AMEK ara yesseḍru Yahwa lmeqsud-​is? Yiwen n ţţawil ameqran ara yessexdem ţ-​ţajmaɛt tamasiḥit tajdiṭ. Meɛna, ur tɛeṭṭel ara teţţwet, ama si zdaxel ama si beṛṛa. Imasiḥiyen n lqern amezwaru ad qqimen d unṣiḥen ɣer Ṛebbi ɣas ma ţmagaren aqhar akk-​d iɣeblan i d-​yekkan si zdaxel n tejmaɛt? D 21 n tebṛatin n Tira tiyunaniyin timasiḥiyin i sen-​yefkan lǧehd d lewṣayat i ḥwaǧen.

Amceggeɛ Bulus yura 14 si tebṛatin-​agi: seg wat Ṛuma alamma d Iɛebṛaniyen. Ismawen i sent-​iţţunefken d ismawen n wid iwumi i ţţuceggɛent, tikwal d yiwen umasiḥi, tikwal d yiwet tejmaɛt. Atnan kra n lumuṛ iɣef i sen-​yehdeṛ Bulus:

Ṣṣfawa akk-​d tikli. Wid i xeddmen zzna, wid i xeddɛen wid ukud zewǧen akk-​d wid i xeddmen ddnubat nniḍen imeqranen “ur seɛɛun ara amkan di tgelda n Sidi Ṛebbi.” (At Galasya 5:19-21; 1 At Kurintus 6:9-11) Iqeddacen n Ṛebbi ilaq ad ilin ddukklen wway gar-​asen akken yebɣu yili lǧens iseg i d-​kkan. (At Ṛuma 2:11; At Ifasus 4:1-6) Ilaq ad fken seg yiman-​nsen s lfeṛḥ akken ad ɛiwnen atmaten ukud cerken liman. (2 At Kurintus 9:7) Bulus yenha-​ten akka: “Yal ass deɛɛut ɣer Sidi Ṛebbi.” Lmumnin ţwaɛerḍen ad smiren ul-​nsen i Yahwa di tẓallit. (1 At Tiṣalunik 5:17; 2 At Tiṣalunik 3:1; At Filibus 4:6, 7) Ilaq-​asen ad ẓẓallen s liman iwakken a sen-​d-​iḥess Ṛebbi.—Iɛebṛaniyen 11:6.

Amek i tezmer twacult aţ-​ţaf iman-​is? Argaz ilaq ad iḥemmel tameṭṭut-​is am yiman-​is. Tameṭṭut ilaq aţ-​ţqader mliḥ argaz-​is. Dderya ilaq-​asen ad ḍuɛen imawlan-​nsen. Ma d imawlan, yelzem ad ssexdmen imenzayen (leqwanen) n Wedlis Iqedsen akken ad wellhen w’ad ṛebbin arraw-​nsen.—At Ifasus 5:22-6:4; At Kulus 3:18-21.

Lmeqsud n Ṛebbi. Lqanun n Musa yesbedd aṭas n ţţawilat i gḥurben ɣef wat Isṛayil yerna i ten-​iwellhen armi d asmi i d-​yusa Lmasiḥ. (At Galasya 3:24) Acu kan, imasiḥiyen ur ḥwaǧen ara ad tebɛen Lqanun-​agi akken ad ɛebden Ṛebbi. Di tebṛaţ i gura Bulus i Iɛebṛaniyen, yeɛni imasiḥiyen i d-​yekkan si laṣel n Iyahudiyen, yessefhem-​ed acu i d lmeɛna n Lqanun d wamek ara yessiweḍ Ṛebbi lmeqsud-​is s Lmasiḥ. Yessefhem-​ed belli  xilla n yeḥricen n Lqanun-​agi mettlen-​d ayen ara yeḍrun ɣer zdat. Di lemtel, iseflawen n lmal ţmettilen-​d lmut n Ɛisa yellan d asfel i gzemren a d-​tawi ssmaḥ n ddnubat. (Iɛebṛaniyen 10:1-4) S lmut n Ɛisa, Ṛebbi yemḥa leɛqed n Lqanun imi dayen ur iwulem ara.—At Kulus 2:13-17; Iɛebṛaniyen 8:13.

Amek i glaq aţ-​ţelḥu tejmaɛt. Irgazen yebɣan ad sɛun lemzeyyat di tejmaɛt ilaq ad fken azal i leqwanen n Ṛebbi yeɛnan tikli w’ad tebɛen ccuruṭ ilezmen i d-​yekkan seg Wedlis Iqedsen. (1 Timuti 3:1-10, 12, 13; Tit 1:5-9) Ilaq-​asen i iqeddacen n Yahwa Ṛebbi ad zgin deg inejmuɛen akken ad myefken afud. (Iɛebṛaniyen 10:24, 25) Inejmuɛen i leɛbada ilaq ad sɣarayen w’ad sseǧhaden imeḥdaṛ.—1 At Kurintus 14:26, 31.

Asmi i gura Bulus tabṛaţ tis snat i Timuti, yufa-​t-​id lḥal yuɣal ɣer Ṛuma. Yeţṛaǧu di lḥebs ad iţţucaṛeɛ. Siwa kra n imasiḥiyen yesɛan tirrugza ur nugad ara ad ṛuḥen a t-​id-​ẓren dinna. Bulus yeẓra belli drus n lweqt i s-​d-​yeqqimen. Daɣneţţa yenna: “Kfiɣ ccɣel-​iw yerna ṭṭfeɣ di liman ar tura, nnuɣeɣ imenɣi n tideţ armi ţ-​ţaggara.” (2 Timuti 4:7) Izmer lḥal nɣan-​t ɣef liǧal n liman-​is mi gɛedda kan kra n lweqt segmi i d-​yenna imeslayen-​a. Lameɛna tibṛatin-​is mazal ţwellihent iqeddacen n ṣṣeḥ ar ass-​a.

—Ayagi yers ɣef wat Ṛuma; 1 At Kurintus; 2 At Kurintus; At Galasya; At Ifasus; At Filibus; At Kulus; 1 At Tiṣalunik; 2 At Tiṣalunik; 1 Timuti; 2 Timuti; Tit; Filimun; Iɛebṛaniyen.