Ngũsĩ sya Yeova nthĩ ya Bulgaria nĩsyĩkĩĩte kĩthito imanyĩsye angĩ ũwʼo ĩũlũ wa Ngai na Ndeto yake, Mbivilia. Na kuma mwaka wa 2000, Ngũsĩ ingĩ maana maingĩ nithamĩĩe Bulgaria nĩ kana itetheesye wĩanĩ ũsu. Nĩ mawetu meva ikomanaa namo yĩla syathamĩĩa nthĩ ngeni ikatavanyʼe? Na nĩ moathimo meva ikwataa? Ekai twone ũndũ amwe mathamĩĩe nthĩ ĩsu maĩtye.

 Darren, ũla wekalaa England, aisye: “Kuma tene twaĩ na mũvango wa kũtetheesya kĩsionĩ kĩ na vata mũnene wa atavanyʼa nthĩ ĩngĩ. Ĩtina wa kũtwaa Dawn, nĩtwathamĩĩie London nĩ kana tũtetheesye kũmanyĩsya andũ ala maneenaa kĩthyomo kya Russian Mbivilia. Mavinda meana ũna nĩtweekie mĩvango ya kũthamĩĩa nthĩ ĩngĩ, ĩndĩ nũndũ wa itumi imwe, tũyaavota kũmĩanĩsya. Twavikie vandũ weethĩa twĩĩwʼa kũkĩlya moko, ĩndĩ mũnyanyae ũmwe witũ nĩwatũtetheeisye kwona kana maũndũ maitũ nĩmaalyũkĩte, na kwoou twaĩ tũtonya kwĩanĩsya mũvango witũ.” Darren na Dawn nĩmambĩĩie kũmantha nthĩ matonya kũthamĩĩa yĩ na vata mũnene wa alimũ ma Mbivilia. Twĩ mwakanĩ wa 2011, nĩmathamĩĩie Bulgaria.

 Amwe mbeenĩ mataĩ na mũvango wa kũthamĩĩa nthĩ ĩngĩ nĩmeekĩiwe vinya nĩ ngelekanyʼo sya ala mathamĩĩte nthĩ ingĩ na makatanĩa. Kwa ngelekanyʼo, Giada, ũla wekalaa na mũũme, Luca, nthĩ ya Italy aisye: “Nĩnakomanie na Ngũsĩ syĩ kĩthito ila syatanĩaa kũtavanyʼa South America na Africa. Nĩnakiitiwe mũno nĩ kwona ũtanu ũla maĩ nawʼo na maũndũ ala mangeleisye. Kĩu nĩkyatumie nĩvĩndũa mĩvango ya kĩ-veva ĩla naĩ nayo.”

 Tomasz na Veronika vamwe na syana syoo ilĩ, Klara na Mathias, nĩmaumie Czech Republic mathamĩĩa Bulgaria mwakanĩ wa 2015. Nĩ kyaũ kyamathangaaisye kwĩka ũu? Tomasz aĩtye: “Nĩtwasũanĩie ngelekanyʼo sya amwe meekĩte ũu, na amwe maĩ andũ maitũ ma mũsyĩ, na ĩndĩ twavindĩĩsya maũndũ amwe meyoneete. Nĩtwakiitiwe mũno nĩ ũtanu ũla maĩ nawʼo, na nĩtwaneeneaa ũndũ ũsu twĩ mũsyĩ.” Yu Tomasz na mũsyĩ wake nĩmatanĩaa kũtavanyʼa taoninĩ ya Montana, ĩla yĩ Bulgaria.

 Ũngĩ wathamĩĩie Bulgaria nĩ Linda. Aisye: “Myaka mingĩ mĩvĩtu, nĩnaendie Ecuador na nakomana na amwe mathamĩĩe kũu nĩ kana matavanyʼe. Kĩu nĩkyatumie nĩsũanĩa kana no kwĩthwa mũthenya ũmwe o nakwa ngathamĩĩa kũla kwĩ na vata mũnene wa atavanyʼa.” O nake Petteri na mũka, Nadja, kuma Finland, nĩmavindĩĩisye ngelekanyʼo sya angĩ. Maisye: “Kĩkundinĩ kya mũsyĩ twaĩ na atavanyʼa amwe maĩ na ũtũĩka ala mathamĩĩte kũndũ kũngĩ makatetheesye andũ kĩ-veva. Nĩmakothaa kũelesya me atanu myaka ĩla matũmĩie ũthũkũminĩ ũsu. O na maasya kana myaka ĩsu nĩyo yaĩ mĩseo vyũ thayũnĩ woo.”

 Kwĩvanga nesa nĩ kwa vata mũno kwa ala mekwenda kũthamĩĩa nthĩ ingĩ makatetheesye. (Luka 14:28-30) Nele, ũla wekalaa Belgium, aisye: “Yĩla nambĩĩie kũsũanĩa kwa ũito ĩũlũ wa kũthi kũtetheesya nthĩ ĩngĩ, nĩnavoyie na namantha ilungu syĩ mavukunĩ maitũ ineeneete ũndũ ũsu. Nĩnaisomie na natata kũmanya nĩ kyaũ naaĩle kwĩka nĩthĩwe nĩyũmbanĩtye.”

