Naglaon ti Biblia iti kasayaatan a sirib a makatulong iti biag. No regular a basaem ken mennamennaem dagiti linaonna ken iyaplikarmo ti naadalmo, ‘agballiginto ti dalanmo.’ (Josue 1:8; Salmo 1:1-3) Maam-ammom met a naimbag ti Dios ken ti Anakna a ni Jesus. Dayta a pannakaammo ket agturong iti pannakaisalakan.—Juan 17:3.

Kasano ti panangbasam iti Biblia? Adda pagpiliam. Makatulong daytoy nga eskediul iti panagbasa iti Biblia tapno mabasam dagiti libro ti Biblia sigun iti panagsasarunoda wenno sigun iti topiko. Kas pagarigan, mabalinmo a basaen dagiti napili a paset tapno maammuan ti pakasaritaan maipapan iti pannakilangen ti Dios iti nagkauna nga Israel. Mabalinmo met a basaen ti dadduma a paset tapno maammuam no kasano a nangrugi ken rimmang-ay ti kongregasion Kristiano idi umuna a siglo. No makabasaka iti maysa a grupo dagiti kapitulo iti inaldaw, mabasam ti Biblia iti makatawen.

Matulongannaka daytoy nga eskediul no agbirbirokka iti plano para iti panagbasa iti Biblia iti inaldaw, makatawen, wenno no agdadamoka. I-download-mo daytoy a mayimprenta a plano iti panagbasa iti Biblia tapno marugiam itan.