NAWKU htung law malawng gaw, atsawm sha garam lajang da ai akyu hpyi shara ni hpe ahkyak shatai nna, akyu hpyi na aten ni hpe masat da ai hpe nang sadi hkrup na re. Anhte akyu hpyi ra na aten hte shara hpe Chyum Laika hta masat da ya ai kun?

Akyu hpyi na matu, htap htuk ai aten ni nga ai hpe Chyum Laika hta tsun da ai. Ga shadawn, lusha garai n sha shi yang akyu hpyi u ngu nna sape ni hpe Yesu sharin ya wa ai. (Luka 22:17) Yesu a sape ni gaw nawku na matu zuphpawng ai shaloi mung arau akyu hpyi wa ma ai. Dai hku nna, Yerusalem kaw nga ai nawku htingnu hte Yuda tara jawng ni hta moi kaw na galaw wa ai akyu hpyi ai lailen hpe, sape ni gaw matut galaw nga ma ai. Karai Kasang gaw nawku htingnu hpe “amyu baw shagu a matu akyu hpyi ai nta” byin na matu yaw shada wa ai.​—Marku 11:17.

Karai a mayam ni zuphpawng nna arau akyu hpyi ai shaloi, shanhte a akyu hpyi ga gaw akyu nga ai. Shanhte gaw myit hkrum mangrum nna shanhte a akyu hpyi ga gaw, Chyum Laika npawt tara hte htap htuk ai nga yang, dai akyu hpyi ga hpe Karai Kasang hkap la na re. Dai zawn akyu hpyi ga gaw, Karai Kasang galaw ya na n re ai lam ni hpe pyi galaw na matu, Karai Kasang hpe shadut ya lu ai. (Hebre 13:18, 19) Yehowa Sakse ni gaw shanhte a bat shagu na zuphpawng ni hta ayan akyu hpyi ma ai. Nang hte ni ai nawku htingnu de sa nna, akyu hpyi ga ni hpe tinang nan sa madat la na matu, kabu gara hte saw shaga dat ga ai.

Raitim, akyu hpyi na laksan aten hte shara hpe Chyum Laika hta n masat da ya ai. Karai a mayam ni gaw aten shagu, shara shagu hta akyu hpyi ai ngu nna Chyum Laika hta tsun da ai. “Akyu hpyi nga n yang gaw, na a kata gawk de shang nna, chyinghka hpe la da nhtawm, n dan n leng ai shara e, na a Nwa hpe hpyi u: n dan n leng ai shara hpe mu lu ai, na a Nwa gaw, nang hpe bai htang na rin dai” ngu nna Yesu tsun wa ai.​—Mahte 6:6.

Dai saw shaga lam gaw ra sharawng hpa re. Ninggawn tawa uphkang madu hpe aten shagu, hpa dingbai dingna n nga ai sha sit sa mai ai. Na a akyu hpyi ga hpe mung madat ya na hpe kam mai ai. Marai langai hkrai sha akyu hpyi na matu, Yesu chyahkring hkring shakut wa ai gaw mauhpa n re. Kalang mi hta, ahkyak ai dawdan lam a matu lam matsun lu hkra, Karai Kasang hpe shana tup akyu hpyi wa ai.​—Luka 6:12, 13.

Ahkyak ai dawdan lam ni jahkrat ai shaloi, hkrit tsang hpa masa ni hkrum ai shaloi akyu hpyi wa ai num, la ni a lam Chyum Laika hta lawm ai. Kalang lang nsen shapraw nna akyu hpyi ma ai. Kalang lang chyawm gaw nsen n pru ai sha hpyi ma ai. Masha hpawng hte mung, langai hkrai mung akyu hpyi ma ai. Ahkyak htum gaw shanhte akyu hpyi lu na matu sha re. “N sim n sa akyu hpyi nga” na matu mayam ni hpe Karai Kasang saw shaga da ai. (1 Htesaloni 5:17) Shi a myit ra ai lam hpe galaw ai ni a akyu hpyi ga hpe, sharawng awng let galoi mung madat ya ai. Grai kaja ai saw shaga lam re.

Tingkyeng akyu tam ai ndai mungkan hta, akyu hpyi ai a manu hpe masha law law chye mayu ma ai. ‘Akyu hpyi ai gaw nye a matu hpa akyu nga ai kun?’ ngu nna na hkum nang san ga na re.