Iti napalabas a 30 a tawen, pampanunoten ti adu a tattao a natalna ken sumaysayaat ti relasion dagiti pagilian iti intero a lubong. Ngem ipakita dagiti nabiit pay a paspasamak a kasla saan met a kasta.

•   “Madandanagan dagiti tattao a ti gubat iti Gaza apektaranna ti dadduma pay a pagilian bayat a mangrugrugi ti gubat ti Israel ken Hezbollah iti border ti Lebanon.”—Reuters, Enero 6, 2024.

•   “Gapu ta at-atakaren dagiti grupo a kontrolado ti Iran dagiti dadduma a lugar ken nangrugi manen ti Iran nga agaramid kadagiti nuklear nga armas, maal-alarma dagiti pagilian iti Laud, lalo ta kaaliado itan ti Iran ti Russia ken China.”—The New York Times, Enero 7, 2024.

•   “Agtultuloy ti panangatake ti Russia iti Ukraine ket kumarkaro ti madi nga epekto dayta.”—UN News, Enero 11, 2024.

•   “Sumaysayaat ti ekonomia ken bumilbileg ti puersa militar ti China, sumiksikat metten ti Taiwan iti intero a lubong, ken kumarkaro ti riri ti China ken US, isu a posible a nalaka laeng a mapasamak ti panaglalaban.”—The Japan Times, Enero 9, 2024.

 Adda kadi ibagbaga ti Biblia maipapan iti nagulo a situasion ti lubong? Agresultanto kadi dayta iti sangalubongan a gubat?

 Saan nga impakpakauna ti Biblia dagiti espesipiko a gubat a mapaspasamak ita. Ngem impakpakaunana nga adunto ti mapasamak a gubat iti panawentayo, ket dagita ti “mangikkat iti talna iti daga.”—Apocalipsis 6:4.

 Impakpakauna ti libro a Daniel nga “iti tiempo ti panungpalan,” dagiti nabileg nga agtuturay ditoy lubong ket ‘agdidinnuronto’ wenno aglalaban ta kayatda ti agbalin a kabilgan. Ipakpakitada ti bileg ti puersa militarda ken aggasgastosda iti adu a “kinabaknang.”—Daniel 11:40, 42, 43.

 Ipakita ti Biblia a kumaro pay ti kasasaad ti lubong sakbay a sumayaat dayta. Impakpakauna ni Jesus nga “addanto dakkel a rigat a saan pay a napaspasamak manipud idi panangrugi ti lubong.” (Mateo 24:21) Dayta a “dakkel a rigat” ket agtungpalto iti gubat a maawagan Armagedon, a nadeskribir iti Biblia kas “gubat ti naindaklan nga aldaw ti Dios a Mannakabalin-amin.”—Apocalipsis 16:14, 16.

 Usarento ti Dios ti Armagedon tapno pagpatinggaenna ti panangituray ti tao, a rason no apay a nakaad-adu dagiti gubat. Isu a ti gubat ti Armagedon ket mangisalakan, saan ket a mangdadael. Tapno maammuam no kasano nga iyeg ti Armagedon ti manayon a talna, basaem dagitoy nga artikulo:

•   “Ania ti Gubat ti Armagedon?”

•   “Armagedon—Naimbag a Damag!”