• A Gad wuda pik im. “A mi put mi king fi ruul pan fi mi uoli mountn, we niem Zaiyan . . . Mi wi gi yu di konchri dem we mi av pudong fi yu, an mi a-go gi yu di uol a di ort.”​—Saam 2:6, 8.

• Di King fi Gad Kindom wuda kom fram King Dievid jinarieshan. “Wan pikni baan fi wi, yu gi wi wan bwai pikni . . . Fi im govament a-go ruul evriwe an piipl a-go liv iina piis fi eva. Im a-go ruul iina im kindom fram Dievid chuon an da kindom de naa go eva tap ruul.”​—Aizaiya 9:6, 7.

• Im wuda baan iina Betliyem. “A wich paat di Krais​—di king we Gad pramis, fi baan . . . Dem ansa se, ‘Iina Betliyem, kaaz a dat di prafit did rait dong.’”​—Matyu 2:4, 5.

• Piipl wuda ton dem bak pan im an kil im. “Piipl did iet im laik paizn an neehn tingk im wot notn. . . . Dem juk im iina im said kaaz a wi sin dem; im sofa kaaz a di rang sitn dem we wi du.”​—Aizaiya 53:3, 5.

• Gad wuda mek im kom bak alaiv an gi im wan tap-a-tap pozishan. “Gad wuda mek Krais Jiizas kom bak alaiv afta im ded. . . Gad wudn lef im iina di griev ar mek im badi ratn. . . . So Gad big op Jiizas an put im fi sidong a im rait an.”​—Aks 2:31, 33.

Wen wi luk pan it, fram man de pan di ort til nou, wi no si nobadi beta dan Jiizas we kyan ruul wi. Wi nuo dat kaa iina Luuk 1:31-33, wan ienjel did tel Jiizas mada, Mieri, se: “Di Laad Gad gweehn gi im di chuon wa im faada Dievid did av . . . an im a-go ruul fi eva an eva.”

So wich paat yu tingk im a-go ruul fram? Wi si se wen Jiizas did de pan ort, im neva staat fi ruul kaaz a evn im did fi ruul fram. So wa mek Jiizas a di bes Sumadi fi ruul uova wi? Mek wi luk pan wa im did du wen im did de pan di ort.

•   Jiizas did shuo se im kier bout piipl. Im neehn chriit som piipl beta dan som. It no mata uu dem did bi: yong, uol, man, uman, gyal, bwai, rich, puor​—evribadi. (Matyu 9:36; Maak 10:16) Iina Maak 1:40-42, wan fasi-fasi skin man beg Jiizas se: “Ef yu waahn fi kyuor mi an mek mi kliin, yu av di powa fi dwi’it.” Jiizas did fiil sari fi di man, so im iil im.

• Jiizas tiich wi di ting dem we wi fi du fi mek Gad api. Iina Matyu 6:24 im tel wi se: “Unu kyaahn sorv Gad an moni.” An yu memba di “Golden Rule?” A Jiizas tiich wi dat tu. Im se: “Unu fi chriit piipl ou unu waahn dem fi chriit unu.” (Matyu 7:12) Bot im no onggl kier bout wa yu du, im kier bout di sitn dem we yu a tingk bout iina yu aat tu. So wi afi wach di sitn dem we wi a tingk bout. (Matyu 5:28; 6:24; 7:12) So Jiizas a mek wi nuo se ef wi riili waahn fi api, wi afi lorn bout Gad an du di sitn dem we Im waahn wi fi du.​—Luuk 11:28.

• Jiizas tiich wi wa it riili miin fi lov sumadi. Di ting dem we Jiizas du an se did riili toch piipl aat. Iina Matyu 7:28, 29 it se: “Di piipl dem did shak tu ou im tiich. Kaaz Jiizas did tiich dem laik sumadi we av di rait an di powa fi du it.” Wan a di ting dem we Jiizas tiich de iina Matyu 5:44. Im se: “Lov unu enimi dem.” Im aal prie fi di piipl dem we elp kil im aaf. Ier wa im prie se iina Luuk 23:34. Im se: “Faada Gad paadn dem, dem no nuo wa dem a du.”

So wi si se Jiizas a di bes Sumadi fi ruul di worl kaaz im lov fi elp piipl an im kain tu dem. Bot a wen Jiizas a-go staat fi ruul?