Adu ti saludsod maipapan iti panggep ti biag, kas iti Apay nga addatayo ditoy? wenno Adda kadi panggep ti biagko? Ipakita ti Biblia a ti panggep ti biag ket maaddaan iti pannakigayyem iti Dios. Usigem dagitoy nagpateg a kinapudno nga ipalgak ti Biblia.

•   Ti Dios ti Namarsua kadatayo. Kuna ti Biblia: “Isu [ti Dios] daydiay nangaramid kadatayo, ket saan a datayo.”—Salmo 100:3; Apocalipsis 4:11.

•   Adda panggep ti Dios iti amin a pinarsuana a pakairamanantayo.​—Isaias 45:18.

•   Pinarsuanatayo ti Dios nga addaan iti “naespirituan a kasapulan,” agraman ti tarigagay a mangbirok iti panggep ti biag. (Mateo 5:3) Kayatna a mapennek dayta a tarigagaytayo.​—Salmo 145:16.

•   Mapennek ti naespirituan a kasapulantayo no makigayyemtayo iti Dios. Nupay kasla imposible para iti dadduma ti pannakigayyem iti Dios, iparparegta kadatayo ti Biblia: “Umadanikayo iti Dios, ket isu umadaninto kadakayo.”—Santiago 4:8; 2:23.

•   Tapno agbalin a gayyem ti Dios, masapul nga agbiagtayo a maitunos iti panggepna kadatayo. Dakamaten ti Biblia dayta a panggep iti Eclesiastes 12:13: “Agbutengka iti Dios ket tungpalem dagiti bilinna ta daytoy ti panggep a naparsuatayo.”​—Good News Translation.

•   Iti masanguanan, naan-anay a masagraptayto ti immuna a panggep ti Dios kadatayo inton ikkatenna ti panagsagaba ken ipaayanna iti biag nga agnanayon dagiti gagayyemna, dagidiay agdayaw kenkuana.​—Salmo 37:10, 11.