Ngwi pyaw ai dinghku byin hkra, dang di lu ai daram shakut nga tim, n myit mada ai lam ni hkrum wa yang, nanhte a ngwi pyaw lam mat mat chye ai. (Hpaji Ningli 9:11) Jamjau ai ni hkrum wa yang, hparan lu na matu Karai Kasang lajang da ya ai. Chyum ga matsun ni hpe, hkan sa na nga yang, nang hte na a dinghku gaw, grai yak ai manghkang ni hpe pyi, hparan lu na re.

CHYUM LAIKA TSUN AI LAM: “Shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu.” (1 Petru 5:7) Nanhte hkrum ai tsin-yam ni gaw, Karai a majaw n re ai hpe galoi mung dum u. (Yaku 1:13) Karai hte hku hkau na nga yang, grai kaja hkra nang hpe karum ya na re. (Esaia 41:10) Dai majaw, “nanhte a myit shi a man e hpaw dan mu.”​—⁠Shakawn 62:8.

Chyum Laika hpe shani shagu hti nna, hkaja na nga yang, myit dik lu na. “Tsin-yam tsindam amyu myu hkrum ai” shaloi, Yehowa gara hku “shangwi shapyaw” ya ai hpe, nang mu lu na. (2 Korinhtu 1:3, 4; Roma 15:4.) Yehowa gaw “chye chyang ai nyan yawng hta grau lai ai” shi a “ngwi pyaw” lam hpe, jaw na ngu nna mung, ga sadi jaw da ai.​—⁠Hpilipi 4:6, 7, 13.

NANG GALAW MAI AI LAM:

• Myit simsa na hte atsawm sumru lu na matu, Yehowa hpang akyu hpyi u

• Nang lata lu ai mu mada ai lam ni hpe bai sumru yu nna, tinang galaw lu ai kaja ai lam ni hpe lata u

CHYUM LAIKA TSUN AI LAM: “Myit gawp ai wa a myit gaw, chye chyang ai hpe mahkawng da nga ai; hpaji rawng ai ni a ana gaw, chye chyang ai lam hkan madat nga ai.” (Ga Shagawp 18:15) Nta masha langai hpra a ra rawng ai lam ni hpe chye hkra galaw u. Shanhte hte shaga u. Shanhte tsun ai hpe madat ya u.​—⁠Ga Shagawp 20:5.

Tsawra ai wa si mat yang gaw, gara hku kun? Na hkam sha ai lam hpe tsun na matu hkum kaya. Yesu pyi “myi prwi pru” wa ai. (Yawhan 11:35; Hpaji Ningli 3:4) Atsawm yup nna, hkring sa na matu mung ahkyak ai. (Marku 6:31) Dai hku galaw na nga yang, yawn hkyen lam hpe aloi sha hkam jan lu na re.

NANG GALAW MAI AI LAM:

• Tsin-yam n hkrum shi ai kaw na, kun dinghku hte ayan tsun shaga u. Shaloi she, manghkang ni hkrum wa ai ten hta, nang hpe dan dan leng leng tsun mayu wa na

• Tinang zawn byin nga ai ni hte, hkrum shaga u

CHYUM LAIKA TSUN AI LAM: “Jinghku wa gaw tut nawng tsaw ra nga nna, ru yak hkrum ai nhtoi a matu, kahpu kanau tai nga ai.” (Ga Shagawp 17:17) Manang ni gaw, nang hpe karum mayu tim, gara hku karum na hpe n chye ai mung rai na re. Dai majaw, nang ra ai hpe tsun na matu, gawng n machyi ra ai. (Ga Shagawp 12:25) Wenyi lam hta mung, Chyum Laika chye ai ni kaw na, karum hpyi mai ai. Chyum Laika kaw na, shanhte jaw ai hpaji a majaw, nang akyu lu na ra ai.​—⁠Yaku 5:14.

Karai hpe kam hpa nna, shi a ga sadi ni hpe kam ai ni hte ayan kanawn yang, nang ra ai karum shingtau hpe lu na ra ai. Masha ni hpe karum yang, tinang mung shalan shabran ai lam lu na re. Yehowa a ga sadi hte shi hpe kam sham ai lam, masha ni hpe tsun dan u. Karum shingtau ra ai ni hpe, karum ai hta amu law nga u. Nang hpe tsawra nna, lanu lahku ai ni hte ayan kanawn mazum u.​—⁠Ga Shagawp 18:1; 1 Korinhtu 15:58.

NANG GALAW MAI AI LAM:

• Nang grai hkau ai manang hte ga shaga u. Shi karum shingtau ai hpe mung hkap la u

• Nang ra ai karum shingtau hpe asan sha tsun dan u