Nei, Biblían sýnir að við eigum bara að biðja til Guðs og gera það í Jesú nafni. Jesús sagði við lærisveina sína: „Þannig skuluð þér biðja: Faðir vor, þú sem ert á himnum. Helgist þitt nafn.“ (Matteus 6:9) Hann sagði lærisveinum sínum aldrei að biðja til dýrlinga, engla eða nokkurs annars en Guðs.

 Jesús sagði auk þess fylgjendum sínum: „Ég er vegurinn, sannleikurinn og lífið. Enginn kemur til föðurins nema fyrir mig.“ (Jóhannes 14:6) Guð hefur ekki falið neinum nema Jesú umboð til að vera milligöngumaður milli sín og okkar. – Hebreabréfið 7:25.

Er í lagi að biðja til Guðs og líka til dýrlinga?

 Guð sagði í einu af boðorðunum tíu: „Ég, Drottinn, Guð þinn, er vandlátur Guð.“ (2. Mósebók 20:5) Að hvaða leyti er Guð „vandlátur“? Hann fer fram á algera hollustu, hann vill að tilbeiðsla okkar – þar á meðal bænir okkar – beinist eingöngu til hans. – Jesaja 48:11.

 Við sýnum Guði lítilsvirðingu með því að biðja til annarra, jafnvel þótt um dýrlinga eða heilaga engla sé að ræða. Þegar Jóhannes postuli reyndi að tilbiðja engil, stöðvaði engillinn hann og sagði: „Varastu þetta! Ég er samþjónn þinn og systkina þinna sem hafa vitnisburð Jesú. Tilbið þú Guð.“ – Opinberunarbókin 19:10.