Kas iti carbon monoxide, saan met a makita ni Satanas, nagrigat a mailasin dagiti tattao, ken nakapegpeggad. Ngem dinatay binaybay-an ti Dios. Awan rumbeng a pagbutngam ken Satanas no usarem dagiti sagut nga ituktukon ti Dios.

Wayawaya nga agpili. Kuna ti Santiago 4:7: “Busorenyo ti Diablo, ket isu agtalawto kadakayo.” Nupay mannakabalin ni Satanas, dinaka mapilit a mangaramid iti bambanag a dimo kayat. Nawayaka nga agpili. Kuna ti 1 Pedro 5:9: “Agtakderkayo a bumusor [iti Diablo], natibker iti pammati.” Laglagipem a pimmanaw ni Satanas kalpasan ti natibker a panagkedked ni Jesus iti namitlo a pannulisog ni Satanas. (Mateo 4:11) No kayatmo, mapagkedkedam met dagiti pannulisog ni Satanas.

Pannakigayyem iti Dios. Paregtaennatayo ti Santiago 4:8 nga ‘umadani iti Dios.’ Personal nga aw-awisennaka ni Jehova a maaddaan iti nasinged a pannakigayyem kenkuana. Kasanom a maaramid dayta? Umuna iti amin, ammuem ti ad-adu pay maipapan kenkuana manipud iti Biblia. (Juan 17:3) Dagiti maadalmo maipapan ken Jehova tignayennaka a mangayat kenkuana, dayta nga ayat ti mangtignay met kenka a mangaramid iti pagayatanna. (1 Juan 5:3) Bayat nga umad-adanika iti nailangitan nga Amatayo, ania ti aramidenna? Kuna ni Santiago a ti Dios “umadaninto [kenka].”

Naikari a proteksion. Mabasa iti Proverbio 18:10: “Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib.” Siempre, dina kayat a sawen nga anting-anting ti nagan ti Dios. Imbes ketdi, kaipapananna a dagidiay pudpudno a mangraraem iti nagan ti Dios mabalinda ti agkiddaw kenkuana iti proteksion iti aniaman a tiempo.

Ulidan iti Biblia. Adda maadaltayo iti Aramid 19:19 maipapan kadagiti kabbaro a nakomberte a Kristiano idiay Efeso: “Adu kadagidiay nangan-annurot kadagiti arte ti panagsalamangka inyegda a pinagkaykaysa dagiti libroda ket pinuoranda ida iti sanguanan ti isuamin. Ket pinattapattada a sangsangkamaysa  dagiti gatadda ket nasarakanda nga agpategda iti limapulo ribu a kapisi ti pirak.” * Dinadael dagidiay a Kristiano ti amin a bambanag a nainaig iti espiritismo, uray nangina dagita. Dakkel ti maitulong dayta nga ulidan kadatayo. Nasaknap itan ti okulto ken espiritismo. Uray dagiti bambanag ken ar-aramid a nainaig iti espiritismo a kasla saan met a dakes ket mabalin nga usaren dagiti demonio a mangimpluensia kenka. Nasken nga ibellengmo dagita uray pay kasano kanginada.—Deuteronomio 18:10-12.

Kas iti nadakamat iti immuna nga artikulo daytoy a serye, saan idi a mamati ni Rogelio nga adda Diablo. Ngem idi nasuroken a 50 ti tawenna, nagbaliw ti panangmatmatna. Apay? “Idi laeng a naaddaanak iti Biblia,” malagip ni Rogelio. “Nakombinsirak nga adda Diablo gapu iti naadalko iti Kasuratan. Proteksion kaniak dayta a pannakaammo tapno mailiklikak iti impluensiana.”

Segseggaam kadi ti aldaw nga awanton ni Satanas? Kinapudnona, impadto ti Kasuratan nga iti masanguanan, ti Diablo a mangyaw-awan iti adu a tattao ket ‘maitapuak iti danaw nga apuy ken asupre.’ (Apocalipsis 20:10) Siempre, ti literal nga apuy ken asupre dina madangran ti maysa a di makita nga espiritu a persona. Isu a ti danaw nga apuy iladladawanna ti agnanayon a pannakadadael. Awanton ni Satanas iti agnanayon. Nagsayaatto dayta a tiempo para kadagiti mangay-ayat iti Dios!

Kabayatanna, aramidem ti amin a kabaelam nga agtultuloy a mangadal iti maipapan ken Jehova ken kadagiti pagalagadanna. * Panunotem nga addakanto iti tiempo inton naan-anay a maibagam, “Awanen ni Satanas!”