Ameṣruf i leqdic-nneɣ di ddunit meṛṛa itekk-ed abeɛda si tukciwin i d-ţţaken wid yellan d Inagan n Yahwa. a Deg imukan-nneɣ n leɛbada llant tsendyaq n tukciwin, llan daɣen ţţawilat nniḍen is i nezmer a nefk tukciwin; ţţawilat-agi ţwabedren-d deg usebter yeţţusemman Efk tukci. Yezmer walbeɛḍ ad yefk tukciwin i lmend n leqdic di ddunit meṛṛa, yezmer ad iɛiwen deg umeṣruf yeɛnan tajmaɛt; yezmer daɣen ad yefk tukciwin-is i sin n lmeqsudat-agi.

 Ur nessutur ara i Inagan n Yahwa leɛcuṛ, ur nessutur ara daɣen a d-ţţaken aḥric si lexlaṣ-nsen. (2 Ikurintiyen 9:7) Deg inejmuɛen-nneɣ, ur nessutur idrimen, ur nessutur lexlaṣ akken a d-yekcem walbeɛḍ ɣer Tzeqqa n Tgelda. Uyerna, lecyux n tjemmuyaɛ-nneɣ ur ssuturen ara idrimen i weɣḍaṣ, i tenṭelt, i zzwaǧ neɣ i leqdic akk nniḍen icudden ɣer ddin. Ur d-njemmeɛ ara iṣurdiyen s lbiɛ n lmakla neɣ n wayen nniḍen, s timmetrit, s tebzert, neɣ s ţţawilat akk nniḍen. Ur d-nesskanay ara maḍi lexbaṛat yeɛnan wid i d-yeţţaken tukciwin yerna lɣaci ur zmiren ara ad ẓren d anwi-ten. (Matta 6:2-4) Ulac isebtar n udellel swayes i d-nrebbeḥ idrimen deg yesmal-nneɣ Internet neɣ di tezmamin-nneɣ.

 Mkul ccheṛ, deg inejmuɛen-nneɣ, ideg i zemren ad ḥedṛen wid akk yebɣan, tijemmuyaɛ meṛṛa ţţakent-ed ṛṛabul yeɛnan idrimen. Nessenqad tizmamin yeɛnan leḥsab n yedrimen n mkul tejmaɛt iwakken a netḥeqqeq belli idrimen-agi ţwaṣerrfen akken ilaq.​—2 Ikurintiyen 8:20, 21.

•   Tisendyaq n tukciwin: Tzemreḍ aţ-ţegreḍ idrimen neɣ ccak di tsendyaq n tukciwin yellan di Tzeɣwa n Tgelda, di tzeɣwa n inejmuɛen imeqranen, neɣ deg imukan nniḍen anda i neţnejmaɛ.

•   Tukciwin s Internet: Deg waṭas n tmura, tzemreḍ aţ-ţessexdmeḍ asebter Internet yeţţusemman “Ad fkeɣ tukci i Inagan n Yahwa” iwakken aţ-ţefkeḍ tukci-inek ama s lkarṭa n lbanka, ama s Internet, ama s ţţawil nniḍen. b Kra n Inagan n Yahwa ‘ɛezzlen’ mkul ccheṛ adrim ara fken ţ-ţukci s yiwen ger ţţawilat-agi.​—1 Ikurintiyen 16:2.

•   Tukciwin yeţţuheggan: Kra n ṣṣenf n tukciwin ilaq a ten-theggiḍ uqbel. Teḥwaǧeḍ aţ-ţeẓreḍ d acu i d-yeqqar lqanun n ccṛeɛ ɣef wayagi. Aheggi-yagi yezmer a k-yessenqes di leɣrama i teţxelliṣeḍ di tmurt-ik. Aṭas i d-yesfaydin si lexbaṛat yeɛnan tukciwin yeţţunefkayen sɣur wid yebɣan ad xedmen lxiṛ; zemren a tent-fken di leḥyat-nsen, zemren daɣen a tent-heggin w’ad ţţunefkent mbeɛd lmut-nsen. Ma tebɣiḍ aţ-ţefkeḍ kra n tukci s yiwen ger ţţawilat i d-yeţwabedren ukessar-a, aru neɣ siwel i lbiru n Inagan n Yahwa n tmurt-ik, akken a k-d-ţţunefken akteṛ n lexbaṛat:

  •   lkunt n lbanka

  •   leɛqud n ṭṭmana akk-d leɛqud ara iheggi walbeɛḍ i wasm’ara yekfu axeddim (plans de retraite)

  •   akal d wayen yeţwabnan

  •   idrimen i treḍleḍ s lfayda i kra n lbanka neɣ i kra n tkebbanit

  •   lewṣayat d lamanat

 Akken aţ-ţeẓreḍ lexbaṛat nniḍen yeɛnan amek ara tefkeḍ tukciwin deg wanda i tzedɣeḍ, wali asebter Internet yeţţusemman “Ad fkeɣ tukci i Inagan n Yahwa”.