DAW 35

Karai A Jinghku Gara Hku Byin Lu Na Kun?

Jeremi ngu ai lasha gaw, grai sawng ai masa hpe hkrum ai shaloi she, Karai Kasang hte hku hkau ai lam gaw manu dan ai hpe chye na wa ai. Shi ndai hku tsun ai: “Asak 12 ning hta, Awa gaw anhte hpe kau da ai. Lana mi hta ngai yup-ra kaw akyu hpyi ai. Yehowa e, Awa hpe nta bai wa hkra galaw ya rit ngu hpyi wa ai.”

Jeremi gaw yawn hkyen nga ai raitim, Chyum Laika hti hpang wa ai. Shi hpe grai n-gun lu shangun ai Shakawn Kungdawn 10:14 hpe mu wa ai. Dai chyum daw hta, Yehowa hte seng nna: “Nji nmu ai wa nang hta shamyet shanat nga ai; Jahkrai nmai ni a karum ai wa, nang tai nit dai” ngu tsun da ai. Jeremi ndai hku tsun ai: “Ngai hpe karum ya na ngu nna Yehowa tsun taw ai zawn re. Yehowa gaw nye Wa re. Nye ntsa kaja htum Kawa re.”

NA A masa gaw, Jeremi hte bung tim n bung tim, Yehowa gaw nang hte jinghku hku mayu ai lam Chyum Laika hta tsun da ai. “Karai Kasang hpang de sit sa wa mu; shaloi shi nanhte hpang de sit wa na ra ai” ngu nna tsun ai. (Yaku 4:8) Dai Chyum ga ni hpe myit yu u: Nang myi hte mung n mu lu ai, hpung atsam kaba htum re ai Yehowa Karai Kasang gaw, shi hte jinghku hku na matu nang hpe saw shaga nga ai!

Raitim, Karai Kasang hte jinghku hku lu hkra, anhte maga na shakut galaw ra ai lam ni nga ai. Ga shadawn, hpun langai hkai yang dai hpun gaw, shi hkrai tu kaba wa na n re ai hpe nang chye ai. Hpun kaba wa hkra ayan hka jaw nna, atsawm gawn lajang na re. Karai Kasang hte hku hkau ai lam mung dai hte maren re. Hku hkau lam grau ngang kang hkra gara hku galaw lu ai kun?

Chyum Laika Hkaja Na Matu Ahkyak

Jinghku hku ai lam ngu ai hta, ga shaga ai hte madat ya ai lam lahkawng lawm ai. Karai Kasang hte jinghku hku ai lam mung dai hte maren re. Chyum Laika hpe hti ai, hkaja ai hku nna Karai a ga hpe madat mai ai.​—Shakawn 1:​2, 3.

Hkaja ai lam hpe nang grai sharawng na gaw n re. Ramma law law gaw manang ni hte TV yu na matu, game ginsup na matu aten jaw mayu ma ai. Raitim, Karai Kasang hte hku hkau lam ngang kang hkra galaw mayu ai nga yang shakut shaja ra ai. Karai a Mungga hpe hkaja nna, Karai Kasang ga shaga ai hpe madat ra na re.

Myit n tsang ra ai. Chyum Laika hkaja ai gaw lit li ai lam n re. Chyum Laika hkaja ai lam hpe myit n lawm yang pyi, hkaja ai hpe pyaw wa hkra galaw mai ai. Shawng nnan, Chyum Laika hkaja na matu aten masat da ra ai. Laiyit ngu ai numsha gaw: “Ngai aten chyarang langai tawn da ai. Yup rawt shagu, Chyum Laika a daw kaba langai hpe hti ai” ngu tsun ai. Shi hte n bung ai sha, asak 15 ning re ai Mariya gaw: “Shana shagu n yup shi yang Chyum Laika loi hti ai” ngu tsun ai.

Hkaja ai lamang hpang lu na matu,  laika man 292 hta lawm ai lawk hpe yu u. Karai a Mungga hpe minit 30 daram hkaja lu na matu chyarang galaw da u.

․․․․․

Chyarang galaw ai gaw, nnan hpang dat ai daram sha re. Hkaja hpang ai shaloi, Chyum Laika hpe ayan hkaja na matu n loi ai hpe chye wa na re. Asak 11 ning re ai, Jezari tsun ai hpe nang myit hkrum na re. Shi ndai hku tsun ai: “Chyum Laika kaw lawm ai lam nkau mi gaw myit lawm na zawn n re, chyena na matu mung grai myit maju jung ra ai.” Nang dai zawn hkamsha ai rai yang, asum hkum jaw. Chyum Laika hpe hkaja shagu, na a jinghku re ai Karai Kasang Yehowa tsun ai hpe, madat la na matu aten jaw nga ai re ngu myit la u. Hpang hta, Chyum Laika hpe nang grau myit lawm wa nna, hkaja mayu wa na re!

