Ethĩwa wĩ ũmwe wa Ngũsĩ sya Yeova, kwa kũna visa asikalĩ maiũtetheesya kũthi nyũmba kwa nyũmba nĩ kana ũtavanyʼe ũvoo mũseo! Joseph nĩweeyoneie ũndũ ta ũsu e Micronesia mwaka wa 2017. E na mwana-a-asa ũngĩ ũmwe na eĩtu-a-asa elĩ nĩmaendie kambeininĩ ya mwanya ya kũtavanyʼa ithamanĩ syĩ nthĩnĩ mũno Micronesia.

 Me ana, nĩmavikie kathamanĩ kanini kaĩ na andũ ta 600. Mavika ũtee wa ũkanga, makomanie na mũnene ũmwe wa silikalĩ ũla waũngamĩe kĩthama kĩu (mayor). Joseph aielesya kĩla kyaendeeie aĩtye: “Mũnene ũsu aisye nũkũnengane ngalĩ ya volisi ĩtũtwae nyũmba syonthe ila syaĩ kathamanĩ kau. Ũndũ ũsu watũsengʼisye mũno, ĩndĩ twatũmĩa ũĩ na wĩnyivyo mwingĩ kũlea. Twendaa kũthi nyũmba kwa nyũmba o ũndũ twĩkaa yĩla tũũtavanyʼa.”

 Kwoou atavanyʼa asu nĩmambĩĩie kũtembea na maaũ meyũmbanĩtye kũneena na andũ aingĩ ũndũ matonya. Maĩtye: “Andũ matũthokasya, makatwĩthukĩĩsya nesa, na nĩmendeeawʼa mũno nĩ maũndũ ala twamamanyĩasya. Na nũndũ wa ũu, twekalaa nyũmba ĩmwe ĩvinda yĩasa kũvĩta ũndũ twasũanĩaa.”

 Ĩ ya wĩoo mũthenya o ũsu, ngalĩ ya volisi yavĩtũkĩie Joseph nzĩanĩ mavinda elĩ na ĩvinda ya katatũ yaũngama. Asikalĩ asu mamũkũlilye Joseph kana no ende makamũtwaa mĩsyĩ ĩla watielye kũtavanyʼa kĩsionĩ kĩu. Joseph aĩtye: “Nameie aiee, ĩndĩ ĩvindanĩ yĩĩ mayaaĩtĩkĩlana nakwa. Mambĩie, ‘Vatiele kavinda kanini ume kĩthamanĩ kĩĩ na ve o nyũmba ũtanesa kũthi, eka tũũtwae.’ Mwa ndyaĩ nĩsa kũlea nũndũ kũneena wʼo, nĩnatielye nyũmba siana ũna. Twathengeea nyũmba, asikalĩ asu nĩmandavasya ĩsyĩtwa ya mwene vau na maimbĩa mũomo walea kũvingũwa nakũna oti, nĩmatavye makũne oni [horn] ya ngalĩ yoo nĩ kana ene mũsyĩ mewʼe.”

 Joseph aendeee kwasya: “Ũtethyo ũsu wa asikalĩ nĩwatethisye vanene mũno nginya twathi nyũmba syonthe mũthenya ũsu. Twanenganie mavuku maingĩ mũno na twavanga na andũ ala mendeeiwʼe twĩĩsa kũmasyokea ĩvinda yĩngĩ.”

 Asikalĩ asu meeie Joseph atĩĩ: “Nĩtwatanĩa mũno kũnyaĩĩkya ũvoo mũseo.” Yĩla atavanyʼa mambĩĩie kwĩnũka syũa yathũa, asikalĩ ala maĩ movisinĩ moo ũtee wa ũkanga mamokĩlĩilye moko me atanu mũno makwete mavuku ala matiĩwe.