Iina som plies, piipl mait-a kaal “di Laad Sopa” di ‘Last Supper,’ di ‘Lord’s Evening Meal,’ ar di ‘Memorial of Jesus’ death,’ bot a di sed ting wi a taak bout. Wen wi a kip di Laad Sopa, wi mek shuor se wi du wa di Baibl se wi fi du. (1 Korintiyan 11:20; Di Jamiekan Nyuu Testiment) Bot wi si se wen di ada choch dem a kip di Laad Sopa, wa dem du no bies pan wa di Baibl se at aal.

 Wi kip di Laad Sopa kaa wi waahn memba wa Jiizas did du an wi waahn gi tangks fi ou im kom gi op im laif fi wi. (Matyu 20:28; 1 Korintiyan 11:24) Som piipl fiil se di sitn dem we dem du wen dem kip di Laad Sopa miin se dem kyan get speshal blesn fram Gad, ar it a-go mek im paadn dem fi dem sin dem. Di Baibl no tiich dat. Insted-a dat, it mek wi nuo se Gad kyan onggl paadn wi fi wi sin dem wen wi shuo se wi chos iina Jiizas, an a no kaaz wi kip no speshal miitn ar eniting laka dat.​—Ruoman 3:25; 1 Jan 2:1, 2.

 Jiizas did tel im falara dem se dem fi kip di Laad Sopa, bot im neehn tel dem umoch taim a ier dem did fi du it. (Luuk 22:19) Som piipl fiil se a evri mont dem fi kip it. Ada piipl fiil se a evri wiik; som ada wan fiil se a evri die. Som piipl fiil se dem kyan nyam di bred an jringk di wain difrant difrant taim fi wan die, an som piipl fiil se dem kyan kip it eni mount a taim dem waahn fi dwi’it. a Bot si som sitn ya we wi afi tingk bout fi si umoch taim fi di ier wi fi kip di Laad Sopa.

 Jiizas did kip di fos Laad Sopa pan di diet wen di Juu piipl dem did kip di Paasuova, an a da siem die de im ded. (Matyu 26:1, 2) A no bok ops dat. Wen di Baibl taak bout ou Jiizas did gi op im laif, it se im komiin laik di biebi shiip we dem did kil fi di Paasuova. (1 Korintiyan 5:7, 8) An a wan taim fi di ier dem yuus tu kip di Paasuova. (Eksidos 12:1-6; Livitikos 23:5) Siem so, di Kristiyan dem we did de bout iina di taim wen di Baibl did a rait, a wan taim fi di ier dem did kip di Laad Sopa, an a di sed ting di Jeuova Witnis dem du tide.

 Wa Jiizas did du wen im kip di fos Laad Sopa no onggl mek wi si umoch taim a ier wi fi kip it, bot it mek wi nuo wen wi fi kip it an wa taim wi fi du it tu. A afta di son did go dong pan Naisan 14, 33 C.E. Jiizas did kip di fos Laad Sopa, bies pan di alminak we dem did yuuz iina Baibl taim. (Matyu 26:18-20, 26) An so jos laka wa di Kristiyan dem iina Baibl taim did du, a sed wie a pan da diet ya wi kip di Laad Sopa evri ier.

 Iivn duo Naisan 14, 33 C.E. a did wan Fraide, it no miin se da diet de a-go kom pan di siem die evri ier. So ou wi get di diet wen Naisan 14 a-go kom pan evri ier? Wi mats it out bies pan wa dem yuus tu du bak iina Jiizas taim, insted-a fi yuuz di alminak we di Juu piipl dem a yuuz nowadiez. b

 Wen Jiizas did staat op di fos Laad Sopa, im did yuuz bred we neehn av no yiis iina it an red wain we did lef bak fram di Paasuova. (Matyu 26:26-28) So jos laik Jiizas, wi yuuz bred we na’av no yiis nar notn els iina it an wi yuuz red wain. Wi no yuuz griep juus ar wain we dem put notn iina it fi spais it op, ar mek it swiita.

