Ibaga ti Biblia a “nasayaat a masakbayan ken namnama,” a ti kayat ti Dios para kadatayo. (Jeremias 29:11) Dayta ti maysa a rason nga inted ti Dios ti Biblia kadatayo ‘tapno maaddaantayo iti namnama babaen ti liwliwa manipud iti Kasuratan.’ (Roma 15:4) Ipakita daytoy nga artikulo a makatulong dagiti pammagbaga ti Biblia tapno agbalintayo a positibo uray agproblematayo. Makatulong met dagiti karina tapno maaddaantayo iti nakasaysayaat a namnama iti masanguanan.

Iti daytoy nga artikulo

•  Kasano a makatulong ti Biblia tapno agbalintayo a positibo?

•  Ania a namnama ti ipaay ti Biblia iti amin a tao?

•  Bersikulo iti Biblia maipapan iti namnama

 Adu ti mabasatayo iti Biblia tapno mapasayaat ti biagtayo, ken makatulong dagita tapno agbalintayo a positibo, kas koma kadagitoy.

•   Agbirokka iti Biblia iti makatulong a prinsipio. Ibaga ti Salmo 119:105: “Ti saom ket lampara iti sakak, ken lawag iti pagnaak.” Dua ti maaramidan ti napigsa a silaw. Malawaganna a dagus ti sanguanantayo ken uray ti adayo kadatayo. Kasta met, no bigla nga agproblematayo, makatulong dagiti prinsipio ti Biblia tapno kayatayo a sanguen dayta ken inaldaw a positibotayo latta. Dagiti pannursuro ti Biblia papigsaennatayo manen ken ‘paragsakenna ti pusotayo.’ (Salmo 19:7, 8) Ipakita pay ti Biblia ti panggep ti Dios a nagsayaat a masanguanan para kadagiti tattao ken iti daga. Makatulong dayta a namnama tapno agtultuloytayo a naragsak ken kontento.

•   Agpatulongka iti dadduma. No kasla saanen a sumayaat ti situasiontayo, baka kaykayattayo ti umadayo kadagiti kapamilia wenno gagayyemtayo. Ibaga ti Biblia a saantayo koma nga ar-aramiden dayta, ta baka makaaramidtayo iti madi ken makapagdesisiontayo iti di nasayaat. (Proverbio 18:1) Makatulong dagiti ay-ayatentayo tapno makapagpanunottayo a naimbag. Baka adda dagiti suhestionda no kasanom a sanguen dagiti narigat a situasion. (Proverbio 11:14) Uray kaskasano, maliwliwa ken maparagsakdatayo ket mangted dayta iti pigsatayo a mangsango kadagiti problema agingga a sumayaat dagiti bambanag.—Proverbio 12:25.

•   Agkararagka iti Dios. Ibaga ti Biblia: “Ipalladawmo ken Jehova ti dadagsenmo, ket saranayennakanto. Dinanto pulos ipalubos a matumba ti nalinteg.” b (Salmo 55:22) Isu a maawagan ni Jehova kas “Dios a mangted iti namnama.” (Roma 15:13) Mabalinmo nga ikararag kenkuana ‘ti amin a pakadanagam,’ ta sigurado nga ipatpategnaka. (1 Pedro 5:7) Kinapudnona, ibaga ti Biblia: “Patibkerennakayto, papigsaennakayto, ikabilnakayto iti natibker a pundasion.”—1 Pedro 5:10.

•   Bay-am a dagiti problemam patibkerenna ti namnamam. Ikarkari ti Biblia: “Natalgedto ti mangipangag [iti Dios] ken awanto ti pagbutnganna a didigra.” (Proverbio 1:33) Idi dinalapus ti bagyo ti balay ni Margaret a taga-Australia, napukaw ti adu a banag nga adda kenkuana. Ngem imbes a maawanan iti namnama, nasursurona a temporario laeng dagiti material a banag. Mas nagpokus pay ketdi kadagiti talaga a napateg—ti pamilia ken gagayyemna, ti relasionna iti Dios, ken ti namnama nga adda iti Biblia.—Salmo 37:34; Santiago 4:8.

 Ikarkari ti Biblia ti nasayaat a masakbayan para kadagiti tattao ken iti daga. Asidegen a mapasamak dayta. Ipakita dagiti problema a pakaipaspasanguan dagiti tattao ita nga agbibiagtayon iti “maudi nga al-aldaw” daytoy a lubong. (2 Timoteo 3:1-5) Dandanin imaniobra ti Dios dagiti paspasamak iti daga ken pukawenna ti di kinahustisia ken panagrigrigat. Aramidenna dayta babaen ti maysa a gobierno a maawagan iti Pagarian ti Dios nga agturay iti intero a lubong. (Daniel 2:44; Apocalipsis 11:15) Dayta a nailangitan a gobierno ti tuktukoyen ni Jesus iti pagtuladan a kararag: “Umay koma ti Pagariam. Maaramid koma ti pagayatam ditoy daga.”—Mateo 6:9, 10.

 Nalawag nga ibaga ti Biblia ti kayat ti Dios para iti amin a tao. Kitaem ti dadduma a problema nga ikkatento ti Pagarian ti Dios:

•   Awanton ti agbisin. “Mangpataudto ti daga iti apit.”—Salmo 67:6.

•   Awanton ti agsakit. “Awanto ti residente a mangibaga: ‘Masakitak.’”—Isaias 33:24.

•   Awanton ti matay. ‘Punasento [ti Dios] ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot. Dagiti dati a bambanag ket limmabasen.’—Apocalipsis 21:3, 4.