Hpunau nauna ni tsin-yam tsindam hkrum ai shaloi, Yehowa Sakse Ni gaw, karum na matu kalang ta lajang ma ai. Dai hku shakut nna karum ya ai gaw langai hte langai jet ai tsawra myit madun taw nga ai re. (Yawhan 13:34, 35; 1 Yawhan 3:17, 18) Gara lam ni hte anhte karum ya ai kun?

Alu gumhpraw bang ai. Tsa ban langai hta Yuda mung kaw, hku hku ai shaloi Antioki na Hkristan ni gaw, Yuda kaw nga ai Hkristan ni hpe karum na matu, alu gumhpraw jaw dat ma ai. (Kasa 11:27-30) Dai hte maren, ya aten hta mung, anhte a hpunau nauna ni tsin-yam tsindam hkrum ai hpe anhte na ai shaloi, ra ai arung arai ni karum na matu, anhte alu gumhpraw bang ma ai.​—⁠2 Korinhtu 8:13-15.

Ta tut ra ai lam hpe karum ya ai. Tsin-yam hkrum ai shara hta nga ai buga hpung salang ni gaw, Yehowa Sakse yawng hpe mu hkra tam nna, shim lum na matu karum ya ai. Anhte a hkye mawai komiti gaw, lu sha, bu hpun palawng, nga shara hte tsi mawan ni garan ya na matu lajang ai. Hten run mat ai nta ni hte Nawku Htingnu ni hpe, bai gram na matu, gawgap chye ai hpunau nauna ni gaw, tinang a jarik hte sa nna karum ma ai. Anhte gaw kahkyin gumdin ai uhpung rai nna, ayan bungli arau galaw ai majaw, ra ai aten hta arai hte masha lawan wan kahkyin la lu ai. “Makam masham a dinghku na ni hpe” karum ai hta n ga, makam masham n bung ai masha ni hpe mung, dang lu ai daram karum ya ai.​—⁠Galati 6:10.

Chyum Laika hte shalan shabran ya ai. Tsin-yam hkrum ai masha ni hpe n-gun jaw ra ai. Dai aten ni hta, anhte gaw “shangwi shapyaw na lam amyu myu a Karai Kasang” Yehowa kaw na n-gun lu la ga ai. (2 Korinhtu 1:3, 4) Karai Kasang a Mungdan gaw yawn hkyen ai, ru yak jamjau ai lam yawng hpe kade n na yang, yeng seng kau ya sana ngu ai ga sadi ni hpe, myit daw myit hten nga ai ni hpe, tsun dan ma ai.​—⁠Shingran 21:4.

• Yehowa Sakse Ni gaw tsin-yam hkrum ai aten hta hpa majaw alawan karum jaw lu a ta?

• Tsin-yam hkrum ai masha ni hpe Chyum Laika hte gara hku shalan shabran ya a ta?