Patien dagiti Kristiano a natay ni Jesus gapu kadagiti basol ti sangatauan. (1 Pedro 3:18) Ngem dina kayat a sawen a naisalakantayon basta mamatitayo la ketdi a ni Jesus ti Manangisalakan. Ammo dagiti demonio a ni Jesus ti “Anak ti Dios,” ngem madadaeldanto, saanda a maisalakan.—Lucas 4:41; Judas 6.

•  Ania ti masapul nga aramidek tapno maisalakanak?

•  Makatulong kadi ti “Lualo ti Managbasol”?

•  Nagtaudan ti “Lualo ti Managbasol”?

•   Masapul a mamatika nga insakripisio ni Jesus ti biagna gapu kadagiti basoltayo. (Aramid 16:30, 31; 1 Juan 2:2) Ramanen dayta ti panamati a talaga a nagbiag ni Jesus ken umiso ti amin a salaysay ti Biblia maipapan kenkuana.

•   Ammuem no ania a talaga ti isursuro ti Biblia. (2 Timoteo 3:15) Sigun iti Biblia, imbaga da apostol Pablo ken ni Silas iti maysa a guardia: “Mamatika ken Apo Jesus ket maisalakankanto.” Kalpasan dayta, insuroda kenkuana ti “sao ni Jehova.” a (Aramid 16:31, 32) Ipakita daytoy a masapul nga adda pannakaawat ti guardia iti Sao ti Dios tapno makuna a talaga a mamati ken Jesus. Kasapulanna ti umiso a pannakaammo a naibatay iti Kasuratan.—1 Timoteo 2:3, 4.

•   Agbabawika. (Aramid 3:19) Masapul met a pagbabawyam, wenno pagladingitam, dagiti dati a di umiso a kababalin ken dakes nga aramidmo. Makitanto ti sabsabali nga agbabbabawika no isardengmo dagiti aramid a saan a kayat ti Dios ken ‘ipakitam iti aramidmo nga agbabbabawika.’—Aramid 26:20.

•   Agpabautisarka. (Mateo 28:19) Imbaga ni Jesus a dagidiay agbalin nga adalanna ket masapul a mabautisaran. Nagpabautisar ti guardia a nadakamat itay. (Aramid 16:33) Kasta met, kalpasan nga insuro ni apostol Pedro iti adu a tattao ti kinapudno maipapan ken Jesus, “nabautisaran dagidiay siraragsak a nangawat iti imbagana.”—Aramid 2:40, 41.

•   Surotem dagiti bilin ni Jesus. (Hebreo 5:9) Dagidiay ‘mangtungtungpal iti amin’ nga imbilin ni Jesus ipakpakitada iti panagbiagda nga isuda dagiti pasurotna. (Mateo 28:20) Isuda ket “managtungpal iti sao, imbes a managdengngeg laeng.”—Santiago 1:22.

•   Agibtur agingga iti panungpalan. (Marcos 13:13) ‘Masapul nga agibtur’ dagiti adalan ni Jesus tapno maisalakanda. (Hebreo 10:36) Kas pagarigan, nagtulnog ni apostol Pablo iti amin nga insuro ni Jesus ken nagbalin a matalek iti Dios. Nagibtur manipud nagbalin a Kristiano agingga a natay.—1 Corinto 9:27.

 Ikarkararag ti dadduma a relihion ti “Lualo ti Managbasol” ken ti “Lualo ti Pannakaisalakan.” Gagangay a patien dagidiay mangikarkararag kadagita a managbasolda ket mamatida a natay ni Jesus para kadagiti basolda. Kidkiddawenda met a sumrek ni Jesus iti pusoda wenno iti biagda. Ngem awan ti mabasatayo iti Biblia a “Lualo ti Managbasol” ken saanna met nga isursuro nga ikabesatayo dayta.

 Ipagarup ti dadduma a kalpasan nga inkararag ti maysa a tao ti “Lualo ti Managbasol,” siguradon a maisalakan. Ngem awan ti sigurado a maisalakan gapu laeng iti maysa a kararag. Gapu ta saantayo a perpekto, kanayon nga agkamalitayo. (1 Juan 1:8) Isu nga insuro ni Jesus kadagiti pasurotna a kanayon nga ikararagda ti pannakapakawan dagiti basolda. (Lucas 11:2, 4) Kasta met, napukaw ti dadduma a Kristiano ti namnamada nga agbiag nga agnanayon gapu ta simmardengda nga agserbi iti Dios.—Hebreo 6:4-6; 2 Pedro 2:20, 21.

 Nagduduma ti ibagbaga dagiti historiador maipapan iti nagtaudan ti “Lualo ti Managbasol.” Ibaga ti dadduma a nangrugi dayta idi Repormasion Dagiti Protestante. Adda met dagiti mangibaga a nangrugi a maikararag ti “Lualo ti Managbasol” idi timmaud ti adu a relihion idi maika-18 ken maika-19 a siglo. Aniaman ti nagtaudanna, saan a maitunos dayta iti Kasuratan—kinapudnona, maikontra dayta kadagiti sursuro ti Biblia.