ASMI i gezzi Sliman aɛrur-​is i leɛbada n ṣṣeḥ, Yahwa icar-​ed belli lǧens n Isṛayil ad ibḍu ɣef sin. D ayen i geḍran. Raḥabɛam, mmi-​s n Sliman, yuɣal d agellid deg wemkan n baba-​s. Raḥabɛam iqqur wul-​is. D annect-​a i gewwin ɛecṛa leɛṛac n wegdud ad nafqen (ɛaṣin) agellid-​agi. Leɛṛac-​agi uɣalen ţ-​ţagelda n Isṛayil n umalu. Sin leɛṛac nniḍen, nutni, qqimen d unṣiḥen ɣer ugellid-​a Raḥabɛam i gḥekmen ɣef ukersi n lḥekma n Dawed yellan di Yarucalim. Sin leɛṛac-​agi uɣalen ţ-​ţagelda n Yahuda i d-​iṣebḥen deg usammer.

Liḥala n snat tgeldiwin-​a tezga tcebbel di lweqt meṛṛa ideg i beddent. Ssebba tameqrant d igelliden-​nsent imɛuṣa ur nelli ara d unṣiḥen. Tagelda n Isṛayil tenṭer akteṛ n tgelda n Yahuda axaṭer, si tazwara, igelliden i ţ-​iḥekmen ţţawin agdud ad itbeɛ leɛbada n lekdeb. Ɣas akken nnbi Ilyahu d nnbi Ilicaɛ, i d-​issekren ula d lmeyytin, xedmen leɛǧayeb imeqranen, tagelda n Isṛayil ur teksan ara, teţkemmil tikli-​ines deg yir abrid. Ɣer taggara, Yahwa iɛemmed i wat Acur ad hudden tagelda n umalu.

Tagelda n Yahuda tbedd akteṛ n lqern. Lameɛna ula d neţţat iḥuza-​ţ lɛiqab n Ṛebbi. Siwa kra n igelliden n Yahuda i gḥessen i lanbeyya i d-​iceggeɛ Yahwa akken ad ɛeggnen i wegdud yerna ad ɛerḍen a t-​id-​rren s abrid-​is. Di lemtel, agellid Yucyahu ikker izzazdeg tamurt si leɛbada n lekdeb yerna iṣeggem lemqam n Yahwa. Asmi i ufan adlis n Lqanun i d-​imudd Ṛebbi sɣur Musa, yenhewwal wul n ugellid-​agi. Annect-​a yewwi-​t ad ikemmel s lḥir ccɣel-​nni i gebda.

Acu kan, igelliden i t-​id-​iḍefren ur tbiɛen ara lemtel yelhan i sen-​d-​yeǧǧa. Yahwa iɛemmed ihi i wat Babil ad ẓedmen ɣef Yahuda w’ad hudden Yarucalim d lemqam-​is. Wid imenɛen wwin-​ten d imenfiyen ɣer Babil. Ṛebbi icar-​ed belli neffu-​yagi ad yekk 70 iseggasen. Di lweqt-​agi meṛṛa, tamurt n Yahuda tuɣal d lxali. Mi d-​ilḥeq lawan, agdud iţţuserreḥ ad yuɣal ɣer tmurt-​is.

Lameɛna, ur yeţţuɣal ara ad iḥkem ugellid i d-​yekkan si lǧedra n Dawed alamma yusa-​d Wemsellek-​nni i gewɛed Ṛebbi, yeɛni Lmasiḥ. Amur ameqran n igelliden yeqqimen ɣef ukersi n lḥekma n Dawed di Yarucalim fkan-​d ţţbut belli imdanen ur nekmil ara ur zmiren ara ad ḥekmen. Ala Lmasiḥ i gzemren ad ixdem aya. Atan ihi ayɣer i yenna Yahwa i ugellid aneggaru i d-​yeflalin seg uẓar n Dawed: “Kkes taɛeṣṣabt. [...] Bla ccekk, ayagi ur yeţţili i ḥedd alamma yusa-​d win yesɛan lḥeqq yeţţalas, yerna a s-​t-​fkeɣ s ṣṣeḥ.”​—Ḥizqiyal 21:26, 27.

—Ayagi yers ɣef 1 Igelliden; 2 Igelliden; 2 Amezruy ixef wis 10 alamma d wis 36; Irmiya 25:8-11.