Daw 14
Karai Kasang Hta Hpa Majaw Uhpung Uhpawng Langai Nga A Ta?
1. Moi na Israela masha ni hpe Karai Kasang hpa majaw hpawng de da a ta?
Karai Kasang gaw Abraham a kashu kasha ni hpe amyu langai hku hpawng de ya nna, hkan sa tara ni jaw da ai. Shi gaw dai amyu hpe Israela ngu shaga ai. Shanhte gaw, shi a ga hpe madat nna teng man ai hku nawku dawjau ma ai. (Shakawn 147:19, 20) Dai Israela masha ni kaw na, masha amyu yawng gaw akyu ara hkam la lu na re.—Ningpawt Ninghpang 22:18 hpe hti u.
Karai Kasang gaw shi a sakse tai na matu Israela masha ni hpe lata ai. Karai Kasang a tara ni hpe madat mara ai aten hta, gara hku akyu hkam sha ai hpe shanhte a labau kaw nna chye lu ai. (Tara Jahprang 4:6) Israela amyu ni kaw na, kaga amyu ni teng man ai Karai Kasang hpe chye lu na re.—Esaia 43:10, 12 hpe hti u.
2. Teng man ai Hkristan ni hpe hpa majaw hpawng de da a ta?
Hpang de gaw, Israela masha ni Karai Kasang a man hta myi man n lu mat sai. Yehowa gaw, shanhte a shara hta Hkristan hpung hte galai kau ai. (Mahte 21:43; 23:37, 38) Ya aten hta, Israela amyu ni a shara e, teng man ai Hkristan ni gaw, Karai Kasang a sakse ni hku nna Karai Kasang a amu gun nga ma ai.—Kasa 15:14, 17 hpe hti u.
Yesu gaw, masha amyu yawng hpe hkaw tsun na matu hte, shi a sape ni byin hkra galaw na matu, sape ni hpe hpawng de ya ai. (Mahte 10:7, 11; 24:14; 28:19, 20) Ya aten gaw, hkaw tsun bungli galaw na matu ahkyak dik ai aten re. Yehowa gaw, amyu baw yawng hta nga ai masha wan law law hpe, teng man ai nawku htung hta kahkyin gumdin da nga ai. (Shingran 7:9, 10) Teng man ai Hkristan ni gaw, shada da karum na matu hte, n-gun jaw na matu hpawng de da ai. Mungkan ting na, shanhte a nawku zuphpawng ni hta, sharin ya ai Chyum Laika lam matsun ni gaw, maren sha rai ma ai.—Hebre 10:24, 25 hpe hti u.
3. Ya aten na Yehowa Sakse Ni a uhpung uhpawng gaw gara hku hpang wa ai kun?
1870 ning jan aten ni kaw na, Chyum Laika hkaja ai hpung kaji langai gaw, shaning law law mat nga ai Chyum Laika teng man ai tara ni hpe, bai tam shapraw dan ai. Yesu gaw, Hkristan hpung hpe Karai Mungdan a lam hkaw tsun na matu, hpawng de da ai hpe shanhte chye wa ma ai. Dai majaw, mungkan ting hta hkaw tsun na matu, galaw hpang wa ma ai. 1931 ning hta Yehowa Sakse Ni ngu ai mying hpe hkam la ma ai.—Kasa 1:8; 2:1, 4; 5:42 hpe hti u.
4. Yehowa Sakse Ni hpe gara hku hpawng de da a ta?
Tsa ban langai hta, shara law law kaw nga ai Hkristan hpung ni hpe, uphkang hpung gaw woi awn ma ai. Dai uphkang hpung gaw Yesu hpe hpung a Baw hku nna kam sham hkap la ma ai. (Kasa 16:4, 5) Ya aten hta mung, mungkan ting na Yehowa Sakse Ni gaw, mahkrum madup nga ai hpung myitsu salang ni hte, hpawng de da ai Uphkang Hpung kaw na akyu lu la ma ai. Yehowa Sakse Ni a ginjaw garan rung ni hta, Chyum Laika hkaja na matu, madi shadaw ya ai laili laika ni hpe, ga amyu baw 600 jan hte ga gale nna dip shabra nga ai lam ni hpe, Uphkang Hpung gaw woi awn nga ai. Dai hku galaw nna Uphkang Hpung gaw, mungkan ting hta nga ai hpung 100,000 jan hpe, Chyum Laika hte n-gun jaw, lam matsun ya nga ai. Hpung langai hpra hta, atsam marai rawng ai la ni gaw, hpung myitsu salang ni hku nna amu gun nga ma ai. Shanhte gaw Karai Kasang a sagu hpung hpe tsawra myit hte yu lanu lahku nga ai.—1 Petru 5:2, 3 hpe hti u.
Yehowa Sakse Ni gaw, masha ni hpe kabu gara shiga hkaw tsun nna, Yesu a sape ni byin hkra galaw na matu hpawng de da ai. Yesu a kasa ni zawn nta langai hpang langai hkaw tsun ma ai. (Kasa 20:20) Dai hta n ga, teng man ai lam hpe tsawra nna, myit ding man ai ni hpe, Chyum Laika hkaja na matu saw shaga ma ai. Raitim, Yehowa Sakse Ni gaw uhpung langai hku sha n re. Tsawra myit rawng ai Kawa nga ai kun dinghku langai re ai. Shada da yu lanu lahku ai hpunau nauna ni mung re ai. (2 Htesaloni 1:3) Karai Kasang ra sharawng ai lam lu na matu hte, shada da karum shingtau na matu, hpawng de da ai majaw, shanhte gaw mungkan ntsa hta, ngwi pyaw dik htum kun dinghku re.—Shakawn Kungdawn 33:12; Kasa 20:35 ni hpe hti u.
