Mapagtalkam Kadi ti Relihionmo Maipapan iti Gubat?
Nasurok a sangapulo a tawen a soldado ni Alberto. Kinunana: “Bendisionannakami ti chaplain a kunkunana, ‘Ti Dios adda kadakayo.’ Ngem pampanunotek, ‘mapanak pumatay, ngem kuna ti Biblia a “dika mamapatay.”’”
Nagserbi ni Ray iti navy bayat ti Gubat Sangalubongan II. Naminsan, imbagana iti chaplain: “Kumuyogkayo kadakami iti barko ken ikararaganyo ti buyot tapno mangabak. Saan kadi a kasta met ti aramiden ti kalaban?” Simmungbat ti chaplain a misterio ti ar-aramid ti Apo.
No pagduaduaam dayta, saan laeng a siksika ti kasta.
ANIA TI ISURSURO TI BIBLIA?
Kinuna ni Jesus a maysa kadagiti kangrunaan a bilin ti Dios ket “ayatem ti padam a tao a kas iti bagim.” (Marcos 12:31) Kayat kadi a sawen ni Jesus a dayta nga ayat iti kaarruba ket para laeng kadagiti kalugaran wenno kailiantayo? Saan. Kinunana kadagiti adalanna: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.” (Juan 13:34, 35) Naisangsangayan ti panagayatda iti maysa ken maysa ta dayta ti pakabigbiganda. Saanda laeng a liklikan ti pumatay, no di ket sisasaganada a matay para iti sabali.
Dagiti nagkauna a Kristiano nagbiagda a maitunos iti sasao ni Jesus. Kuna ti The Encyclopedia of Religion: “Paneknekan dagiti immuna nga amma ti simbaan a pakairamanan da Tertullian ken Origen a dagiti Kristiano dida kayat ti pumatay, dayta ti makagapu a dida nakipaset iti buyot ti Roma.”
KASANO A MARAGPAT DAGITI SAKSI NI JEHOVA TI MAKALIKAGUMAN?
Yantangay adda Saksi ni Jehova iti dandani amin a pagilian, adda kapammatianda nga agnanaed kadagiti aggugubat a nasion. Ngem ikagkagumaanda nga ipakita ti ayat nga isu ti pakabigbiganda.
Isursuro kadi dagiti lider ti relihion ti pudno a Nakristianuan nga ayat?
Kas pagarigan, idi naglalaban dagiti Hutu ken Tutsi idiay Rwanda idi 1994, nagtalinaed a neutral dagiti Saksi ni Jehova. Sinalakniban dagiti Saksi ti padada a Saksi a saanda a katribu uray agpeggad ti biagda. Idi natakuatan nga inlemmeng ti dua a Hutu a Saksi ti kapammatianda a Tutsi, kinuna ti militia a Hutu Interahamwe, “Mataykayo ta tinulonganyo ti Tutsi a makalibas.” Nakalkaldaang ta napapatay ti dua a Hutu a Saksi.—Juan 15:13.
Panagkunam: Ti kadi ar-aramiden dagiti Saksi ni Jehova ket maitunos iti sasao ni Jesus maipapan iti managsakripisio nga ayat?
