“Ta ti sao ti Dios ket nabiag ken nabileg ken natadtadem ngem iti aniaman nga espada a dua ti tademna ken sumalput pay ketdi iti pagsinaan ti kararua ken ti espiritu, ken kadagiti susuop ken patatayo, ken maipakitana dagiti pampanunoten ken tarigagay ti pusotayo.”—Hebreo 4:12, Baro a Lubong a Patarus.

 “Ta ti sao ti Dios nabiag ken napigsa, ket natadtadem ngem uray ania a campilan a dua ti tademna, ket dumanon nga agingga iti paglasinan ti cararua ken ti espiritu, wen, ken dagiti nagsusuupan ken pata ket nasiglat nga agilasin cadagiti panunot ken panagem ti puso.”—Hebreo 4:12, Ti Biblia.

 Ti mensahe ti Dios kadagiti tattao, a nairekord iti Biblia, ket adda pannakabalinna a mangipakita iti agpaypayso a panagpampanunot ken motibotayo. Kabaelan met dayta a mensahe a pasayaaten dagiti tattao.

 “Ti sao ti Dios ket nabiag.” Ti termino a “ti sao ti Dios” ket tumukoy iti kari ti Dios, wenno iti naipakaammo a panggepna, a nairekord iti Biblia. a Ti maysa a napateg nga aspeto dayta a panggep ket agbiagto nga agnanayon ditoy daga dagiti natulnog a tattao ken tagiragsakenda ti pudno a talna ken panagkaykaysa.—Genesis 1:28; Salmo 37:29; Apocalipsis 21:3, 4.

 Kasano a ti sao ti Dios, wenno ti naibaga a panggepna, ket “nabiag”? Ti maysa a rason ket adda nabileg nga epektona iti puso dagidiay umawat iti dayta ta maaddaanda iti namnama ken panggep iti biag. (Deuteronomio 30:14; 32:47) “Nabiag” met dagiti kari ti Dios ta ti sibibiag a Dios ket agtigtignay tapno naan-anay a matungpal dagiti karina. (Juan 5:17) Saan a kas kadagiti tattao, saan nga agkari ti Dios sa lipatenna, wenno ibagananto a saanna a kabaelan a tungpalen dayta. (Numeros 23:19) Ti saona ket “saanto nga agsubli [kenkuana] nga awan resultana.”—Isaias 55:10, 11.

 “Ti sao ti Dios ket . . . nabileg.” Ti termino a “nabileg” ket mabalin met a maipatarus kas “napuersa,” “aktibo,” wenno “maitungpalna ti aniaman a kasapulan nga itungpal [dayta a sao].” Aniaman ngarud nga ibaga wenno ikari ni Jehova b a Dios ket sigurado a matungpal. (Salmo 135:6; Isaias 46:10) Kinapudnona, kabaelan ti Dios a tungpalen dagiti karina iti pamay-an a nalablabes pay ngem iti ekspektarentayo.—Efeso 3:20. c

 “Nabileg” met ti sao ti Dios ta matulonganna dagidiay mangipateg iti dayta tapno makaaramidda kadagiti positibo a panagbalbaliw iti biagda ken iti kinataoda. Agbalin a paset ti biagda dagiti pannursuro ti Dios, kayatna a sawen, dayta ti mangimpluensia iti panagpampanunot, kabibiag, ken kadagiti planoda iti biag. (Roma 12:2; Efeso 4:24) Ipakita dayta a “ti sao ti Dios . . . [ket] tumultulong met” kadagidiay mangakseptar a naggapu dayta iti Dios.—1 Tesalonica 2:13.

 “Ti sao ti Dios ket . . . natadtadem ngem iti aniaman nga espada a dua ti tademna.” Nayarig ti sao ti Dios iti espada a natadtadem ngem iti aniaman nga espada nga inaramid ti tao gapu iti bilegna a sumalput. Ti mensahe ti Dios danonenna ti puso—ti makin-uneg a kinatao—iti pamay-an a saan a kabaelan dagiti pannursuro ti tao. Naipakita dayta iti sumaruno nga ibaga ti Hebreo 4:12.