Akyu Hpyi Ai Gaw Ahkyak

Akyu hpyi ai gaw, Karai Kasang hte ga shaga ai re. Dai gaw mauhpa kumhpa langai re! Shani (sh) shana rai rai, aten shagu Karai Kasang Yehowa hpe akyu hpyi mai ai. Karai Kasang gaw galoi mung madat na matu jin jin re. Dai sha n-ga, nang tsun ai hpe mung, madat ya mayu ai. Dai majaw, Chyum Laika hta ndai hku n-gun jaw da ai: “Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu.”​—Hpilipi 4:6.

Dai chyum daw kaw tsun da ai hte maren, lam amyu myu hte seng nna Yehowa hpe tsun dan mai ai. Na a myit tsang lam ni, manghkang ni hpe mung tsun dan mai ai. Chyeju dum ai lam ni hpe mung tsun dan mai ai. Nang hpe manang ni galaw ya ai lam ni hte seng nna chyeju dum ai n re i? Manang ni hta na, grau galaw ya lu ai Yehowa hpe mung chyeju dum ga tsun mai ai.​—Shakawn 106:1.

Lawu hta, Yehowa hpe nang chyeju dum mai ai lam nkau mi hpe jahpan ka da u.

․․․․․

Kalang lang, myit ru myit tsang lam ni, hkrit hpa lam ni hte lit li ai ngu hkamsha nga na re. Shakawn Kungdawn 55:22 hta: “Na a lit Yehowa hta mara da u. Shi nang hpe shadaw na re ai: Tut nawng e ding hpring ai ni hpe, Kataw shangun nga na n rai” ngu tsun da ai.

Lawu na shara hta, akyu hpyi ai shaloi tsun shalawm mayu ai na a myit tsang lam ni hpe ka da u.

․․․․․

Tinang A Mahkrum Madup

Karai Kasang hte hku hkau ai lam zawn sha, ahkyak shatai ra ai kaga lam langai nga ai. Shakawn Kungdawn sara Dawi ndai hku ka ai: “Yehowa mai kaja nga ai gaw, chyim yu nna chye mu.” (Shakawn 34:8) Dawi gaw jahkrit shama hkrum nga ai aten hta, Shakawn Kungdawn 34 hpe ka wa ai re. Shi hpe sat mayu ai Hkawhkam Shawlu a lata kaw na hprawng nga ai majaw, grai yakhkak nga ai masa re. Dai hpang, shi gaw Hpilisti hpyen ni kaw sa shingbyi ai. Sat hkrum na masa hpe hkrum ai aten, mana masu nna hpaji rawng ai hku galaw wa ai majaw asak lawt wa ai.​—1 Samuela 21:10-​15.

Ndai zawn lawt lu ai gaw, hpaji rawng ai majaw re ngu Dawi n sawn la ai. Yehowa hpe sha shakawn wa ai. Shawng hta tsun wa ai shakawn kungdawn laika a lahta kaw, shi ndai hku ka da ai: “Ngai Yehowa hpe tam nna, shi ngai hpe htan ya ni ai; Hkrit gari ai nlang hte hta na, shi ngai hpe mawai la nngai.” (Shakawn 34:4) Dawi shi nan hkrum wa ai mahkrum madup re. Ngut nna Dawi gaw kaga masha ni hpe: “Yehowa mai kaja nga ai gaw, chyim yu nna chye mu” ngu n-gun jaw wa ai. *

Na a prat hta Yehowa lanu lahku ya ai mabyin langai ngai hpe myit yu lu na kun? Rai yang, dai hpe lawu kaw ka da u. Ka ai shaloi: Asan sha ka mai ai. Shani shagu hkamsha lu ai shaman chyeju ni, aloi sha sadi hkrup lu ai shaman chyeju ni a lam hpe myit yu u.

․․․․․

Chyum Laika lam ni hte seng nna, na a kanu kawa ni sharin ya ai mung shaman chyeju langai re. Raitim, Karai Kasang hte hku hkau lam ngang kang hkra matut galaw nga ra ai. Dai hpe n galaw shi ai nga yang, ndai daw kaw na lam ni gaw, nang galaw hpang na matu karum ya na re. Nang shakut nna galaw ai hpe Yehowa shaman chyeju jaw na re. Chyum Laika hta ndai hku tsun ai: “Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai.”​—Mahte 7:7.

VOLUME 1 KAW NA DAW 38 HTE 39 KAW NA LAM NI HPE HTI U

HPANG NA DAW HTA

Kaga masha ni hpe Karai Kasang a lam tsun dan na matu yak nga ai kun? Na a kamsham ai lam ni hte seng nna tsun dan lu na matu hkaja u.

[Lawu Matsing]

MADUNG CHYUM DAW

“Wenyi hta matsan mayan rai nga ai ni gaw, a lu ma ai.”​—Mahte 5:3.

HPAJI JAW AI LAM

Shani shagu Chyum Laika a laika man mali hpe hti ai rai yang, laning mi daram hta hti ngut mat na re.

NANG CHYE AI KUN . . . ?

