Umadanika iti Dios

“Laglagipenna a Tapoktayo”

“DIAK patien a naan-anay a mapakawannak ni Jehova, ken pagarupko a tungpal-biag nga ibaklayko daytoy.” Kasta ti kinuna ti maysa a Kristiano a babai maipapan kadagiti naaramidanna a biddut. Talaga a nadagsen nga awit ti maduddudog a konsiensia. Ngem mangipaay ti Biblia iti liwliwa a mabalin a mangbang-ar kadagiti agbabbabawi a nakabasol. Usigem ti sasao ni salmista David a mabasa iti Salmo 103:8-14.

Ammo ni David a “naasi ni Jehova” ken saan a ‘kanayon nga agsapsapul iti biddut.’ (Bersikulo 8-10) No adda pangibatayanna iti asi, naan-anay ken aglaplapusanan nga ipakitana dayta. Kas nalaing a dumadaniw, nagusar ni David iti tallo a piguratibo a sasao a mangyilustrar iti napalaus nga asi ti Dios kadatayo.

“Kas iti langlangit nangatngatoda ngem ti daga, ti naayat a kinamanangngaasina nangatngato a maipaay kadagidiay agbuteng kenkuana.” (Bersikulo 11) No tumangadtayo iti langit iti rabii, ditay mautob ti kinaadayo ti nagbaetan dagiti bituen ken ti daga. Impaganetget ngarud kadatayo ni David ti napalaus nga asi ni Jehova, maysa nga aspeto ti nasungdo nga ayatna. Daytoy nga asi ti agpaay “kadagidiay agbuteng” iti Dios​—dagidiay addaan iti “napakumbaba ken naimpusuan a panagraem iti autoridadna,” kuna ti maysa nga eskolar.

“Kas iti kaadayo ti leleggakan ti init manipud iti lelennekan ti init, kasta ti kaadayona manipud kadatayo ti nangikabilanna kadagiti salungasingtayo.” (Bersikulo 12) Inaramat ti dadduma a patarus ti sasao a “kas iti kaadayo ti daya manipud iti laud.” Kasano kaadayo dayta? Kas iti kaadayo a mautobtayo. Paliiwentayo ta kanayon nga agaddayo ti daya ken laud; di pulos agsabat dagita a direksion. Kuna ti maysa nga eskolar a daytoy nga ebkas kaipapananna nga “agingga iti kaadaywan a mapanunottayo.” Ibagbaga ni David a no pakawanen ti Dios dagiti basoltayo, naan-anay nga iyadayona dagita kadatayo.

“Kas iti maysa nga ama mangipakita iti asi iti annakna, ni Jehova nangipakita iti asi kadagidiay agbuteng kenkuana.” (Bersikulo 13) Kas maysa nga ama, ammo ni David ti rikrikna ti maysa a naayat nga ama. Matignay ti kasta nga ama a mangngaasi iti annakna, nangnangruna no agrigrigatda. Ipanamnama kadatayo ni David a ti naayat a nailangitan nga Amatayo kaasianna dagiti annakna ditoy daga, nangnangruna dagidiay addaan iti agbabbabawi a puso a “nadunor ken naidagel” gapu kadagiti basolda.​—Salmo 51:17.

Kadagitoy tallo a piguratibo a sasao, impalgak ni David no ania ti pakatignayan ni Jehova a mangipakita iti asi iti imperpekto a tattao: “Pagaammona unay ti pannakapormatayo, a laglagipenna a tapoktayo.” (Bersikulo 14) Ammo ni Jehova a naaramidtayo iti tapok, nga addaantayo iti pagkapuyan ken limitasion. Yantangay ammona a managbasoltayo, “sisasagana a mamakawan” ni Jehova​—no la ket ta naimpusuan nga agbabawitayo.​—Salmo 86:5.

Natukay kadi ti pusom iti kinuna ni David maipapan iti asi ni Jehova? Ti babai a nadakamat itay inusigna ti kunaen ti Biblia maipapan iti sisasagana a panangpakawan ti Dios, ket kinunana: “Mariknakon a makaadaniak gayam ken Jehova, ken kasla adda naikkat a bakbaklayek.” a Kayatmo kadi a maammuan ti ad-adu pay maipapan iti asi ti Dios ken no kasano a magun-odam dayta? Nalabit mariknam a maikkatto met ti dadagsen a bakbaklayem.

Singasing a Basaen iti Biblia iti Agosto:

◼ Salmo 87-118

[Footnote]

[Blurb iti panid 13]

“Mariknakon a makaadaniak gayam ken Jehova, ken kasla adda naikkat a bakbaklayek”