 “Ti sao ti Dios ket . . . sumalput pay ketdi iti pagsinaan ti kararua ken ti espiritu, ken kadagiti susuop ken patatayo.” Iti Biblia, ti “kararua” ket mabalin a tumukoy iti makinruar a kinataotayo, idinto ta ti “espiritu” ket mabalin a tumukoy iti makin-uneg a kinataotayo. (Galacia 6:18) “Ti sao ti Dios” arigna salputenna ti “patatayo,” ti kaunegan a rikrikna ken pampanunottayo. Gapu ta maipakita no ania a talaga ti makin-uneg a kinataotayo, nga awan ti tao a makakita, tignayennatayo dagiti pannursuro ni Jehova a mangaramid kadagiti positibo a panagbalbaliw. Mangparagsak dayta iti Namarsua kadatayo ken kadatayo.

 “Ti sao ti Dios . . . maipakitana dagiti pampanunoten ken tarigagay ti pusotayo.” Ti reaksion ti maysa a tao iti sao ti Dios maipakitana ti pudpudno a pampanunotenna, uray ti mismo a tarigagay wenno motibona, a mangim-impluensia iti tignay wenno kababalinna. Kas pagarigan, no positibo ti reaksion ti maysa iti sao ti Dios babaen ti panangaramidna kadagiti kasapulan a panagbalbaliw, ipakpakitana nga isu ket napakumbaba ken napudno. Kayatna a paragsaken ti Namarsua kenkuana. Ngem no agbirbirok iti kamali iti sao ti Dios, mabalin nga ipakpakitana dagiti negatibo a kababalin, kas iti kinapannakkel wenno panagimbubukodan. Baka ikalkalinteganna ti maysa nga aramid a saan nga anamongan ti Dios.—Jeremias 17:9; Roma 1:24-27.

 Ibaga ti maysa a reperensia a ti sao ti Dios “madanonna ti kaunegan a paspaset ti kinataotayo.” Awan ti aspeto ti makin-uneg a kinataotayo ti saan a makita ti Dios ken saan a maipalgak ti saona. “Amin a banag ket nalawag ken agdadata kadagiti mata daydiay mangukomto kadatayo sigun kadagiti aramidtayo,” kuna ti Hebreo 4:13.

 Ti Hebreo a libro ti Biblia ket insurat ni apostol Pablo idi agarup 61 C.E. Impaisurat dayta ti Dios para kadagiti Judio a Kristiano idiay Jerusalem ken Judea.

 Iti kapitulo 3 ken 4, intampok ni Pablo ti inaramid dagiti nagkauna nga Israelita tapno mapakdaaranna dagiti Kristiano. (Hebreo 3:8-12; 4:11) Inkari ni Jehova a wayawayaanna dagiti Israelita iti pannakaadipen ken ipanna ida iti daga a sadiay ‘natalgedto ti panagbiagda.’ (Deuteronomio 12:9, 10) Ngem ti henerasion dagiti Israelita a pimmanaw idiay Egipto maulit-ulit a saanda nga impakita ti pammatida kadagiti kari ti Dios ken namin-adu a sinukirda dagiti bilinna. Kas resultana, ‘saanda a nakikadua iti panaginana ti Dios’ ken saanda a naaddaan iti natalna a relasion iti Dios. Imbes ketdi, natayda idiay let-ang. Uray no natawid dagiti kaputotanda ti Naikari a Daga, maulit-ulit met a nagsukirda a kas kadagidi ammada. Idi agangay, nagsagaba ti nasion iti kasta unay gapu iti dayta.—Nehemias 9:29, 30; Salmo 95:9-11; Lucas 13:34, 35.

 Inlawlawag ni Pablo a masapul a makasursuro dagiti Kristiano manipud kadagiti dakes nga inaramid dagiti di matalek nga Israelita. Saan a kas kadakuada, mabalintayo ti makikadua iti panaginana ti Dios no agtulnogtayo iti saona ken no naan-anay ti pammatitayo kadagiti karina.—Hebreo 4:1-3, 11.

 Buyaem daytoy ababa a video tapno makitam ti pakabuklan ti libro a Hebreo.