N lang wa ai. Masha, dusat hte hpun ni “amyu shagu” Karai Kasang hpan da ai ngu Chyum Laika hta asan sha tsun da ai. a (Ningpawt 1:12, 21, 25, 27; Shingran 4:11) Masha amyu yawng gaw shawng nnan na kanu yan kawa re ai Adam yan Ewa kaw na yu hkrat wa ai ngu tsun da ai. (Ningpawt 3:20; 4:1) Karai Kasang gaw sinda masa hpe lang nna hkrung mahkrung hpe hpan da ai ngu Chyum Laika hta n tsun da ai. Raitim, asak hkrung ai amyu baw langai hpra hta, n bung ai amyu hpan law law nga ai ngu nna hpung tang hpaji hte mu tam da ai lam gaw Chyum Laika hte nhtan n shai ai.

•  Sinda masa hpe Karai Kasang lang wa ai kun?

•  Sinda masa hte Chyum Laika tup hkrak re ai kun?

•  Hpun hte dusat ni a galai shai lu ai atsam gaw sinda masa rai kun?

 Karai Kasang gaw sinda masa hpe lang nna hkrung mahkrung hpe hpan ai ngu kam ai ni hta shanhte sawn la ai lam amyu myu nga ai. Laika buk langai (Encyclopædia Britannica) hku nga yang, “sinda masa ngu ai gaw shingra tara mungkan hpe Karai Kasang hkang ai shaloi lang ai ladat langai re ngu masha nkau kam ma ai.”

 Dai makam masham ni hta lawu na lam ni mung lawm ai:

•   Moi shaning law law hta hkrung mahkrung yawng gaw amyu hpan langai kaw na sha yu hkrat wa ai.

•   Asak hkrung ai baw amyu langai gaw, tsep kawp n bung ai kaga asak hkrung ai baw amyu mi de angwi ngwi galai mat ai.

•   Dai zawn galai mat ai hta madung gaw Karai Kasang a majaw re.

 Sinda masa mabyin gaw Ningpawt Ninghpang laika hta lawm ai labau tsep kawp shut nga ai ngu ai lachyum de du mat ai. Raitim, Yesu gaw Ningpawt Ninghpang laika hta lawm ai hpan da ai lam labau hpe tengman ai labau shang mabyin hku nna lakap wa ai. (Ningpawt 1:26, 27; 2:18-24; Mahte 19:4-6) Yesu mungkan ga de n du wa shi yang, sumsing lamu hta Karai Kasang hte arau nga nna “yawng mayawng” hpe hpan ai hta karum ya wa ai ngu Chyum Laika hta tsun da ai. (Yawhan 1:3) Dai majaw, Karai Kasang gaw sinda masa hpe lang nna hkrung mahkrung yawng hpe hpan da ai ngu sawn la ai lam gaw Chyum Laika hte nhtan shai nga ai.

 Amyu langai mi kaw na amyu hpan gade daram du hkra garan mat lu ai hpe gaw Chyum Laika hta n tsun da ai. Karai Kasang hpan da ai dusat ni hte hpun ni gaw, grup-yin masa hta hkan nna galai shai lu ai, asak hkrung lu ai ngu ai lam mung Chyum Laika hte nhtan n shai ai. Dai hku galai shai ai lam hpe masha nkau gaw sinda masa ngu sawn la ma tim, asak hkrung ai baw amyu nnan pru wa ai lam gaw n nga ai.