Saludsod Dagiti Agbasbasa

Ania ti Armagedon?

▪ Ipapan ti kaaduan a ti sao nga “Armagedon” kaipapananna ti sapasap a pannakadadael​—nuklear a gubat, sapasap a didigra ti nakaparsuaan, wenno ti pannakadadael ti aglawlaw gapu iti ibabara ti lubong. Awan kadagitoy ti kaipapanan ti Armagedon a tuktukoyen ti Biblia. Ania ngarud dayta?

Nadakamat ti sao nga “Armagedon” (“Har–Magedon”) iti libro ti Biblia nga Apocalipsis. Maysa dayta a naisangsangayan a gubat, ti “gubat ti naindaklan nga aldaw ti Dios a Mannakabalin-amin” a pakaur-urnongan dagiti “ar-ari iti intero a mapagnaedan a daga” para iti maudi a pannakigubat iti Dios. Natukoy met ti kasta a gubat iti adu a paset ti Biblia.​—Apocalipsis 16:14-16; Ezequiel 38:22, 23; Joel 3:12-14; Lucas 21:34, 35; 2 Pedro 3:11, 12.

Ania ti ramanen daytoy a gubat? Iti simboliko a sasao, kunaen kadatayo ti libro nga Apocalipsis: “Ti ar-ari ti daga ken dagiti buyotda a naurnong a sangsangkamaysa tapno makigubatda iti daydiay sisasakay iti kabalio ken agraman ti buyotna.” Ti “sisasakay iti kabalio” tukoyenna ti Anak ti Dios, ni Jesu-Kristo, ti dinutokan ti Dios a mangidaulo iti buyot dagiti makigubat nga anghel a mangparmek kadagiti kabusorna. (Apocalipsis 19:11-16, 19-21) Ipalgak ti Jeremias 25:33 ti kaadu dagiti nadangkes a madadaelto: “Dagidiay pinapatay ni Jehova pudno unay a maaddanto iti dayta nga aldaw manipud iti maysa nga ungto ti daga agingga iti sabali nga ungto ti daga.”

Apay a nasken ti Armagedon? Saan ngamin a bigbigen dagiti nasion ti panangituray ti Dios ta kayatda nga iturayan ti bagbagida. (Salmo 24:1) Nadeskribir iti Salmo 2:2 ti isusupringda: “Ti ar-ari ti daga agtakderda ket dagiti met laeng nangato nga opisial naguurnongda a nagmaymaysa maibusor ken Jehova ken maibusor iti daydiay pinulotanna.”

Dagitoy a rebelde mayarigda kadagiti nasukir nga eskuater a saanda laeng nga aguman ti sanikua a dida a kukua no di ket dadaelenda pay dayta. Dagiti nasion ita daddadaelen ken rugrugitanda ti daga. Impadto ti Sao ti Dios daytoy nakaay-ay-ay a kasasaad, a kunana: “Nagpungtot dagiti nasion, ket dimteng ti . . . pungtot [ti Dios].” Kalpasanna, “dadaele[nna] dagidiay mangdaddadael iti daga.” (Apocalipsis 11:18) Ipalubos ti Dios a mapasamak ti Armagedon tapno marisut ti isyu no asino ti rumbeng a mangituray iti intero a sangatauan.​—Salmo 83:18.

Kaano a mapasamak ti Armagedon? Nabatad a kinuna ti Anak ti Dios: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mateo 24:36) Nupay kasta, kastoy ti iballaag ti mannakigubat nga Ari a ni Jesu-Kristo maipapan iti Armagedon: “Adtoy! Umayak a kas maysa a mannanakaw. Naragsak daydiay agtalinaed a siririing.” (Apocalipsis 16:15) Gapuna, daytoy a sangalubongan a gubat ket nainaig iti kaadda ni Kristo, nga adda itan kas ipamatmat dagiti padto ti Biblia.

Dagiti nadangkes a di agbalbaliw madadaelda inton Armagedon, ngem addanto “dakkel a bunggoy” a makalasat. (Apocalipsis 7:9-14) Makitadanto ti kaitungpalan dagitoy a sasao: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:10, 11.

[Blurb iti panid 10]

“Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna”