Di ddunit meṛṛa, aṭas n lɣaci i gufan asmel jw.org yeṣleḥ nezzeh. Llan wid yeţceggiɛen tibṛatin ɣer lbiru amaḍlan n Inagan n Yahwa bac a ten-cekkṛen. Atnan kra n imeslayen si tebṛatin-agi i ten-ileḥqen si ccheṛ n maggu 2014 ar tura.

“Mmi-tneɣ yennum yeţţawi-d yid-es, m’ara d-yuɣal s axxam, ikeryunen, ilellucen, yerna ula d nnwaḍer n yiṭij n yemdukkal-is. Neɛreḍ acḥal d abrid a t-nɛiwen ad yefhem belli ayen akka i gxeddem ţ-ţukerḍa, uyerna tukerḍa diri-ţ. Lameɛna yugi ad yaɣ awal almi d asmi i d-nezdem si jw.org bidyu-nni yeţţusemman C’est mal de voler. Nufa belli d ţţawil igerrzen swayes ara nɛiwen akken ilaq mmi-tneɣ. Mbeɛd mi geẓra bidyu-yagi, yenna-d belli yebɣa ad yerr ayen akk i d-yewwi, axaṭer tura yefhem belli Yahwa yekṛeh tukerḍa. Asmel-agi iɛawen-aɣ s ṣṣeḥ!”—D. N., Tafriqt.

“Arraw-iw ḥemmlen ayendin asmel jw.org. Zeddmen-d ssyinna bidyuwat timecṭaḥ n wunuɣen (ţţewṣifat) yeţḥerriken, i ten-yeţɛawanen ad ttabaɛen akteṛ ayen i d-iqqar Wedlis Iqedsen ɣef weskiddeb akk-d tukerḍa. Lemmden-d daɣen aṭas n ṣṣifat yelhan ara ten-inefɛen ayen akk ara kken di ddunit, ara ten-yerren d lɛibad iɣef ara yili leţkal.”—O. W., Antiyas.

“Lliɣ ɛeggzeɣ mliḥ ad ṛuḥeɣ ɣer llakul, yerna ţxemmimeɣ a d-ttixxṛeɣ. Acu kan yiwen wass, ɣriɣ yiwen umagrad yeţţusemman “Et si j’arrêtais l’école ?” Iɛawen-iyi ad sɛuɣ tamuɣli yelhan ɣef llakul. S wayen akken i ɣriɣ, fehmeɣ belli ma ṛuḥeɣ ɣer llakul, ayagi a y-issewǧed i leɛwam i d-iteddun w’a y-iɛiwen ad uɣaleɣ ţ-ţameṭṭut iẓewren.”—N. F., Tafriqt.

“Lewṣayat i d-iţţunefken i yelmeẓyen deg wesmel-agi, ɛawnent-iyi ad qadreɣ di llakul lumuṛ n lɛali yeɛnan tikli. Ḥefḍeɣ amek ara ṛekkzeɣ ixemmimen-iw ɣef leqraya-w mebla ma dhiɣ di leḥwayeǧ nniḍen.”—G., Tafriqt.

“Teḥka-yi-d yiwet n terfiqt-iw n lxedma belli yelli-s teţwaḥqer di llakul, abeɛda sɣur yiwet n teqcict. Yelli-s-agi tetqelleq aṭas armi tuɣal teqqim acḥal n wussan neţţat tugi aţ-ţṛuḥ ɣer llakul, axaṭer tugad mliḥ. Hedṛeɣ-as i terfiqt-agi-inu n lxedma ɣef kra n tektiwin n bidyu yeţţusemman Mets un harceleur K.-O. sans utiliser les poings!, i gellan di jw.org. Teɛǧeb-as mliḥ lewṣaya-nni i d-yeqqaren belli yelha a nessexdem taḍṣa bac aţ-ţerked liḥala. Tehdeṛ akk-d yelli-s ɣef wayen i tezmer a t-texdem bac aţ-ţeḥbes temḥeqranit-nni. Ssyin, yelli-s tuɣal tṛuḥ ɣer llakul mebla tugdi. Mi i gɛedda kra n lweqt, tbeddel fell-as liḥala, yerna tin akken yellan tḥeqqer-iţ tuɣal telha.”—V. K., Luṛub n Ccerq.

“A ken-cekkṛeɣ ɣef umagrad yeţţusemman “Scarifications : pourquoi est-ce que je me coupe ?”, yellan di jw.org. Ula d nekk ţnaɣeɣ d yir ṭṭbiɛa-yagi seg waṭas aya. Ɣileɣ d nekk kan i ţ-isɛan, yerna nwiɣ ma hedṛeɣ fell-as i wiyaḍ ur iyi-fehhmen ara. Ayen i d-ḥkan kra ɣef yiman-nsen deg umagrad-agi, iɛawen-iyi aṭas. Ufiɣ belli llan wid i gzemren a yi-fehmen!”—Yiwet n tlemẓit, Usṭralya.

“S wesmel jw.org, yeţţishil-iyi akteṛ a d-afeɣ lemɛawna ɣef temsal yeɛnan ilmeẓyen. Yella yiwen umagrad i y-isemmḥen ad ɛeqleɣ leṣnaf yemxallafen n wamek i ţḥettimen imdanen wiyaḍ akken ad xedmen lɛaṛ. Fehmeɣ-d belli ula d nekk tɛedda fell-i temsalt-agi, yerna lemdeɣ amek ara ţ-qableɣ.”—T. W., Antiyas.

“Mmi ameẓyan, seg wid-nni yeţţeqliliḥen bezzaf. Zgiɣ ḥeṣleɣ amek ara xedmeɣ yid-es axaṭer ur irekked ara yerna mkul tikkelt d acu ara yexdem. Ɣef wannect-a, iwɛeṛ-aɣ mliḥ lḥal bac a nehdeṛ wway gar-aneɣ. Yiwen wass, muqleɣ aḥric yeɛnan imawlan akk-d imezwaǧen di jw.org. Ufiɣ aṭas n imagraden i d-immeslayen ɣef liḥalat icuban ɣer liḥala-inu, yerna ssefhmen-iyi-d amek ara heddṛeɣ akk-d mmi. Ula d neţţa yufa deg wesmel-agi lemɛawna i s-iwulmen. Ass-a, yeqqar-iyi-d ayen yellan deg wul-is, ama d lfuṛuḥ-is ama d iɣeblan-is.—C. B., Tafriqt.

“Asmel jw.org d ţţawil yelhan bac a nesselmed arraw-nneɣ s uqeṣṣer. Ɣef lemtel, bidyu yeţţusemman Qu’est-ce qu’un vrai ami ? tɛawen arraw-nneɣ ad fehmen d acu i ţ-ţadukli n ṣṣeḥ d wamek ara xtiṛen imdukkal ara d-yeǧǧen lateṛ yelhan deg-sen. Acḥal d abrid i d-iffeɣ umagrad di jw.org, di lweqt ideg i t-neḥwaǧ, bac a ɣ-iɛiwen a nefru kra n weɣbel i d-mmugren warraw-nneɣ. Asmel-agi d agerruj n lewṣayat.”—E. L., Luṛub.

“Nekk ţ-ţmeṭṭut-iw, seţţa iseggasen aya segmi i nezweǧ. Am imezwaǧen meṛṛa, nemxallaf deg wamek i neţmeslay, di lɛeqliya akk-d ţṛebga. Iɛǧeb-iyi abeɛda umagrad yeţţusemman “Comment mieux écouter” i ufiɣ di jw.org. Yeţţak-ed lewṣayat iṣelḥen bac a nili d wid yeţḥessisen akteṛ. Ɣriɣ-t yerna hedṛeɣ fell-as akk-d tmeṭṭut-iw. Tura, neţţeɛraḍ a netbeɛ lewṣayat-agi n lɛali.” (B. B., Antiyas)

“Ţɛacaṛeɣ Inagan n Yahwa seg ilindi, bɣiɣ seg wul-iw a ken-cekkṛeɣ ɣef wesmel-nwen. Aṭas n leḥwayeǧ i d-ḥefḍeɣ di jw.org: amek ara ţţaṭṭafeɣ deg yiman-iw, amek ara iliɣ d amezwaǧ n lɛali, d wamek ara iliɣ d ababat n lɛali. Zemreɣ a d-iniɣ s ṣṣeḥ belli asmel-agi isellek-ed zzwaǧ-iw.”—L. G., Antiyas.

