Karai Kasang A Mungdan Gaw Na A Myit Masin Hta Nga Ai Lam Rai Kun?
Chyum Laika Mahtai
N re. Karai Kasang a Mungdan gaw, Hkristan ni a myit masin hta nga ai hpe tsun mayu ai n re. a Chyum Laika hta “Sumsing lamu a mungdan” ngu tsun da ai hpe yu yang, Karai Kasang a mungdan gaja wa nga ai shara hpe chye lu ai. (Mahte 4:17) Karai Kasang a Mungdan gaw, sumsing lamu kaw nna uphkang na asuya re ngu nna Chyum Laika hta tsun da ai. Dai lam hpe hkaja yu u.
Karai Kasang a Mungdan hta Hkawhkam ni, mung masha ni, upadi hte ahkang aya ni nga ai. Karai Kasang ra sharawng ai hte maren, sumsing lamu hte ginding aga hta hpring tsup wa na matu dai ahkang aya hpe akyu jashawn na re.—Mahte 6:10; Shingran 5:10.
Karai Kasang a asuya (sh) Karai Kasang a Mungdan gaw mungkan ga hta nga ai “masha amyu baw shagu hte, ga amyu myu tsun ai ni yawng” hpe uphkang mat na re. (Daniela 7:13, 14) Uphkang na ahkang aya nga ai ni hpe, mung masha ni lata nna aya tang da ai n re ai sha, Karai Kasang nan ding tawk aya tang da ai re.—Shakawn 2:4-6; Esaia 9:7.
Yesu gaw sadi dung ai sape ni hpe, shi hte arau sumsing lamu Mungdan a “tingnyang hta dung” na ahkang lu na ngu tsun wa ai.—Luka 22:28, 30.
Karai Kasang a Mungdan hta mung hpyen ni nga ai. Kade n na yang, shanhte hpe jahten kau sana re.—Shakawn 2:1, 2, 8, 9; 110:1, 2; 1 Korinhtu 15:25, 26.
Karai Kasang a Mungdan gaw masha langai a myit masin hpe hkang da ai ngu Chyum Laika hta n tsun da ai. Raitim, “mungdan lam” (sh) “mungdan a kabu gara shiga” gaw, masha ni a myit masin hta akyu shabyin lu ai. Akyu byin ging ai ngu nna mung, Chyum Laika hta tsun da ai.—Mahte 13:19; 24:14.
“Karai Kasang a mungdan gaw, nanhte a kata e rai nga ai” ngu ai gaw hpa lachyum rai kun?
Chyum Laika nkau mi hta, Luka 17:21 hpe ga gale da ai lachyum a majaw, Mungdan nga ai shara hte seng nna, masha nkau mi shuk mat ma ai. Ga shadawn, “Karai Kasang a mungdan gaw, nanhte a kata e rai nga ai” ngu nna Chyoi Pra Ai Chyum Laika hta tsun da ai. Ndai chyum daw hpe jaw ai hku chye na lu na matu lawu, lahta ga ni hpe myit yu ra ai.
Karai Kasang a Mungdan gaw Yesu hpe nyet kau nna sat mayu ai ni a myit masin hta n nga ai
Yesu gaw, shi hpe n ra ai sha n-ga, sat na matu pyi hkyen nga ai nawku htung ning baw Hparishe ni hte ga shaga nga ai re. (Mahte 12:14; Luka 17:20) Dai majaw, baw ja ai Hparishe ni a myit masin hta Mungdan nga ai gaw byin mai na kun? Shanhte a “kata de gaw sawt ai hte tara lai ai amu hkrai hpring chyat nga” ai ngu Yesu tsun wa ai.—Mahte 23:27, 28.
Kaga Chyum Laika ni hta, Luka 17:21 hta lawm ai Yesu a ga ni hpe, ndai hku atsawm sha ga gale ma ai: “Karai Kasang a Mungdan gaw nanhte hte arau nga ai.” (Contemporary English Version) “Karai Kasang a Mungdan gaw nanhte a ka-ang e nga ai.” (New World Translation) Sumsing lamu Mungdan gaw, Hparishe ni hte “arau nga ai,” “ka-ang e nga ai” ngu tsun ai shaloi, Karai Kasang a Mungdan hta Hkawhkam byin na Yesu gaw, shanhte a man hta tsap nga ai hpe tsun mayu ai re.—Luka 1:32, 33.
a Karai Kasang a Mungdan gaw, masha ni a myit masin hta nga ai ngu amying hkam Hkristan law malawng gaw sharin ya ma ai. Ga shadawn, American, dingda hkalup hpung ni a zuphpawng langai hta Karai Kasang a mungdan ngu ai gaw, “masha langai hpra a myit masin hta nga nna, shanhte a prat hpe mung shingkang ka-up da ai” nga nna ndau shabra wa ai. Dai hte maren, shi kru lang na Wa Jau Benedit gaw, “Karai Kasang a Mungdan ngu ai gaw masha a myit masin hta nga ai” ngu shi a laika buk (Jesus of Nazareth) hta tsun da ai.
You May Also Like
ESSENTIAL BIBLE TEACHINGS
Karai A Mungdan Ngu Ai Gaw Hpa Rai Ta?
Yesu a magam hta Karai Kasang a Mungdan a lam grau nna htawn tsun wa ai. Karai Kasang a Mungdan du wa na matu tsaban law law kaw nna masha ni akyu hpyi wa ma ai.
CHYUM LAIKA GA SAN NI A MAHTAI
Karai A Mungdan Gaw Hpa Ni Galaw Ya Na Kun?
Mungkan ga hpe Karai a asuya uphkang ai shaloi, hpa ni galaw ya na hpe yu u.
CHYUM LAIKA SHARIN YA AI LAM NI
Chyum Laika Hkaja Lamang Hpe Chyam Yu U
Langai hpra san san Chyum Laika hkaja ai lamang hpe hpyi shawn u.