CHYUM LAIKA prat hta, hkungran na matu lajang ai shaloi, num nnan a dinghku hpe hpu bang ai htung nga ai. Manu dan ai arai, dusat, gumhpraw ni hpe hpu bang mai ai. Kalang lang, bungli galaw jaw ra ai mung rai chye ai. Yaku gaw, Rahkela hpe lu na matu, sanit ning bungli galaw ya ra ai. (Nin 29:17, 18, 20) Hpa a matu hpu bang ai kun?

Chyum hpaji du Karo Me-ya ndai hku tsun ai: “Hpu bang ai ngu ai gaw, dinghku a matu akyu rawng ai num kasha a bungli galaw ya lu ai atsam sum mat ai majaw, bai wa ya ai hku nna jaw ai masa rai chye ai.” Jinghku daw wa sai nta lahkawng gaw, hpu bang ai majaw, grau hku hkau wa ai. Dai dinghku ni gaw, yakhkak hkrum ai aten hta, shada da karum ya ma ai. Dai sha n-ga, hpu bang dat ai majaw, numsha gaw, mahtan da ngut sai ngu ai lachyum re. Bai nna, kawa a makawp maga ya ai kaw na, madu wa a makawp maga ya ai kaw du sana ngu ai hpe madun ai.

Hpu bang dat ai gaw, madu jan hpe gun rai zawn, dut lu dut sha galaw ai lachyum n re. “Gumhpraw (sh) manu dan ai arai ni jaw kau ai majaw, hkungran ai hpe arung arai mari ai zawn mu hkrup chye ai. Raitim, hpu bang ai gaw, num nnan a dinghku hpe sum mat ai shabrai jaw ai lachyum re. Num langai a manu jahpu hpe jaw ai lachyum n re” ngu laika buk langai (Ancient Israel​—Its Life and Institutions) hta tsun da ai.

Ya prat, mungdan nkau hta, hpu bang ai htung naw nga ai. Hkristan kanu kawa ni hku nna, hpu hpyi ai shaloi, ram daw sha hpyi ai hku nna, shanhte a “rap ra ai myit jasat hpe masha yawng chye” shangun ging ai. (Hpl 4:5, NWT; 1 Ko 10:32, 33) Dai lam hku nna, “gumhpraw marin ai ni,” lawhpa ai ni n re ai lam shanhte madun ai. (2 Tm 3:2) Dai sha n-ga, Hkristan kanu kawa ni, manu mana hpu n hpyi ai nga yang, la nnan ni hku nna hpu bang lu ai aten du hkra, hkungran poi hpe sit kau ra ai baw n byin sai. Hpu bang lu hkra, aten hpring kan bau bungli galaw na matu, ningshawng kaw na hkring ra mat ai baw n byin sai.

Mungkan a shara nkau hta, hpu bang ai hte seng ai tara upadi ni nga ai. Dai zawn nga ai nga yang, Hkristan kanu kawa ni hku nna, dai tara hpe hkan sa ra na re. Hpa majaw kun? Chyum Laika hta, Hkristan ni gaw, Karai a tara hte n htan n shai ai nga yang, ‘daru magam ahkang aya lu ai ni a npu e taw’ nga na matu htet da ai majaw re.​—Rom 13:1; Kas 5:29.