Masha law malawng gaw Karai Kasang hpe tsawra na matu yak nga ma ai. Hpa majaw kun? Karai Kasang ngu ai gaw, shinggyim masha a nyan hte n chye na lu ai, shinggyim masha ni hpe myit n lawm ai, tara ja ai wa re ngu nna shadu taw nga ai majaw re. Masha nkau tsun ai ga hpe dinglik yu ga:

• “Karum shingtau lu na matu Karai Kasang hpe akyu hpyi tim, anhte hte grai tsan ai ngu nna hkamsha ai. Ngai na matu Karai Kasang ngu ai gaw, kaja wa n nga ai wa she re.”—Itali Mung kaw na Marko.

• “Karai Kasang hpe ngai gaja wa nawku mayu ai. Raitim, shi hte grai tsan ai zawn sha hkamsha ai. Mara shagun na matu sha yu taw ai Karai Kasang ngu na shadu ai. Shi hta tsawra matsan dum myit nga ai ngu ai hpe kam na matu pyi yak ai.”—Gwatimala Mung kaw na Rawsa.

• “Ngai ma prat shaloi hta, Karai Kasang gaw nye a mara ni hpe tam nna, ari jaw na matu yu nga ai ngu nna kam wa ai. Hpang hta gaw, Karai Kasang gaw anhte hpe myit n lawm ai ngu na hkamsha wa ai. Shi gaw tinang a lawu na masha ni a lam hpe yu lajang ya tim, shanhte hpe gaja wa gaw myit n lawm ai hkring mang daju hte bung ai.”—Kaneda Mung kaw na Remawdi.

Nang gaw gara hku shadu ai kun? Karai Kasang hpe tsawra na matu mai byin na kun? Hkristan law law gaw dai ga san hpe san wa ai tsaban shaning grai na sai. Asak ram sai ni hte Hkristan amying hkam ai masha law malawng gaw Chyahtum Chyalai n-gun rawng ai Karai Kasang hpe akyu n hpyi ma ai. Hpa majaw kun? Karai Kasang hpe hkrit ai majaw re. Labau sawk sagawn ai hpaji du Wi Durant gaw ndai hku tsun ai: “Grit nem nna mara kap ai masha langai gaw, hkrit kajawng hpa re nna shinggyim masha ni hpe n lanu lahku ai Karai Kasang hpe, gara hku nna akyu hpyi na ma.”

Karai Kasang hpe “hkrit kajawng hpa rai nna shinggyim masha ni hpe n lanu lahku ai” wa hku nna hpa majaw mu mada ma ai kun? Karai Kasang hte seng nna Chyum Laika hta teng sha hpa tsun da ai kun? Karai Kasang hte seng ai teng man ai lam hpe chye wa yang, shi hpe tsawra lu na kun?