O tondũ vawetetwe Matukũ 12, Mwei wa 5, 2023, kĩlungunĩ kya “maũvoo” kĩla kĩthĩawa nthĩnĩ wa jw.org, kaũ mũvyũ ũla weethĩiwe katĩ wa ikundi ilĩ ila syokitaa Khartoum, taoni ĩla nene ya Sudan, nĩwatumie andũ ngili mbingĩ moawa na angĩ maũmĩwʼa. Ana-a-asa na eĩtu-a-asa amwe ala mekalaa taoninĩ ya Khartoum kana vakuvĩ nayo nĩmatwie kũsemba maume vau. Yĩla makĩĩte, nĩmatetheeiwʼe na meekĩwa vinya nĩ mavuku maeleetye Mbivilia na maũmbano ma Kĩklĩsto.

Kwa ngelekanyʼo, mĩthenya mĩvũthũ kaũ ũsu wambĩĩa, mwĩĩtu-a-asa vainia wĩtawa Ajuja wĩ na myaka 23, kuma Khartoum, nĩwalikile ũmbanonĩ atũmĩĩte vulongulamu ya kũneena andũ menene, vala kĩlungu kya Mũsyaĩĩsya kĩ na kyongo “Sũvĩai Ilĩko Syenyu, Ĩkalai mwĩ Metho!” kyaneeneiwe. Aĩtye: “Kwĩmanyĩsya kĩlungu kĩu nĩkwandilikanilye kana maũndũ ala maendeee kwĩkĩka nĩmathaniwe Mbivilianĩ. Vaiĩ ũndũ ũngĩ ta ũsu waĩ ũtonya kũmbĩkĩa vinya ĩvindanĩ yĩu. Ĩndĩ yĩla maũndũ maendeeie kũthũkĩĩa, Ajuja nĩwatwie kuma taoninĩ ĩsu. Aĩtye: “Nĩendeee na savalĩ yakwa, nĩnakwatie maũndũ angĩ matonya kũmbĩkĩa vinya kwa kwĩthukĩĩsya mbathi sitũ na syĩndũ ingĩ ilekotiĩtwe. Naendeee kũmũvoya Yeova atũtetheesye tũvike twĩ aima.” Ajuja nĩwavikie e mũima na athokwʼa na ũtanu nĩ ana-a-asa na eĩtu-a-asa ala me Kassala.

Eli, ũla wĩ na myaka 24, wĩthĩawa e mũtũmĩa wa kĩkundi na vainia, kuma El Haj Yousif, ĩla yĩ vakuvĩ na ithokoo ila syĩ Khartoum, nĩwakĩĩie taoni ya Kosti, ĩla yĩ kĩlomita 330 kuma vau. Avika nĩwathokiwʼe nĩ ana-a-asa na eĩtu-a-asa na mamũmanthĩa lĩu na vandũ va kũkoma. Ĩtina, Eli nĩwamanyie kana eekĩiwe vinya nĩ maandĩko ma kĩla mũthenya ala wasomie kyumwanĩ kĩla wakĩĩte. Kwa ngelekanyʼo, Savuli 91:2 nĩyamũlilikanilye Eli ĩũlũ wa vata wa kũmũtwʼĩkĩthya Yeova wĩvitho na ngome yake. Eli aĩtye atĩĩ: “Vai vandũ ũtonya kũkwata mũuo wa wʼo nthĩnĩ wa nthĩ ĩno yusĩe mathĩna, na atongoi ma siasa na ma ita maitonya kũtũminĩa mathĩna ala twĩ namo. Ũsumbĩ wa Ngai ũla ũkatũvetangĩa mathĩna onthe nĩwʼo wĩkwatyo wa wʼo.”

Tia na mũka Julia, nĩ mavainia kuma kĩsionĩ kya Omdurman, kĩla o nakyo kĩ vakuvĩ na Khartoum. Yĩla ithokoo syaendeeie na kũvyũvĩĩa, nĩmalilikanile kĩlungu kyaĩ kĩnaumwʼa o mĩtũkĩ ĩkasetinĩ ya Mũsyaĩĩsya, kĩla kyeekĩie vinya Aklĩsto matate kwĩanĩsya maũndũ ala matwʼĩte kwĩka. Yĩla Tia na Julia moonie kana ithokoo syaendeee kũthũkĩĩa taoninĩ yoo, nĩmatwie kana nĩ waĩlu mose ĩtambya na mĩtũkĩ na mayuma vau. Ĩtina wa mavika nesa kĩsionĩ kĩngĩ kĩla mathamĩĩie na makethwʼa na ũtanu nĩ ana-a-asa na eĩtu-a-asa ma kũu, nĩmeewie mũyo mũno nũndũ wa ũvoo ũla masomete ĩkasetinĩ ya Mũsyaĩĩsya. Julia aĩtye atĩĩ: “Twĩ na ũtanu mwingĩ kwĩthĩwa twĩ ũseũvyonĩ ũũ wusũĩte wendo. Nĩ wʼo kana kwʼoko kwa Yeova ti kũkuvĩvye ũndũ kũtatonya kũtangĩĩa.”

Ũndũ wa kwendeesya nĩ kana, ana-a-asa na eĩtu-a-asa onthe ala mawetetwe kĩlungunĩ kĩĩ nĩmambĩlĩĩilye na mĩtũkĩ kwĩka maũndũ ma kĩ-veva mavika isionĩ ingĩ. Maũndũ asu nĩ vamwe na kũthi maũmbanonĩ na kumya maelesyo, kũtavanyʼa, o na kwambĩĩsya kwĩmanyĩsya Mbivilia na andũ. Maũndũ asu onthe ma kĩ-veva o vamwe na kwĩthĩwa na ndũũ ngamu na ana-a-asa na eĩtu-a-asa ikundinĩ nzaũ nĩkwamekĩie vinya na kwatuma makwata ũtanu.

Nĩ ũndũ wa kwĩkĩa vinya mũno kwona ana-a-asa na eĩtu-a-asa maitũ nthĩ ya Sudan maendeee kũmwĩkwatya Yeova na Maandĩko nĩ kenda makiakiwʼe na mayĩthĩwa na wĩkwatyo.—Alomi 15:4, 5.