“Imposible!”​—Ania ti Kaipapananna?

DAMO a naglayag ti Titanic idi 1912. Dayta ti kadakkelan, kanginaan, ken komportable a barko idi a tiempo. Kunada a “di lumned” dayta gapu ta nagsayaat ti diseniona. Siempre, napalabasen dayta a pasamak. Iti umuna a panaglayagna, naidungpar iti iceberg iti North Atlantic isu a limned. Natay ti agarup 1,500 a pasaherona. Ti barko nga ipagarupda nga imposible a lumned, iti sumagmamano laeng nga oras addan iti uneg ti taaw.

Adu ti kaipapanan ti sao nga “imposible.” Maibagatayo nga imposible ti maysa a banag no ditay kabaelan nga aramiden, wenno tarusan. Adu a gapuanan ita ti teknolohia ti imposible idi gapu ta saan a kabaelan nga aramiden ti tao wenno uray mapanunot la koma. Mapaspasamak itan ti ibilang dagiti tattao idi nga imposible a maaramidan iti naglabas a 50 a tawen. Kas pagarigan, ti ipapan ti tao iti bulan, ti panangipatulod ti lugan idiay Mars sa kontrolen dayta ditoy Daga, ti panangadal iti amin a paset ti genetic code, ken ti panangbuya kadagiti damag nga agdama a mapaspasamak iti uneg ken ruar ti pagilian. Kastoy ti komento ti dati a presidente ti America a ni Ronald Reagan idi nagpalawag iti grupo dagiti agkakalaing a tattao iti nadumaduma a tay-ak ti siensia: “Dakayo a makinggapuanan iti panagrang-ay iti teknolohia, pinagbalinyo a posible itan dagiti bambanag nga imposible idi a mapasamak.”

No maipapan iti adu a nakaskasdaaw nga irarang-ay a mapaspasamak ita, kuna ni Propesor John Brobeck: “Saanen a masigurado ti maysa a sientista no adda pay banag nga imposible. Ti laeng maibagana ket nalabit saan pay a posible ita. Ngem sigun iti agdama a pannakaammotayo, mabalin a maibagana nga imposible a mailawlawag dayta.” No adda kasla imposible kadatayo, kuna ti propesor, “ti maysa a banag a kasapulan ket ti gubuayan ti enerhia a ditay ammo. Iti Kasuratan, natukoy daytoy a gubuayan ti enerhia kas pannakabalin ti Dios.”

Posible iti Dios ti Amin a Bambanag

Nabayagen sakbay pay daytoy a komento ni Propesor Brobeck, kinuna ni Jesus a taga-Nazaret a mabigbigbig kas  katan-okan pay laeng a tao a nagbiag: “Ti bambanag a di mabalin iti tao mabalin iti Dios.” (Lucas 18:27) Ti nasantuan nga espiritu ti Dios ti kabilgan a puersa iti uniberso. Saan a mabalin a rukoden dayta babaen ti teknolohia. Babaen ti tulong ti nasantuan nga espiritu maaramidtayo dagiti bambanag a ditay kabaelan nga aramiden a bukodtayo.

Kas imperpekto a tattao, masansan a maipasangotayo kadagiti kasasaad a kasla ditay kabaelan a daeran. Kas pagarigan, nalabit matay ti ipatpategtayo iti biag wenno mabalin a marigrigatan ti pamiliatayo. No kasta ti kasasaadtayo mabalin a mariknatayo a ditay kabaelanen, awanen ti namnamatayo, wenno maupaytayon. Ania ti aramidentayo?

Kuna ti Biblia a ti maysa a tao nga addaan pammati iti Mannakabalin-amin ken agkiddaw iti nasantuan nga espirituna ken aramidenna ti amin a kabaelanna a mangay-ayo Kenkuana, manamnamana ti tulong tapno mapagballigianna ti adu a rigat. Impanamnama ni Jesus: “Pudno kunak kadakayo a siasinoman nga agkuna itoy a bantay, ‘Maibagkat ken maitappuakka idiay baybay,’ ket saan nga agduadua iti pusona no di ket addaan iti pammati a ti sawenna ket mapasamak, maaramidto dayta kenkuana.” (Marcos 11:23) Awan ti situasion a saan a madaeran wenno mapagballigian no ipalubostayo a ti bileg ti Sao ti Dios ken ti espirituna ti mangimpluensia kadatayo.

Alaentayo a pagarigan ti maysa a lalaki a naasawaanen iti 38 a tawen ken napalalo ti ladingitna idi natay ti asawana gapu iti kanser. Kasla saanen a makapagbiag nga agmaymaysa ken adda dagiti gundaway a kayatnan ti matay. No lagipenna ti napalabas, patienna a dagiti naimpusuan a kararagna ken inaldaw a panagbasana iti Biblia, kasta met ti sipapasnek a panagkiddawna iti panangiwanwan ti espiritu ti Dios ti nakatulong kenkuana a mangibtur iti impagarupna nga imposible.

Maysa nga agassawa ti problemado ti panagasawada. Gapu iti kinaranggas ken adu a bisio ti asawa a lalaki, kayat payen ti asawa a babai ti agpakamatay. Idi agangay, ti lalaki nakipagadal iti Biblia kadagiti Saksi ni Jehova. Gapu kadagiti naadalna naisardengna dagiti dakes a bisiona ken ti panagpungpungtotna. Nasdaaw ti babai iti kasla “imposible” a panagbalbaliw ni lakayna.

