Hpungtang hpaji gaw Chyum Laika hte tup hkrak re. Chyum Laika gaw hpungtang hpaji hte seng ai laika buk n raitim, hpungtang hpaji hte seng ai lam ni hpe tsun ai shaloi, tup hkrak jaw ai. Hpungtang hpaji gaw Chyum Laika hte tup hkrak re ai lam, Chyum Laika ka ai aten na masha ni a kamsham lam gaw, Chyum Laika hta lawm ai hpungtang hpaji hte seng ai lam ni hte tsep kawp n bung ai lam nkau hpe yu yu ga.

•   Ninggawn tawa hta npawt nhpang nga ai. (Ningpawt 1:1) Moi na maumwi mausa ni hta gaw, ninggawn tawa gaw hpan da hkrum ai n re ai sha, grai shuk ai masa kaw na byin wa ai re ngu tsun ma ai. Ninggawn tawa hpe nammukdara lahkawng kaw na pru wa ai nat hpara ni hpan da ai ngu Babalon amyu masha ni kam wa ma ai. Kaga maumwi mausa ni hta gaw, ninggawn tawa gaw grai kaba ai di langai kaw na kraw wa ai ngu tsun ma ai.

•   Ninggawn tawa gaw nat hpara ni hkang ai npu hta kayin nga ai n re ai sha, shingra tara a htung tara hte maren kayin nga ai re. (Yoba 38:33; Yeremia 33:25) Masha ni gaw nat hpara ni galaw ai hku hkam nga ra nna, kalang marang shanhte zingri ai hpe pyi hkam nga ra ai ngu mungkan a maumwi mausa ni hta tsun ma ai.

•   Ginding aga hpe hpat wat hta noi da ai. (Yoba 26:7) Ginding aga gaw, pyet nna masha numraw langai (sh) nga uloi kaba, taubren kaba zawn re ai du sat langai ngai gaw hpai da ya ai ngu, moi na masha ni kam ma ai.

•   Nammukdara, pang lai hte kaga shara kaw na hka ni gaw salu rawt nna marang, hkyen, sin ni hku nna ginding aga de bai hkrat wa ai. Dai hka ni gaw, hka nu, hka shi ni hku nna bai lwi mat ai. (Yoba 36:28; Hpaji Ningli 1:7; Esaia 55:10; Amo 9:6) Ga npu na nammukdara hka ni gaw, hka nu ni hpe hka jahpring ya ai re ngu moi na Grik masha ni kam wa ma ai. Tsa ban 18 du hkra dai hpe hkap la wa ma ai.

•   Bum ni gaw tsaw mat ai, nem mat ai lam ni nga wa ai. Dai ni aten hta nga ai bum ni gaw, moi hta nammukdara npu hta nga wa ai. (Shakawn 104:6, 8) Nat hpara ni gaw, bum ni hpe ya na hkrang hku sha hpan da ai ngu ai maumwi mausa ni nga ai.

•   San seng lam gaw, hkamja lam hpe makawp maga ya ai. Moi na Israela amyu masha ni hpe jaw ai tara hta, si mang hpe lang ngut ai hpang, tinang hkum tinang jasan jaseng na matu, kapbra ana nga ai ni hpe laksan garan tawn na matu, kan sa ngut yang dai hpe atsawm bai kaput kau na matu zawn re ai tara ni lawm ai. (Jaw Jau 11:28; 13:1-5; Tara Jahprang 23:13) Dai tara hpe jaw ai aten hta, Egutu masha ni lang ai tsi amyu mi hta, masha a hkyi bang na galaw da ai.

 Chyum Laika hpe atsawm hkaja yu yang, n lawm ai hpe mu lu ai. Ndai lam hte seng nna masha law malawng chye na shut nga ai lam nkau hpe yu yu ga:

 Shut ai: Ninggawn tawa hpe, nayi hkum 24 lawm ai nhtoi 6 ya laman hpan da ai ngu Chyum Laika hta tsun da ai.

 Teng man lam: Ninggawn tawa hpe gara aten hta hpan wa ai lam Chyum Laika hta n tsun da ai. (Ningpawt 1:1) Ningpawt Ninghpang daw kaba 1 hta lawm ai hpan da ai nhtoi ni gaw, kade daram na ai hpe n tsun da ai aten ladaw langai re. Sumsing lamu hte ginding aga hpe hpan wa ai aten ladaw hpe mung, “nhtoi” ngu na tsun da ai.​—Ningpawt 2:4.

 Shut ai: Nhtoi hku nna hpun ni hpe malu masha jaw ya ai jan hpe garai n hpan shi ai aten kaw nna, hpun ni hpe shawng hpan da ai ngu Chyum Laika hta tsun da ai.​—Ningpawt 1:11, 16.

 Teng man lam: Hpun ni hpe garai n hpan shi yang, “sumsing lamu” hpe hpan da ai ngu Chyum Laika hta tsun da ai. Sumsing lamu hta nga ai shagan ni kaw na langai gaw jan re. (Ningpawt 1:1) Hpan da lam galaw ai nhtoi langai ya (sh) aten ladaw laman, jan a nhtoi gaw ginding aga ntsa hkrat wa ai. Hpan da lam galaw ai nhtoi masum ya hta, nbung san mat nna, nhtoi hku nna hpun ni hpe malu masha jaw ai mabyin a matu ram daw re ai jan nhtoi hpe lu wa ai. (Ningpawt 1:3-5, 12, 13) Dai hpang de she, ginding aga kaw nna jan hpe atsawm mu lu wa ai.​—Ningpawt 1:16.

 Shut ai: Jan gaw ginding aga hpe kawai taw ai ngu Chyum Laika hta tsun da ai.

 Teng man lam: “Ajan mung, pru pru shang shang rai nna, shi pru wa ai shara de bai nhtang gat nga ai” ngu Hpaji Ningli 1:5 hta tsun da ai. Ndai gaw, ginding aga kaw nna mu lu ai jan a shamu shamawt lam hpe madun dan ai daram sha re. Dai ni aten hta pyi, ginding aga gaw jan hpe kawai nga ai hpe chye nga ninglen, jan shang ai, jan pru ai ngu ai ga si ni hpe lang ma ai.

 Shut ai: Ginding aga gaw pyet ai ngu Chyum Laika hta tsun da ai.

 Teng man lam: Chyum Laika hta “lamu ga htum hkra” ngu ai ga si lawm ai. Dai gaw ginding aga hta jahtum nga ai (sh) pyet ai ngu ai lachyum n re ai sha, mungkan ga a shara shagu hpe tsun mayu ai re. (Kasa 1:8) Dai zawn sha, “lamu ga man mali” ngu tsun ai shaloi, ginding aga hta jut mali nga ai ngu tsun mayu ai n re. Mungkan ting hpe tsun mayu ai re.​—Esaia 11:12; Luka 13:29.