Tsang madang ngu ai gaw lata nna hkan sa ra ai tara hpe tsun ai re. Ga shadawn, lam shagu hta dingman na matu shakut nga ai kun? Rai yang, kashu kasha ni hpe mung dai tsang madang ni hpe sharin ya mayu na re.

Tsang madang ni hta, masha hkan sa tara ni lawm ai. Bungli shakut ai ni, rap ra ai ni, matsan dum chye ai ni byin na matu ahkyak ai lam sharin ya mai ai. Dai zawn lailen ni hpe kaji ai aten kaw nna shalat ai gaw kaja htum re.

Chyum Laika Npawt Tara: “Ma kaji hpe, shi hkan mai ai lam hta sharin u; Shing rai yang, dingla wa yang pyi, lam n yit na ra ai.”​—Ga Shagawp 22:6.

Ladat hpaji rawt jat nga ai prat hta, akyang lailen hte seng ai tsang madang ni ra ahkyak ai. “Phone ni hku nna n kaja ai shingkang ka-up ai lam ni aten shagu shang wa chye ai. Ma ni gaw tinang a makau hta dung nga let pyi, nse nsa sumla ni yu taw ai baw byin chye ai” nga nna, ma kanu Karin tsun dan ai.

Chyum Laika Npawt Tara: “Kung hpan ai ni gaw, kaja ai hte n kaja ai hpe ginhka lu ai atsam hpe galoi mung akyu jashawn nna, jaw ai shut ai hpe ginhka lu hkra shaman da ai.”​—Hebre 5:14, NW.

Masha hkan sa tara ni gaw ra ahkyak ai. “Chyeju hte,” “chyeju kaba sai” ngu tsun ai hta, sumnung shingdi ai, kaga wa hpe ahkyak shatai ai lam lawm ai. Dai lam ni gaw grai taw nga sai. Ya aten hta, masha ni htan phone ni hpe grau maju jung ma ai.

Chyum Laika Npawt Tara: “Masha ni nanhte hpe hkan galaw na, nanhte tsaw myit dai hte maren, nanhte mung dai zawn shanhte hpe hkan galaw mu.”​—Luka 6:31.

Akyang lailen hte seng ai tsang madang ni hpe tsun dan u. Ga shadawn, n hkungran shi yang arau nga ai gaw shut ai ngu asan sha sharin hkam la da ai ramma ni gaw, dai zawn galaw ai hpe koi yen ai ngu sawk sagawn ai ni tsun ai.

Tatut galaw mai ai lam: Kade n na shi yang byin mat ai masa hpe madung nna, tsang madang ni hpe sharin ya u. Ga shadawn, shiga ni hta dawsa ai lam hte seng nna lawm wa yang, “kaga ni hpe dai zawn masin pawt ai gaw n hkrak ai. Dai zawn hpa majaw byin mat ai ngu shadu ai kun?” ngu nna san mai ai.

“Gara gaw shut ai, gara gaw jaw ai ngu ai hpe n chye da yang, jaw ai shut ai hpe ma ni ginhka na matu grau yak mat chye ai.”​—Barandan.

Masha hkan sa tara ni hpe tsun dan u. “Chyeju hte,” “chyeju kaba sai” ngu nna chye tsun hkra, kaga ni hpe hkungga chye hkra, ma ni hpe sharin ya mai ai. “Kashu kasha ni hku nna, dinghku hta, jawng hta, jinghku ni a lapran hta nga nga ai lam chye da yang, tinang a matu hkrai n yu ai sha, masha ni ntsa grau nna tsawra myit madun chye wa na re” ngu laika buk langai (Parenting Without Borders) hta tsun da ai.

Tatut galaw mai ai lam: Kaga ni akyu a matu galaw chye hkra sharin ya lu na matu, ma ni hpe nta bungli ni galaw shangun u.

“Ma ni hku na ya aten hta, nta bungli ni chye galaw da yang, tinang hkrai nga ai shaloi yak sana n re. Lit la chye ai ni byin wa na re.”​—Tera.