U.S.A mungdan, Pennsylvania mungdaw, upadi a ahkang hte Sin Langchyi Chyum Laika Hte Garan Laika Hpung (Watch Tower Bible and Tract Society of Pennsylvania) hpe akyu amyat nla ai hpung hku nna 1884 shaning hta hpawng de da ai. Yehowa Sakse Ni gaw, shanhte a mungkan ting hkaw tsun bungli hpe karum madi shadaw na matu, ndai hpung hpe jailang ma ai. Dai hta Chyum Laika hte Chyum Laika hpe madung tawn ai laili laika ni hpe dip shabra ai mung lawm ai.

 Ga shaka laika hta lawm ai hte maren, tara shang hpung a yaw shada lam gaw, “nawku htung, hpaji hparat, ra rawng ai ni hpe karum ya” na matu re. Grau nna gaw, “Yesu Hkristu uphkang ai Karai Kasang A Mungdan a lam hkaw tsun na hte sharin achyin na matu” re. Hpung kaw na saw shaga yang she hpung shang masha mai byin ai. Alu kade lu jaw ai ngu yu nna saw shaga ai nre. Hpung shang masha ni hte matsun du (director) ni gaw Yehowa Sakse Ni A Uphkang Hpung hpe madi shadaw ya ai.

 Yehowa Sakse Ni gaw, Watch Tower Bible and Tract Society of Pennsylvania, mying hta n-ga tara shang mying law law hpe mungdan shagu hta jailang nga ai. Dai hta “Sin Langchyi [Watch Tower (sh) Watchtower]” ngu ai ni lawm ai.

 Hpung nnan de hpang ai kaw na, dai zawn tara shang mying ni hpe jailang nna anhte a bungli ni hpe ngut kre hkra galaw lu wa sai.

•   Laika ka lajang ai hte dip shabra ai. Chyum Laika hpe wan 220, Chyum Laika hpe madung tawn ai laili laika ni hpe ga amyu baw 700 jan hte wan 40000 daram, anhte ni dip shabra ngut sai. Jw.org website a majaw, masha ni Chyum Laika hpe ga amyu baw 120 jan hte manu jahpu njaw ra ai sha online hta hti mai sai. “Karai Kasang A Mungdan Gaw Hpa Rai Ta” ngu ai zawn Chyum Laika ga san ni a mahtai ni hpe pyi chye wa ma sai.

•   Hpaji hparat. Chyum Laika lam matsun ni lu la na matu, Chyum Jawng law law hpe anhte ni woi awn nna galaw ai. Ga shadawn, 1943 shaning kaw na hpang ai Gilead Sin Langchyi Chyum Jawng a sharin achyin ya ai lam ni a majaw, Yehowa Sakse 8,000 jan akyu grai lu la ma sai. Ndai jawng a majaw, shanhte gaw sasana magam gun lu nna, mungkan ting hkaw tsun bungli a matu karum madi shadaw ya lu ai. Ngut nna, masha wan law law gaw, bat shagu galaw ai zuphpawng ni kaw na lam matsun ni lu la nga ai. Dai hta Yehowa Sakse nre ni mung lawm nga ai. Anhte ni gaw laika n chye ai ni a matu, sharin laika buk hpe ga amyu 120 jan hte dip shapraw nna, laika chye wa hkra sharin ya nga ai.

•   Ra rawng ai ni hpe karum ya. 1994 ning, Rwanda mungdan hta amyu htum mat hkra sak ai majan, 2010 ning Haiti hta byin mat wa ai nnang nawn zawn re ai, tsin-yam tsindam hkrum ai ni hpe ra rawng ai arung arai ni (material relief) karum ya wa ai.

 Tara shang hpawng de da ai hpung, tara shang mying ni a majaw anhte a bungli grai awng dang wa sai. Raitim, anhte a bungli awng dang ai gaw dai ni hta sha madung ai nre. Hkristan langai hpra gaw, kabu gara shiga hpe hkaw tsun ai hte sharin achyin ya ra ai ngu Karai jaw da ai lit hpe ngut kre hkra gun hpai nga ma ai. (Mahte 24:14; 28:19, 20) Karai Kasang gaw anhte a bungli hpe karum ya nga ai. Matut nna mung ndai lam yawng hpe awng dang hkra karum ya na hpe anhte kam ai.​—1 Korinhtu 3:6, 7.