Kayat ni Jehova a Dios a kanayon a makisaotayo kenkuana maipapan kadagiti pakaseknantayo. (Lucas 18:1-7) Denggennatayo gapu ta maseknan kadatayo. Yantangay sidudungngo nga aw-awisennatayo ti nailangitan nga Amatayo nga agkararag, apay koma a paayennatayo?—Basaem ti Filipos 4:6.

Ti kararag ket saan laeng a panagkiddaw iti tulong, imbes ketdi, tulongannatayo nga agbalin a nasinged iti Dios. (Salmo 8:3, 4) No kanayon nga iyebkastayo ti riknatayo iti Dios, sumingedtayo kenkuana.—Basaem ti Santiago 4:8.

No agkararagtayo, saan a kayat ti Dios nga agusartayo iti napasindayag a sasao wenno ulit-ulitentayo ti ibagatayo. Saan met a kasapulan a naisangsangayan ti posturatayo. Aw-awisennatayo ni Jehova nga agkararag nga iyebkastayo ti linaon ti pusotayo. (Mateo 6:7) Kas pagarigan, iti nagkauna nga Israel, inkararag ni Anna ti maipapan iti nadagsen a problema ti pamiliana. Idi agangay, nagbalinen a rag-o ti marikriknana a liday, isu a naimpusuan a nagyaman iti Dios babaen ti kararag.—Basaem ti 1 Samuel 1:10, 12, 13, 26, 27; 2:1.

Anian a nagsayaat a pribilehio dayta kadatayo! Maibagatayo dagiti pakaseknantayo iti Namarsua. Mabalintayo met nga idaydayaw ken pagyamanan kadagiti inaramidna. Ditay koma ngarud liwliwayan dayta a nagpateg a pribilehio.—Basaem ti Salmo 145:14-16.