Nakaay-ay-ay ti kasasaad ti maysa a lalaki idi agdrogdroga ken imoral pay laeng ti panagbiagna. Kinunana: “Awanen ti panagraemko iti bagik.” Ngem sipapasnek a nagkararag iti Dios, “Apo, ammok a dumdumngegka kaniak. Pangngaasim ta tulongannak!” Kas sungbat iti kararagna, nangrugi a nakipagadal kadagiti Saksi ni Jehova, ket idi agangay binalbaliwanna ti panagbiagna. “Masansan a makonkonsensiaak ken panagriknak ket awan serserbik,” kinunana. “No dadduma, malidayanak unay. Ngem dakkel ti naitulong ti Sao ti Dios tapno maparmekko daytoy a riknak. Kadagiti rabii a diak makaturog, lagipek dagiti naadalko a teksto ti Biblia. Nakatulong dagitoy tapno maiwaksi dagiti negatibo a pampanunotko.” Naragsak itan ti panagasawana. Aktiboda ken baketna a tumultulong iti sabsabali tapno agtalekda met iti bileg ti Sao ti Dios. Gapu iti nariribuk a kasasaadna idi agtutubo pay, nalabit ipagarupna nga imposiblen a makapagbalbaliw.

Ipakita dagitoy a kapadasan a talaga a nabileg ti Sao ti Dios ken kabaelan nga itungpal ti nasantuan nga espirituna ti bambanag a kasla “imposible” kadatayo. Ngem mabalin a maikunayo, “Agkasapulan dayta iti pammati!” Wen, pudno dayta ta kuna ti Biblia, “no awan ti pammati di mabalin nga ay-aywen a naan-anay [ti Dios].” (Hebreo 11:6) Ngem panunotem daytoy: Ipapanmo a kuna ti nasinged a gayyemmo, nalabit maysa a manedyer iti banko wenno addaan autoridad: “Dika madanagan.  No adda kasapulam, umayka laeng kaniak.” Maragsakanka la ketdi iti inkarina. Ngem nakalkaldaang ta masansan a paayendatayo dagiti tattao. Nalabit dumteng ti tiempo a din matungpal ti gayyemmo ti karina gapu ta nagbaliwen ti kasasaadna. No matay ti gayyemmo, awanen ti amin a naimbag a naaramidanna ken saanen a makatulong. Iti sabali a bangir, awan kadagiti bambanag a mabalin a mapasamak iti tao ti manglapped iti Dios a mangibanag iti panggepna. Impanamnama kadatayo ti Biblia: “Awan ti imposible iti Dios.”​—Lucas 1:37, The Jerusalem Bible.

“Patiem Kadi Daytoy?”

Adu a pasamak ti mangpaneknek iti kinapudno dagita a sasao a nairekord iti Biblia. Usigenyo ti sumagmamano a pagarigan.

Agtawen idin iti 90 ni Sara, isu a nagkatawa idi naibaga kenkuana a maaddaanto iti anak a lalaki. Ngem ti kaadda dagiti Israelita ti pammaneknek a natungpal dayta. Maysa a lalaki nga inalun-on ti dakkel nga ikan, ti naispal iti kaaddana iti tian ti ikan iti tallo nga aldaw, ken nagbiag tapno isuratna ti bukodna a pakasaritaan. Jonas ti naganna. Ammo ti doktor nga agnagan Lucas no ania ti nagdumaan ti kinaawan puot ken ipapatay. Inrekordna no kasano a napagungar ti natay nga agtutubo a lalaki nga agnagan iti Eutico gapu ta natnag iti tawa iti makinngato a siled. Saan laeng a sarsarita dagitoy. Ti panangadal a naimbag kadagitoy a salaysay paneknekanda nga agpaysoda.​—Genesis 18:10-14; 21:1, 2; Jonas 1:17; 2:1, 10; Aramid 20:9-12.

Kuna ni Jesus iti gayyemna a ni Marta: “Tunggal maysa a sibibiag ken mangwatwat iti pammati kaniak saanto a pulos matay.” Iti daytoy kasla imposible a kari, innayon pay ni Jesus: “Patiem kadi daytoy?” Napateg pay laeng nga usigentayo ita dayta a saludsod.​—Juan 11:26.

Biag nga Agnanayon Ditoy Daga​—Imposible?

Iti maysa a panagadal ti siensia, kastoy ti kapaliiwan dagiti mannurat: “Mabalin nga asidegen ti panawen a napapauten ti panagbiagtayo ngem ita​—mabalin pay ketdi nga agnanayon.” Kuna ti The New Encyclopædia Britannica nga imbes a ti pannakadadael dagiti selula babaen ti pannakaperdi wenno dadduma pay ti pakaigapuan ti ipapatay, agparang nga adda ditay ammo a makagapu iti pannakadadael ti nasayaat a panagandar ti bagi ti tao. * Intuloyna: “Posible a ti panaglakay wenno panagbaket ket maigapu iti pannakadadael ti sistema a mangkonkontrol iti narikut a panagandar ti bagi.”

Nupay makapainteres amin dagita, ad-adda a makakombinsir ti rason nga ipaay ti Biblia tapno mamatitayo iti biag nga agnanayon ngem iti aniaman a panangilawlawag ti siensia. Ti Namarsua kadatayo a ni Jehova a Dios, ti Gubuayan ti biag, inkarina a “pudno nga alimonennanto ni patay iti agnanayon.” (Salmo 36:9; Isaias 25:8) Patiem kadi daytoy? Inkari dayta ni Jehova, ken dina mabalin ti agulbod.​—Tito 1:2.

[Footnote]

[Blurb iti panid 27]

‘Nagbalinen a posible dagiti bambanag nga imposible idi a mapasamak.’​—RONALD REAGAN

[Blurb iti panid 28]

No panagriknam ket kasla saanmon a kabaelan ti agbiag, asino ti pagpatulongam?

[Picture Credit Line iti panid 27]

NASA photo