Uza mare hta, Yehowa hpe nawku ai masha langai nga ai. Shi a amying gaw Yoba re. Shi gaw grai lusu nna shi a dinghku mung kaba ai. Shi gaw matsan dum chye nna, matsan mayan re ai ni, gaida jan ni, chyahkrai ma ni hpe karum ya ai. Shi gaw teng man ai hpe galaw ai majaw, galoi mung manghkang ni n nga sai kun?

Nat Satan gaw shi hpe yu nga ai lam Yoba n chye ai. Yehowa gaw Satan hpe ndai hku tsun ai: ‘Nye a mayam Yoba hpe sadi hkrup ai kun? Ga ntsa hta shi hte bung ai langai mi mung n nga ai. Nye a ga madat nna, teng man ai lam hpe galaw ai.’ Satan ndai hku bai tsun ai: ‘Teng ai. Yoba nang hpe sadi dung ai. Nang gaw shi hpe makawp maga nna shaman chyeju jaw nga ai gaw. Lamu ga hte dusat ni mung jaw da ai. Dai ni yawng hpe la kau yang, shi nang hpe nawku sana n re.’ Yehowa bai tsun ai: ‘Nang Yoba hpe chyam mai ai. Raitim, shi hpe sat na ahkang gaw n jaw ai.’ Yoba hpe chyam na matu Satan hpe hpa majaw Yehowa ahkang jaw ai kun? Yoba hkrat sum na n re ai hpe shi kam ai majaw re.

Satan gaw tsin-yam tsindam ni hkrum shangun nna Yoba hpe chyam wa ai. Shawng nnan, Yoba a dusat yamnga ni hpe lagu na matu, Sheba masha ni hpe shangun dat ai. Dai hpang Yoba a sagu ni hpe wan nat kau ya ai. Hkalde masha ni gaw, shi a gawla-uk ni hpe lagu mat wa ai. Dai dusat ni hpe yu lajang nga ai mayam ni hpe mung sat kau ya ai. Dai hpang sawng dik ai tsin-yam hkrum wa ai. Yoba a kasha yawng gaw lusha poi galaw nga ai nta hta si mat ai. Yoba gaw grai yawn hkyen wa ai. Raitim, shi gaw Yehowa hpe matut nna nawku ai.

Satan gaw Yoba hpe grau nna tsin-yam hkrum shangun mayu ai. Dai majaw, Yoba a hkum ting hpe grai machyi ai ana ni byin hkra galaw dat ai. Yoba gaw grai machyi sawng  nga ai. Ndai lam ni yawng, shi hta hpa majaw byin nga ai hpe Yoba n chye ai. Raitim, Yoba gaw matut nna Yehowa hpe nawku ai. Karai Kasang gaw ndai lam yawng hpe mu ai. Yoba a matu shi grai arawng la ai.

Dai hpang, Satan gaw Yoba hpe chyam na matu, marai masum hpe shangun dat ai. Shanhte shi hpe ndai hku tsun ai: ‘Nang hta yubak mara nga nna dai hpe makoi magap na matu shakut ai. Karai Kasang gaw nang hpe ari jaw ai re.’ Yoba bai tsun ai: ‘Shut ai lam hpa mung ngai n galaw ai.’ Dai hpang, ndai manghkang ni gaw Yehowa shabyin ai re ngu Yoba myit wa ai. Karai Kasang gaw nye a ntsa n tara ai ngu shi tsun wa ai.

Asak kaji ai Elihu gaw, tsun shaga ai ga ni hpe azim sha madat nga ai. Dai hpang shi ndai hku tsun ai: ‘Nang tsun ai lam yawng gaw shut nga ai. Yehowa gaw anhte chye na lu ai hta na grau htum ai wa re. N hkru ai lam hpe galoi mung n galaw ai. Shi gaw yawng mayawng hpe mu nna masha ni a manghkang ni hpe hparan ya ai.’

Dai hpang, Yehowa gaw Yoba hpe ga shaga ai. Yehowa ndai hku tsun ai: ‘Sumsing lamu hte ginding aga hpe ngai hpan ai shaloi nang gara kaw rai ta? Ngai n tara ai ngu nang hpa majaw tsun ai kun? Ndai lam ni hpa majaw byin nga ai hpe nang n chye ai sha tsun taw ai.’ Yoba gaw, mara hpe yin la nna ndai hku tsun ai: ‘Ngai shut sai. Ngai na a lam na yu ga ai raitim, ya gaw ngai nang hpe gaja wa chye sai. Nang hta n mai byin ai lam n nga ai. Ngai tsun wa ai lam yawng a matu, ngai hpyi nem ai.’

Chyam dinglik ai lam ngut mat ai hpang, Yehowa gaw Yoba hpe hkamja hkra bai galaw ya ai. Moi lu wa ai hta grau nna bai jaw ai. Yoba gaw ngwi pyaw ai hte asak grai galu hkra nga lu wa ai. Yoba gaw, grai yak ai aten hta pyi ga madat wa ai majaw, Yehowa gaw shaman chyeju jaw wa ai. Nang mung Yoba hpe kasi la mayu ai kun? Hpa mi hkrum wa tim Yehowa hpe matut nna nawku na kun?