“S wesmel-agi, ţḥussuɣ am wakken ɛawdeɣ-d talalit. S bidyuwat yeţwaxedmen s lluɣa n igugamen n Marikan, lemdeɣ ad ţmeslayeɣ s uwehhi xiṛ n zik. Di tazwara, ɣileɣ ur ssawaḍeɣ ara ad sɛuɣ lmeqsudat yelhan di tudert-iw. Acu kan, mi walaɣ bidyu yeţţusemman Je “vois” la Parole de Dieu dans ma langue, yeččuṛ-ed wul-iw d lfeṛḥ yerna tɛawen-iyi ad rreɣ ddehn-iw akteṛ ɣer wayen yelhan di tudert-iw.”—J. N., Tafriqt.

“Asmel jw.org yecba tawizeţ. Qeddceɣ d awaziw ɣef igugamen, abeɛda wid yellan d ilmeẓyen. Ayen akk i d-iffɣen di lluɣa n igugamen iɛawen-iyi ad ḥeṛceɣ akteṛ di lluɣa-yagi. Asmel-agi iwelleh-iyi bac ad fkeɣ lemɛawna i wid yebɣan ad wennɛen lɛalaqa-nsen d yemdukkal-nsen akk-d temɛict n twacult-nsen.”—K. J., Antiyas.

“Nekk d aderɣal yerna iɛǧeb-iyi aṭas jw.org. Ţţafeɣ deg-s lexbaṛat i gzemren ad qqimen lechuṛ bac a y-id-leḥqen lukan s tebṛatin. Asmel-agi Internet iwenneɛ tamɛict n twacult-iw yerna iɛawen-iyi akken ad ṣelḥeɣ akteṛ i wiyaḍ. Isemmeḥ-iyi daɣen a yi-d-awḍen lexbaṛat di lweqt ideg ara awḍen irfiqen-iw yeţwalin.”—C. A., Marikan n Wadda.

“Asmel jw.org d agerruj n ṣṣeḥ i wid ur nessin ara ad ɣren tira n iderɣalen neɣ i wid ur nesɛi ara s wacu ara d-aɣen tiktabin yeţwaxedmen i iderɣalen. Swayen akk yeţţuseǧǧlen i usemḥes, iderɣalen zemren ad ɛelmen s waṭas n leḥwayeǧ. Asmel-agi yeţwaxdem i medden meṛṛa, mebla maḥyaf. Yeţɛawan wid yellan seg-neɣ d iderɣalen ad ḥussen belli sɛan lqima yerna sɛan amḍiq ger medden.”—R. D., Tafriqt.

“Asmel-nwen ur yessexdam ara imeslayen i fehhmen kan lɛulama n ddin. S wayagi i gemxallaf ɣef wid n ddyanat nniḍen. Yerna ur d-iţţak ara lexbaṛat s waṭas alamma ɛerqent-aɣ maḍi. D ushil yerna yeqqar-ed kulci qbala. Ur yessexdam ara imeslayen i geẓẓayen i lefhama yerna ulac deg-s tafelsafit. Ur d-yesbeggin ara daɣen belli liman d ayen iweɛṛen. Deg wemkan n waya, yessefham-ed belli liman d ayen uɣur i zemren ad leḥqen lɛibad akken bɣun ilin.—A. G., Asya.

“D ameɣbun! Akka i lliɣ ţwaliɣ iman-iw mebla jw.org. Di ddunit-agi yellan di ṭṭlam, deg wayen yeɛnan leḥwayeǧ n ṛṛuḥ, asmel-agi icuba taftilt i zemreɣ ad ceɛleɣ. Akken kan ara kecmeɣ ɣur-es, zemreɣ ad ɣreɣ w’ad ḥesseɣ i kra n imagraden i d-yessefhamen amek i geţwali Ṛebbi xilla n temsal, yerna ţţafeɣ leǧwab i yesteqsiyen imeqranen yeɛnan tudert.”—J. C., Antiyas.

“Iɛǧeb-iyi lḥal imi i yi-d-teţţaweḍ lemɛawna di leḥwayeǧ n ṛṛuḥ ɣas akka ţɛiciɣ di tlemmast n teẓgi-yagi tameqrant n Marikan n Wadda. Lukan mačči d asmel-agi, ad ḍaɛeɣ.”—M. F., Marikan n Wadda.