Hkaw tsun bungli hpe laning mi chyen galaw ngut ai hpang, ahkyak ai dawdan lam langai hpe Yesu jahkrat wa ra ai. Shi hte ni ni htep htep magam gun na matu kadai ni hpe lata na kun? Hkristan nawku hpung hpe woi awn na matu kadai ni hpe shaman shakyang ya na kun? Dai dawdan lam ni jahkrat lu na matu, Yehowa a lam matsun hpe Yesu ra ai. Dai majaw, bum ntsa de shi hkrai lung mat nna, shana tup akyu hpyi ai. Jahpawt daw hta, sape nkau mi hpe Yesu shaga nna, kasa 12 hpe lata wa ai. Shanhte a amying hpe nang matsing ai kun? Shanhte a amying ni gaw, Petru, Andre, Yaku, Yawhan, Hpilip, Barhtolume, Htawma, Mahte, Alhpe a kasha Yaku, Htade, Simun hte Yuda Iskarut ni rai ma ai.

Dai kasa 12 gaw Yesu hte arau bu hkawm ma ai. Shanhte hpe Yesu shaman shakyang ya ngut ai hpang, hkaw tsun na matu shanhte hkrai sa shangun ai. Nat ni hpe shaden lu na hte machyi ai ni hpe shamai ya lu na matu, shanhte hpe Yehowa atsam jaw ai.

Dai kasa 12 hpe Yesu gaw nye a jinghku ni ngu shaga nna, kam ai lam mung madun ai. Hparishe ni gaw, kasa ni hpe hpaji n chye ai ni, yu maya masha ni hku nna mu ma ai. Raitim, Yesu gaw shanhte galaw na  magam bungli a matu shaman shakyang ya ai. Yesu a matu grai ahkyak ai aten ni re ai, garai n si shi ai aten hte hkrung rawt wa ai hpang na aten ni hta, shanhte gaw Yesu hte arau nga wa ai. Shanhte kaw nna law malawng mung, Yesu zawn Galile masha ni rai ma ai. Nkau mi gaw dinghku la ni re.

Kasa ni gaw n hkum tsup ai masha ni re ai majaw shut chye ai. Kalang lang, n myit ai sha tsun shaga nna n kaja ai dawdan lam ni jahkrat ma ai. Myit n galu ai aten ni mung nga ai. Kadai gaw grau kaba ai wa re kun nga nna mung shada da dang rang hkat chye ai. Raitim, shanhte gaw Yehowa hpe tsawra ai masha kaja ni re. Hpang hta, shanhte gaw Hkristan nawku hpung a grai ahkyak ai shara hta lawm na ni byin wa na re.