Busy dagiti Saksi ni Jehova idiay Bulgaria a mangisursuro iti kinapudno maipapan iti Dios ken iti Saona, ti Biblia. Manipud idi 2000, ginasut a Saksi manipud iti nadumaduma a nasion ti immakar idiay Bulgaria tapno tumulong. Ania dagiti rigat a pakaipasanguan dagiti umakar iti sabali a nasion tapno mangasaba? Apay a sulit ti sakripisioda? Kitaentayo ti imbaga dagiti immakar iti Bulgaria.

 “Nabayagen a kayatmi ti agserbi iti sabali a nasion a dakkel ti panagkasapulanna,” kuna ni Darren, nga aggigian idiay England. “Kalpasan a nagkasarkami ken Dawn, immakarkami idiay London tapno tumulong a mangisuro iti Biblia iti lengguahe a Russian. Namin-ano nga implanomi ti umakar iti sabali a nasion, ngem saan a natultuloy gapu iti nagduduma a rason. Panagkunami idi no saanmin a maaramid dayta ngem imbaga ti maysa a gayyemmi a kayamin ti umakar ta nagbaliwen ti situasionmi.” Nagbirok da Darren ken Dawn no ania a nasion ti agkasapulan unay kadagiti mangisuro iti Biblia ken praktikal a pagakaranda. Idi 2011, immakarda idiay Bulgaria.

 Adda dadduma nga awan planoda nga agserbi iti abrod, ngem naparegtada iti kinaragsak dagidiay immakar iti sabali a paset ti lubong. Imbaga ni Giada, nga aggigian idiay Italy a kadua ni lakayna a ni Luca, “Naam-ammok dagiti naregta a Saksi a nagserbi idiay South America ken Africa. Naayatanak unay iti kinaragsakda ken dagiti kapadasan nga inestoriada. Nakatulong kaniak dayta isu a binalbaliwak dagiti planok iti panagserbik ken Jehova.”

 Manipud Czech Republic, immakar da Tomasz ken Veronika idiay Bulgaria idi 2015, a kadua ti dua nga annakda, a ni Klara ken Mathias. Apay a natignayda nga umakar? Imbaga ni Tomasz: “Pinampanunotmi ti ulidan dagiti kakabagianmi ken uray ti dadduma pay a nagserbi iti abrod. Maay-ayatankami kadagiti kapadasanda. No addakami idiay balay, pagsasaritaanmi ti kinaragsakda.” Mangaskasaban daytoy naragsak a pamilia iti baro a teritoriada iti siudad ti Montana iti Bulgaria.

 Ni Linda ti maysa pay a Saksi nga immakar iti Bulgaria. Imbagana: “Bimmisitaak idi iti Ecuador. Naam-ammok dagiti immakar idiay a mangasaba. Nariknak idi a kayatkonto met ti agserbi iti lugar a dakkel ti panagkasapulanna kadagiti mangaskasaba.” Pinampanunot met da Petteri ken Nadja, nga agassawa manipud Finland, ti ulidan ti dadduma. Imbagada: “Adda dagiti kakongregasionmi nga immakar iti sabali a lugar tapno tumulongda a mangisuro iti Biblia kadagiti tattao. Nakaragragsakda a mangyestoria iti panagserbida iti sabali a lugar iti adu a tawen. Imbagada a dagita ti kasayaatan a tawen iti panagbiagda.”

 No kayatmo ti agserbi iti abrod, importante nga agplanoka a nasakbay. (Lucas 14:28-30) Imbaga ni Nele, manipud iti Belgium: “Idi pampanunotekon ti agserbi iti sabali a nasion, inkararagko a makabirokak koma kadagiti artikulo iti publikasiontayo maipapan iti panagserbi iti sabali a nasion. Binasak dagita tapno makitak no ania dagiti kasapulak ket makapagsaganaak nga umakar.”

 Nasurok a siam a tawenen nga aggigian idiay Bulgaria da Kristian ken Irmina, a taga-Poland. Imbagada a dakkel ti naitulong ti panagatenderda iti gimong ti Bulgarian group idiay Poland sakbayda nga immakar. Pinaregta ida dagiti kakabsat ken tinulonganda ida nga agsursuro iti lengguaheda. Imbaga da Kristian ken Irmina: “Napaneknekanmi a no agpausarka ken Jehova a Dios, itedna dagiti kasapulam ket makaparagsak unay dayta. No ibagam ken Jehova, ‘Adtoyak! Ibaonnak!’ kayam nga aramiden uray dagiti banag a kasla imposible kenka.”—Isaias 6:8.