Ndai laika buk hpe hti nna, Chyum Laika hpaji jaw ga ni hpe hkan sa lu ai gaw, nang hpe Yehowa lanu lahku nga ai lam madun nga ai re.​—Yawhan 6:​44.

GALAW LU NA LAM NI!

Tinang hkrai Chyum Laika hkaja ai lamang kaw na akyu grau lu hkra

Galoi mung grau na akyu hpyi lu hkra

Nu yan wa hpe san mayu ai gaw, ․․․․․

NANG GARA HKU SHADU AI KUN?

● Tinang hkrai tinang Chyum Laika hkaja ai hpe pyaw hkra gara hku galaw lu ai kun?

● N hkum tsup ai masha ni a akyu hpyi ga ni hpe Yehowa hpa majaw madat ya mayu ai kun?

● Akyu hpyi ai atsam rawt jat hkra gara hku galaw mai ai kun?

[Kadun dawk]

“Ramma aten hta nye akyu hpyi ga ni gaw grai kahtap ai. Ya gaw, shani shagu na kaja ai lam ni, n kaja ai lam ni hte seng nna akyu hpyi chye sai. Lani hte lani a masa lam ni n bung chye ai majaw, akyu hpyi ai lam ni mung n kahtap sai.”​—Ip

[Lawk]

 Chyum Laika Hpe Sawk Sagawn U

1. Hti mayu ai Chyum Laika labau langai hpe lata u. Dai hpe chye na na matu nyan hpaji lu hkra akyu hpyi u.

2. Dai labau hpe atsawm hti u. Aten la nna hti u. Hti ai lam hpe shingran yu u. Lam amyu myu hku nna galaw yu mai ai: Dai hta lawm ai ni a galaw ai lam ni hpe mu hkra, nsen ni na hkra galaw u. Sama ni lu hkra, malu masha ni a namchyim ni lu hkra galaw yu u. Dai labau hpe shingran pra pra mu hkra galaw yu u!

3. Hti ai lam hpe myit yu u. Lawu na ga san ni hpe tinang hkum tinang san yu u:

● Yehowa gaw ndai labau hpe hpa majaw Chyum Laika kaw ka da ai kun?

● Kadai ni hpe kasi la ging ai kun? Kadai ni gaw anhte a matu sadi jaw ai kasi ni rai kun?

● Ndai labau kaw na tatut sharin la lu ai lam ni gaw hpa rai kun?

● Ndai labau gaw Yehowa a lam hte shi galaw ai lam ni hte seng nna hpa sharin ya ai kun?

4. Yehowa hpe akyu kadun mi hpyi u. Chyum Laika hkaja ai shaloi nang sharin la lu ai lam hte chye wa ai lam hpe prat hta hkan sa na ngu nna akyu hpyi tsun dan u. Shi a Mungga re ai Chyoi Pra Ai Chyum Laika jaw da ai majaw, Yehowa hpe galoi mung chyeju dum nga u!

[Sumla]

“Na a mungga nye a lagaw a pyengdin hte, Nye a hkrun lam a nhtoi rai nga ai.”​—Shakawn 119:105.

[Lawk]

Ahkyak Ai Ni Hpe Shawng Galaw U

Akyu hpyi na matu n rau ai zawn byin nga ai kun? Chyum Laika hkaja na matu aten n nga ai kun? Dai gaw, nang ahkyak shatai tawn ai lam ni hta madung ai.

Ndai hku galaw chyam yu u: Pung langai hta nlung kaba ni hpe bang chyam yu u. Dai hpang, zaibru ni hpe bang u. Rai yang, pung hta nlung ni hte zaibru ni hpring nga na re.

Mi na hte maren, pung kaman kaw nlung hte zaibru hpe bai bang yu ga. Mi na hte n bung ai hku bang ga: Pung hta zaibru shawng bang nna, nlung ni hpe bai bang u. Nlung bang na matu shara n man sai n re i? Dai gaw, pung hta zaibru hpe shawng bang kau ai majaw re.

Hpa sharin la lu ai kun? Chyum Laika hta gaw: “Grau ahkyak ai lam ni hpe ginhka chye” nga na matu tsun da ai. (Hpilipi 1:​10, NWT) Kaji kajaw lam ni re ai shangwi shapyaw lam ni hpe shawng galaw ai nga yang, grau ahkyak ai wenyi lam a matu aten ngam sana n re. Hpilipi 1:10, NWT hta lawm ai hpaji jaw ga hpe hkan sa na nga yang, grau ahkyak ai Karai Kasang a Mungdan hpe shawng tawn ai lam hte shangwi shapyaw ai lam lahkawng yan hpe rap-ra hkra galaw lu na re. Dai hku galaw lu na matu gaw, pung hta gara hpe shawng bang ai ngu ai hta madung ai!

[Sumla]

Hpun langai tu kaba hkra yu lajang ra ai zawn, Karai Kasang hte hku hkau ai lam ngang kang hkra galaw ra ai lam ni mung nga