Kwa ĩvinda ya myaka 30 mĩvĩtu, Ngũsĩ sya Yeova nthĩ ya Eritrea nĩsyĩthĩĩtwe iyũmĩĩsya kũthĩnwʼa mũno. Kuma mwaka wa 1994, ana-a-asa na eĩtu-a-asa mbee wa 270 nĩmovetwe mate na mavĩtyo na makathĩnwʼa mũno nũndũ wa mũĩkĩĩo woo. Yu tũĩ, 64 me yela, na vai ũmwe woo waasilĩlwa kana akethĩwa na ĩvĩtyo.

Matukũ 25 mwei wa 10, 1994, mũsumbĩ wa Eritrea, Isaias Afwerki, nĩwaumisye mwĩao Ngũsĩ sya Yeova syonthe ila isyaĩwe Eritrea ivenwe ũthasyo wa kwĩthĩwa syĩ laiaa sya nthĩ ĩsu. Eekie ũu nũndũ ana-a-asa maitũ nĩmaleile kwĩlikya maũndũnĩ ma siasa kana itanĩ. O na kau Ngũsĩ sya Yeova nthĩ ya Eritrea no syavĩngawa mbee wa mwaka wa 1994, mwĩao ũsu waumiwʼe nĩ mũsumbĩ nĩwatumie syambĩĩa kũthĩnwʼa ĩ ya mũno. Nũndũ wa ũu, ana-a-asa na eĩtu-a-asa maana maingĩ nĩmakwatĩtwe, makovwa yela, na nĩmethĩĩtwe maithĩnwʼa mũno kwa ĩvinda ya myaka 30.

Kũthawʼa kwa Ngũsĩ 32 kuma yela katĩ wa mwei wa 12, 2020 na mwei wa 2, 2021, nĩkwatumie maũndũ moneka ta matonya kũseũva nthĩ ya Eritrea. Ĩndĩ ũu tiwʼo kweethĩiwe. Ngũsĩ mbee wa 20 nĩsyaendeeie kwĩkala yela, na ana-a-asa na eĩtu-a-asa maitũ maendeea kũkwatwa. Na ĩndĩ, mũthyanĩ wa mwei wa 9, 2024 asikalĩ nĩmavithũkĩie mũsyĩ ũmwe na makwata andũ 25 ala moombanĩte kwa nzĩa ya mũuo mayĩmanyĩsya Mbivilia. Katĩ wa ala makwatiwe, maĩ andũ atatũ me na ũkũũ wa myaka mbee wa 80, mwĩĩtu-a-asa waĩ na ĩvu ya myei ta thanthatũ, na syana ilĩ nini. Ĩtina syana isu nĩsyathaiwʼe, namo andũ ala angĩ mathamĩĩwʼa yelanĩ ya Mai Serwa.

Ala movetwe nũndũ wa mũĩkĩĩo woo nthĩ ya Eritrea nĩmakuawa naĩ mũno na mekalaa kũndũ kũthũku. Mwana-a-asa Negede Teklemariam, ũla woovetwe kwa ĩvinda ya myaka 26 aisye ũũ: “Nĩtwoovawa na makanda, tũkomĩĩsya kũkuwa naĩ nĩ asungi, tũkavũwa mũno, na tũkathũkũmĩthwʼa wĩa mũmũ . . . Meethĩawa o meteele . . . tũkwʼe.” Ũndũ wa kũmakya nĩ kana, ana-a-asa 4 nĩmakwʼĩĩe yela nũndũ wa maũndũ momũ ala mamakwatie, na angĩ 3 nĩmakwie kavinda kakuvĩ ĩtina wa kũthawʼa.

O namo ana-a-asa na eĩtu-a-asa maitũ ala mate ove nĩmakomanaa na mawetu maingĩ. Kwa ngelekanyʼo, aingĩ nĩmaĩtye mawĩa moo, mĩsyĩ yoo, na ũthasyo wa kũtembea, nũndũ wa kwĩthĩwa mate na mavalũa ma kwonanyʼa kana mo nĩ laiaa ma nthĩ ĩsu. Amwe nĩmaumangawa na makavithũkĩwa nĩ atũi moo na anene ma silikalĩ nũndũ wa kũlea kũkwata mbau ngalĩko o na ĩmwe. Kwongela kĩu, amũika ala Ngũsĩ maitonya kũsoma makamina sukulu nũndũ silikalĩ yendaa amanyĩwʼa onthe ala mekwenda kũmina sukulu meyĩandĩkĩthye itanĩ nĩ kana mamanyĩwʼe kaũ.

Nĩtũũmĩaa mũno twoona ana-a-asa maitũ maendeee kũthĩnwʼa nthĩ ya Eritrea. O na ũu wĩ o vo, tũi na nzika kana Yeova nũlilikanaa ana-a-asa na eĩtu-a-asa onthe nthĩ ya Eritrea ala maendeee kwĩthĩwa me alũmu kwa myaka mingĩ o na mavĩngwa. Ithyonthe twĩ ana-a-asa me ngwatanĩo, twĩvoya Yeova aendeee kũmalũlũmĩĩlya o maendeee kũmĩĩsya “motato mailye ta mwaki” ma mũĩkĩĩo woo.—1 Vetelo 4:12-14.