 Som a di choch dem yuuz bred wid yiis iina it. Bot nof a di taim wen di Baibl taak bout yiis, it yuuz it fi miin sitn bad ar sin. (Luuk 12:1; 1 Korintiyan 5:6-8; Gyalieshan 5:7-9) Kaaz a dat, a onggl bred we no av no yiis ar notn els iina it kyan yuuz fi miin Jiizas porfek badi. (1 Piita 2:22) Wan neda ting we som a di choch dem du we di Baibl no taak bout a dat dem yuuz griep juus insted-a wain. Dem du dis kaa dem biliiv se Kristiyan no fi jringk lika, bot a no dat di Baibl se at aal.​—1 Timoti 5:23.

 Som piipl biliiv se di bred an di wain we sorv a di Laad Sopa, som mirikl did gwaan an dem did ton iina Jiizas riil badi an im blod. Bot a no so it go at aal. Di wain an di bred riili de de fi elp wi fi memba Jiizas blod an im badi. Mek wi luk pan som tingz we iina di Baibl we mek wi se so.

•   Ef Jiizas did tel im falara dem fi jringk blod, den im wudaana go gens wa Gad laa se bout blod. (Jenisiz 9:4; Aks 15:28, 29) Bot Jiizas wuda neva eva tel nobadi fi yuuz blod iina wan wie we Gad laa se dem neehn fi dwi’it.​—Jan 8:28, 29.

•   Jiizas gi op imself laik wan sakrifais “onggl wan taim.” (Iibruu 9:25, 26) So ef a evritaim dem kip di Laad Sopa, di bred ton Jiizas flesh an di wain ton im blod, den dat wuda komiin laik se im a ded an a gi op im laif laik wan sakrifais uova an uova agen.

•   Jiizas did se wen wi a kip di Laad Sopa wi fi dwi’it fi “memba” im. Im neehn waahn wi fi de ya a gi im op laik wan sakrifais uova an uova agen.​—1 Korintiyan 11:24.

 Di piipl dem we biliiv se di bred an di wain ton iina Jiizas riil badi an im blod, dem biliiv dis kaaz a ou dem andastan som vors we de iina di Baibl. Iina som a di Baibl dem, iina Matyu 26:28 it se: “Dis a mi blod.” Iina som ada Baibl it no se, “A mi blod.” It yuuz som ada wod laik “miin,” “komiin laik,” an “stan fa.” Wen Jiizas se dis ya, im did a yuuz wan wie fi tiich we yu se sitn komiin laik wan neda sitn. Bot im neehn a se di tuu sitn dem a di sed ting.​—Matyu 13:34, 35.

 Wen di Jeuova Witnis dem kip di Laad Sopa, a onggl likl bit a piipl nyam di bred an jringk di wain. Wa mek?

 Jeuova did mek wan pramis wid di piipl dem we did iina Izrel bak iina Baibl taim. Wen Jiizas ded, im did mek wan “nyuu pramis,” ar wan nyuu diil, wid som a im falara dem. (Iibruu 8:10-13) So dat miin se dem wuda don we wid di uol pramis we Jeuova did mek wid di piipl dem we did iina Izrel. An so di piipl dem we Jiizas mek da nyuu pramis de wid, a dem nyam di bred an jringk di wain. A no evri Kristiyan a paat a da nyuu diil de, bot a onggl di wan dem “we Gad kaal” fi bi im piipl iina wan speshal wie. (Iibruu 9:15; Luuk 22:20) Dem sumadi de a-go ruul wid Jiizas iina evn, an di Baibl tel wi se a jos 144,000 piipl a-go get fi du dat.​—Luuk 22:28-30; Revilieshan 5:9, 10; 14:1, 3.

 Muos a di piipl dem we a sorv Gad di rait wie naa go ruul iina evn wid Jiizas. Dem a-go bi paat a “wan big kroud a piipl” we a-go get fi liv pan di ort fi eva. (Revilieshan 7:9, 10) Muos a wi a-go get fi liv pan di ort fi eva. So dat miin se wen wi go a di Laad Sopa, wi no jringk di wain ar nyam di bred. Bot wi stil api kaa wi get fi shuo se wi a gi tangks kaaz Jiizas did kom gi op im laif fi wi. ​—1 Jan 2:2.