Maysa a Saksi ni Jehova ni Brooke a taga-United States. Bayat ti COVID-19 pandemic, mangaskasaba babaen kadagiti surat. Kinapudnona, nakaad-adu a surat ti ar-aramiden ni Brooke iti kada lawas. Ngem kalpasan ti maysa ket kagudua a tawen, maup-upayen. Ngamin, sipud idi nangrugi nga agsurat, maysa laeng ti nagsubalit ket imbaga daytoy a sumardengen ni Brooke nga agsurat kenkuana. Pinagduaduaan ni Brooke no adda met la serserbi ti ar-aramidenna.

 Ngem idi agangay, ti maysa pay a Saksi a ni Kim nga agtrabtrabaho iti bangko inyestoriana ken Brooke ti imbaga ti maysa a customer-na. Imbaga ti customer ken Kim nga isu ket nakaawat iti surat manipud iti maysa a Saksi ni Jehova. Idi agangay, naammuan ni Kim a ni Brooke gayam ti naggapuan ti surat! Iti sumaruno a lawas, napan manen ti customer idiay bangko. Bayat a makisarsarita ken Kim, dinamagna no mabalinna ti makigimong, a maang-angay pay laeng idi babaen ti videoconferencing.

 Di nagbayag, ni David, a sabali pay a Saksi, imbagana ken Brooke nga adda katrabahuanna a nakaawat iti maysa kadagiti suratna. Ap-apresiaren unay ti katrabahuanna ta insurat a mismo ni Brooke dayta. Kinunana: “Ad-adu koma pay a tattao ti mangipakita iti kastoy a personal nga interes iti sabsabali.” Ginundawayan ni David ti oportunidad tapno ad-adda pay a makasabaan ti katrabahuanna ken imbagana nga ikkanna iti literatura, a siraragsak met nga inawat ti katrabahuanna.

 Bigbigen dagiti Saksi ni Jehova a mabalin a saanda a kanayon nga ammo no kaano nga agtubo ti bukel nga immulada iti ministerioda. (Eclesiastes 11:5, 6) Nupay kasta, gapu kadagiti kapadasanna, mas naapresiar ni Brooke ti maar-aramidanna iti trabaho a panangasaba ken panagaramid iti adalan.—1 Corinto 3:6.