Medio nabayag metten nga agnobiokayo, ngem mangrugikan nga agduadua. Itultuloyyo latta kadi ti relasionyo wenno ag-break-kayon? Matulongannaka daytoy nga artikulo nga agdesision.

Iti daytoy nga artikulo

•  Kasano no saankan a sigurado?

•  Panagaramid iti desision

•  No nagdesisionkan a maki-break

 Bayat ti panagnobio ti baro ken balasang, mabalin a makitadanto a saanda met gayam nga agpada iti kayat iti amin a banag a kas iti impagarupda idi damo. Kas pagarigan:

•   Kaykayat ti maysa ti mapan iti beach, ngem kaykayat ti maysa ti ag-hiking.

•   Nalaing a makisarita ti maysa, ngem managbabain ti maysa.

•   Adda ul-ulbodna ti maysa, ngem kanayon a napudno ti maysa.

 Agduduma dagita a situasion. Iti umuna a situasion, makitatayo nga agdumada iti paginteresan; iti maikadua, agdumada iti ugali; ken iti maikatlo, agdumada iti prinsipio.

 Panunotem: Kadagita a tallo a situasion, ania ti ibilangmo a karigatanto a sanguen no agassawakayon? No adda, ania kadagita ti kayayo a palabsen?

 Mabalin nga agduma ti paginteresan wenno ugali ti agassawa, ngem posible a naragsak latta ti panagasawada. Ngamin, no agkabagayankayo, dina met kayat a sawen nga agpadakayon iti amin. Mabalin a masursuro ti agassawa a magustuan ti paginteresan ti asawada wenno agbalin pay ketdi a pagsayaatanda dagiti ugali ti asawada. a

 Ngem nagpateg a ti piliem a pakiasawaan ket daydiay kapadam iti prinsipio, kas koma iti patpatiem maipapan iti relihion, moral, ken no ania ti umiso ken di umiso. No saan nga agpada dagiti prinsipioyo, baka seniales dayta a masapul nga agsinakayon.

 Kas pagarigan, kitaentayo ti mabalin nga epekto no agduma ti relihion ti agassawa. Ibaga ti libro a Fighting for Your Marriage: “Ipakita dagiti research a dakdakkel ti posibilidadna nga agdiborsio dagiti agassawa nga agduma ti relihionna.”

 Prinsipio ti Biblia: “Saankayo a makikadua kadagiti saan a mamati a kasla ket tay kapadayo ida, ta saan a rumbeng dayta.”—2 Corinto 6:14, Ti Baro a Naimbag a Damag Biblia.

 Ibaga ti Biblia a dagidiay mangasawa ket “addanto rigatda iti lasag.” (1 Corinto 7:28, Ti Biblia) Isu a dika koma masdaaw no mapadpadasam dayta no dadduma uray no agnobiokayo pay laeng.

 Normal laeng iti relasion dagiti di pagkinnaawatan. Ngem ti saludsod, Kayayo kadi a solbaren dagiti problemayo iti natalna a pamay-an? Kasapulanyo nga aramiden dayta lalo inton agassawakayon.

 Prinsipio ti Biblia: “Agbalinkayo a naimbag iti tunggal maysa, sidudungngo a makipagriknakayo, ken situtulok nga agpipinnakawankayo.”—Efeso 4:32.

 Ngem no kanayon wenno serioso dagiti diyo pagkinnaawatan, mabalin a seniales dayta a talaga a saankayo nga agkabagayan. No kasta, nasaysayaat a maammuanyo itan bayat a saankay pay a nagkasar.

 Laglagipem: No saanka a sigurado iti boyfriend wenno girlfriend-mo wenno mariknam a kasla saanka pay a nakasagana a makiasawa, saanmo a tagtagilag-anen dagita!

 Prinsipio ti Biblia: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”—Proverbio 22:3.

 Mabalin a nasakit ti maki-break. Ngem no ti maysa kadakayo wenno agpadakayo ket addaan iti serioso a rason nga agduaduakayon iti relasionyo, baka nasaysayaat nga ag-break-kayon.

 Kasanoyo nga aramiden dayta? No ipalubos ti kasasaad, maymayat no saanka a maki-break babaen ti text message wenno tawag. Imbes ketdi, mangpilika iti maibagay a tiempo ken lugar a pagsaritaanyo a dua dayta a serioso a banag.

 Prinsipio ti Biblia: “Agsaokayo iti pudno iti padayo a tao.”—Zacarias 8:16.

 Kayatna kadi a sawen nga awan serserbim no naki-break-ka? Saan. Laglagipem a ti pannaki-boyfriend wenno pannaki-girlfriend ket makatulong kenka nga agdesision no agkasarkayto wenno saan. Uray no naki-break-ka, adda latta napapateg a masursurom iti kapadasam.

 Isaludsodmo iti bagim: ‘Ania ti nasursurok maipapan iti bagik iti daytoy a relasion? Adda kadi dagiti nakitak a masapul pay a pasayaatek sakbayak a makiasawa? No kas pagarigan ta makiinnaremakto manen, anianto dagiti aramidek ken saanko nga aramiden?’