 Tapno makapagsagana ken makaurnong iti kuarta da Reto ken Cornelia, nga agassawa manipud Switzerland, nagdesisionda a pasimplienda ti biagda. Imbagada: “Makatawen sakbay nga immakarkami, makalawas a bimmisitakami idiay Bulgaria tapno mapadasanmi ti biag idiay. Adda nakasaritami nga agassawa a misionero. Nakatulong unay dagiti imbagada.” Inaramid da Reto ken Cornelia dagidiay a suhestion ket nasurok a 20 a tawendan idiay Bulgaria.

 Dagiti immakar iti sabali a nasion, masapul nga ag-adjust-da iti baro ken mabalin a narigat a situasion. (Aramid 16:9, 10; 1 Corinto 9:19-23) Para iti adu, ti karirigatan ket ti agsursuro iti baro a lengguahe. Imbaga ni Luca a nadakamat itay: “Kanayon a maragragsakankami nga agkomento kadagiti Nakristianuan a gimong iti bukodmi a sasao. Medio nabayag met a marigrigatankami nga agassawa nga agsagana iti uray maysa laeng a nakasimsimple a komento iti Bulgarian! Kaslakami la ubbing manen. Nasaysayaat pay ketdi ti komento dagiti ubbing ngem kadakami.”

 Imbaga ni Ravil, a taga-Germany: “Makabannog ti agsursuro iti lengguahe. Ngem laglagipek a kanayon, ‘Saanmo unay a serseriosuen. Katawaam laeng dagiti kamalim.’ Ngem uray no marigrigatanak, saanko nga ibilang a problema dayta, no di ket paset ti sagrado a panagserbik ken Jehova.”

 Imbaga ni Linda, a nadakamat itay: “Saanak a nalaing nga agsursuro iti lengguahe. Narigat a sursuruen ti Bulgarian. Namin-adu idi a kayatko ti sumuko. Nagmadi ti riknam no saanmo a makasarita dagiti tattao ken dimo maawatan ti ibagbagada. Tapno natibker latta ti espiritualidadko, Swedish ti us-usarek no agad-adalak. Nasursurok met laeng ti Bulgarian iti tulong dagiti kakabsat.”

 Iliw ti maysa pay a nagrigat a labanan. Pinanawan dagiti immakar iti sabali a nasion ti kapamilia ken gagayyemda. Imbaga ni Eva nga immakar iti Bulgaria a kaduana ti asawana a ni Yannis: “Malidlidayak idi damo. Tapno saankami a mailiw, kanayon a tawaganmi dagiti gagayyem ken kapamiliami ken nagbirokkami kadagiti baro a gagayyemmi ditoy.”

 Adda pay dadduma a pakarigatan. Imbaga da Robert ken Liana, a taga-Switzerland: “Marigrigatankami nga agsursuro iti lengguahe ken ag-adjust iti kultura. Saankami pay a nasanay iti nakalamlamiis a winter ditoy.” Ngem positibo ken naragsak latta dagitoy nga agassawa, isu a nakapagserbida a matalek idiay Bulgaria iti 14 a tawenen.

 Irekomenda ni Lilly ti umakar iti lugar a dakkel ti panagkasapulanna. Imbagana: “Ad-adda a nariknak ti tulong ni Jehova a saanko koma a napadasan no addaak laeng iti lugarmi. Busy-ak a tumultulong iti dadduma isu a nadekdekketakon ken Jehova. Naragsakak ken kontentoak.” Umanamong ni lakayna a ni Ravil. Imbagana: “Daytoy ti kasayaatan a biag. Adu ti naam-ammomi a nareregta a Kristiano manipud iti dadduma a nasion nga adu ti kapadasanda iti panangisuro kadagiti kinapudno iti Biblia. Nakaad-adu ti nasursurok kadakuada.”

 Gapu ta adu ti situtulok nga agpapausar, naballigi ti pannakaikasaba ti “naimbag a damag maipapan iti Pagarian . . . iti intero a daga.” (Mateo 24:14) Dagiti boluntario nga immakar idiay Bulgaria, nakitada nga inted ni Jehova dagiti tarigagay ti pusoda ken pinagballigina dagiti planoda.—Salmo 20:1-4.