Kasano a Makaadanika iti Dios?
Agsursuroka iti Sao ti Dios
Kasano a Makaadanika iti Dios?
Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.
1. Denggen kadi ti Dios ti amin a kararag?
Iyaw-awis ni Jehova nga umadani kenkuana ti amin a tattao babaen iti kararag. (Salmo 65:2) Ngem saan nga amin a kararag ket denggenna. Kas pagarigan, idi intultuloy dagiti Israelita ti agaramid iti dakes, saan nga inimdengan ti Dios dagiti kararagda. (Isaias 1:15) Malapdan met dagiti kararag ti lalaki a mangmalmaltrato iti asawana. (1 Pedro 3:7) Ngem denggen ti Dios ti kararag dagidiay agbabbabawi, uray nakaro ti basolda.—Basaem ti 2 Cronicas 33:9-13.
2. Kasano ti rumbeng a panagkararagtayo?
Ti panagkararag ket maysa a pribilehio ken paset ti panagdayawtayo, isu a rumbeng nga agkararagtayo laeng ken Jehova. (Mateo 4:10; 6:9) Yantangay imperpektotayo, rumbeng nga agkararagtayo baeten ti nagan ni Jesus gapu ta isu ti naituding a “dalan.” (Juan 14:6) Saan a kayat ni Jehova nga ulit-ulitentayo dagiti naikabesa wenno naisurat a kararag no di ket naimpusuan koma nga agkararagtayo.—Basaem ti Mateo 6:7; Filipos 4:6, 7.
Mangngeg ti Namarsua uray dagiti naulimek a kararag. (1 Samuel 1:12, 13) Aw-awisennatayo nga agkararag iti amin a gundaway, no mangrugi ken agngudo ti aldaw, no mangantayo, ken no adda parikuttayo.—Basaem ti Salmo 55:22; Mateo 15:36.
3. Apay nga agtataripnong dagiti Kristiano?
Maysa a karit ti umadani iti Dios ta agbibiagtayo iti tengnga ti kagimongan nga awanan pammati iti Dios ken mangrabrabak iti karina a talna ditoy daga. (2 Timoteo 3:1, 4; 2 Pedro 3:3, 13) Kasapulantayo ngarud ti makapabileg a pannakilangen kadagiti padatayo a manamati.—Basaem ti Hebreo 10:24, 25.
Makaadanika iti Dios no makigayyemka kadagiti mangay-ayat kenkuana. Magunggonaanka iti pammati ti sabsabali no tumabunoka iti gimong dagiti Saksi ni Jehova.—Basaem ti Roma 1:11, 12.
4. Kasano a sumingedka iti Dios?
Sumingedka ken Jehova no utobem dagiti nasursurom iti Saona. Panunotem dagiti ar-aramid, bilbilin, ken karkarina. Napateg ti panagkararag ken panagutob tapno maapresiarmo ti ayat ken sirib ti Dios.—Basaem ti Josue 1:8; Salmo 1:1-3.
Napateg nga addaanka iti panagtalek ken pammati iti Dios tapno agtalinaedka a nasinged kenkuana. Ngem ti pammati ket kas iti sibibiag a parsua a nasken a mataraonan. Nasken ngarud a kanayon nga utobem dagiti nasursurom tapno mataraonan ti pammatim.—Basaem ti 1 Tesalonica 5:21; Hebreo 11:1, 6.
5. Kasano a magunggonaanka iti iyaadanim iti Dios?
Dungdungnguen ni Jehova dagidiay mangay-ayat kenkuana. Salaknibanna ida iti aniaman a mangdadael iti pammatida ken iti namnamada a biag nga agnanayon. (Salmo 91:1, 2, 7-10) Pakdaarannatayo tapno maliklikantayo ti ar-aramid a makadangran iti salun-attayo ken mamagliday kadatayo. Isuro ni Jehova kadatayo ti kasayaatan a wagas ti panagbiag.—Basaem ti Salmo 73:27, 28; Santiago 4:4, 8.
Para iti kanayonan nga impormasion, kitaem ti kapitulo 17 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.