 Kristian na Irmina, maumĩte Poland, na mekalĩte Bulgaria mbee wa myaka kenda. Nĩmawetete ũndũ matethekie nĩ kũendaa kakundinĩ katũmĩaa kĩthyomo kya Bulgarian matanamba kũthama Poland. Ala maĩ kakundinĩ kau nĩmamekĩie vinya na mamatetheesya kũmanya kĩthyomo kĩu. Kristian na Irmina maisye: “Nĩtwesie kũmanya kana yĩla tweeyumya tũtetheesye, Yeova Ngai nũtwĩanĩĩasya mavata maitũ, na ũsu nĩ ũndũ mũseo mũno. Yĩla wamwĩa Yeova ũũ kwa ngenda, ‘Ninyioo; ndũma nyie,’ ũu no ũtume wĩka maũndũ ũkwonaa matatonyeka.”—Isaia 6:8.

 Reto na mũka, Cornelia, kuma Switzerland, nĩmatwie kwĩkala mate kwĩyũmbĩĩa syĩndũ mbingĩ nĩ kana methĩwe meyũmbanĩtye na maisũvĩa mbesa. Maeleisye ũũ: “Mwaka ũmwe tũtanamba kũthama, nĩtwaendie Bulgaria vandũ va kyumwa kĩmwe nĩ kana tũmanye ethĩwa no tũvote kwĩkala kũu. Twĩ kũu nĩtwaneenie na amisonalĩ me na ũtũĩka na matũnenga ũtao mũseo.” Reto na Cornelia nĩmaatĩĩie ũtao ũla manengiwe na yu methĩĩtwe Bulgaria kwa myaka mbee wa 20.

 Ala mathamĩĩa nthĩ ingĩ nĩmethĩawa maĩle kũmanyĩa maũndũ meũ, na mayũmĩanĩsya na mawetu ala matonya kũkomana namo. (Meko ma Atũmwa 16:9, 10; 1 Akolintho 9:19-23) Thĩna ũmwe mũnene aingĩ makomanaa nawʼo nĩ kwĩmanyĩsya kĩthyomo kĩeni. Luca, ũla ũwetiwe mwambĩĩonĩ, aisye: “Twatwĩe tũtanĩaa kumya maelesyo tũtũmĩĩte ndeto sitũ ene twĩ maũmbanonĩ ma Kĩklĩsto. Ĩndĩ kwa kavinda, waĩ ũndũ wĩ vinya kwakwa na kĩveti kyakwa kũmbanyʼa maelesyo o makuvĩ tũtũmĩĩte kĩthyomo kya Bulgarian! Tweewʼaa ta tũtwʼĩkie syana ĩngĩ. Na kũneena ũwʼo, maelesyo ma syana ila tweethĩie meethĩawa me maseo vyũ kwĩ a maitũ.”

 Nake Ravil, kuma Germany, aisye: “Kwĩmanyĩsya kĩthyomo kĩu nĩkwanoasya. Ĩndĩ natindĩaa kwĩtavya, ‘Ndũkakĩe kũvĩtanyʼa, na yĩla wavĩtanyʼa ĩka kũtheka.’ Ndyonaa mawetu asu ta thĩna, ĩndĩ nĩmonaa ta kĩlungu kĩmwe kya ũthũkũmi wakwa mũtheu kwa Yeova.”

 Nake ũla Linda ũwetiwe mwambĩĩonĩ aisye: “Ndi kĩnengo kya kwĩmanyĩsya ithyomo nzaũ. Kwĩmanyĩsya kĩthyomo kya Bulgarian kũi laisi, o na mavinda maingĩ nĩnasũanĩaa kũeka kwĩmanyĩsya. Mwa wĩwʼaa ta wĩ weka yĩla ũtatonya kũneena na andũ kana ũte kũelewa kĩla mekwasya. Kwoou nĩ kana ngwatanĩo yakwa na Yeova ĩendeee kwĩthĩwa yĩ ndũmu, neemanyĩasya kĩla kĩndũ na kĩthyomo kya Swedish. Ĩtina, nĩnavotie kũmanya kĩthyomo kĩu nĩtetheewʼe nĩ ana-a-asa na eĩtu-a-asa makwa endwa.”

 Thĩna ũngĩ mũndũ ũtonya kũkomana nawʼo nĩ kwĩwʼa aikosa andũ make ma mũsyĩ. Ala mathamĩĩa nthĩ ĩngĩ nĩmatiaa andũ moo ma mũsyĩ na anyanya moo. Eva, ũla wathamĩĩie Bulgaria e na mũũme, Yannis, aisye: “Mbeenĩ, neewʼaa ta nĩ nyioka. