Sat lawat ngu ai gaw, amying hte gawng shing-yan hta n-ga lawm ai. Tsang madang, tinang hkum kam ai myit, atsam ningja ni lawm ai. Sat lawat ngu ai gaw, shinggan nsam, kata na myit nsam yawng hpe tsun mayu ai re.

Tinang nan a sat lawat nga da yang, manang shada da a hkang ai lam n hkrum ai sha, tinang a kam ai myit hte maren asak hkrung na re.

“Masha law law gaw seng ni hta madun da ai sumla ni hte bung ai. Bu hpun palawng hpe tinang hkrai n lu lata ai. Kaga ni mahtang lata ya ra ai.”​—Edarin.

“Yak hkak yang pyi jaw ai maga hta tsap ai. Masha ni a arawn alai, shanhte hte arau nga ai shaloi nye a arawn alai hpe yu nna, kadai gaw jet ai manang re ai hpe chye ginhka ai.”​—Kawtani.

Chyum Laika Npawt Tara: “Dinghta ga a myit n hkan dagraw ai sha, . . . myit nnan lu la na hku arawn asam galai nga mu.”​—Roma 12:2.

Nang galaw lu ai atsam, gawng kya ai lam, hkam la da ai lam ni hpe san jep nna, ya aten hta kaning re ai wa rai kun? Kaning re ai wa byin mayu ai kun? ngu ai hpe chye hkra shakut u. Lawu na ga san ni hte san jep yu u.

Galaw lu ai atsam: Ngai hta hpa atsam ni nga ai kun? Nye a galaw lu ai atsam gaw hpa ni kun? (Ga shadawn, ngai gaw aten hpe manu shadan chye ai kun? Hkam sharang chye ai wa kun? Bungli shakut ai wa kun? Gam jaw gam ya ai wa kun?) Kaja ai hpa lam ni galaw chye ai kun?

Tatut Galaw Mai Ai Lam: Kaja ai atsam hpe mu na matu yak nga ai kun? Kanu kawa ni shing nrai, kamhpa mai ai manang ni hpe gara kaja ai lam mu ai kun? Hpa majaw kun? ngu ai hpe san yu u.

Chyum Laika Npawt Tara: “Langai hte langai gaw tinang a bungli hpe dinglik yu u ga; shaloi shi gaw masha kaga hta n rai, tinang hta sha gumrawng shara rai na ra ai.”​—Galati 6:4.

Gawng Kya Ai Lam: Gara atsam ningja ni hta rawt jat na matu ra ai kun? Gara chyam dinglik lam ni hpe aloi sha asum jaw chye ai kun? Gara lam ni hta grau nna hkam sharang na matu ra ai kun?

Chyum Laika Npawt Tara: ‘Anhte yubak n rawng ga ai, nga nna tsun ga yang gaw, anhte hkum hpe anhte hkalem kau ga ai rai nga ai.’​—1 Yawhan 1:8.

Hkam la da ai lam: Gara tsang madang ni hpe hkan nga ai kun? Hpa majaw kun? Karai Kasang hpe kamsham ai kun? Gara lam ni a majaw Karai Kasang nga ai ngu kam ai kun? Gara lam ni hpe n tara ai lam hku nna mu mada ai kun? Hpa majaw kun? Gara htawm hpang myit mada lam nga ai kun?

Chyum Laika Npawt Tara: “Sadi sahka gaw nang hpe bau sin ai hte, Zai byeng-ya gaw nang hpe makawp maga na ra ai.”​—Ga Shagawp 2:11.