35:6) Segseggaak ti aldaw inton saanakon nga agusar iti wheelchair, inton maisubli ti sigud a salun-atko.

[Blurb iti panid 30]

“Ibilangko a gubuayan ti kadakkelan a rag-o ken pammaregta ti regular nga itatabunok kadagiti Nakristianuan a gimong”

[Blurb iti panid 31]

“Maysa a pudpudno a tampok ti biagko ti pannakairuar ti Baro a Lubong a Patarus iti Nasantuan a Kasuratan iti lenguahe a Bulgarian”

[Ladawan iti panid 29]

Inrugik ti karerak idi agtawenak iti 15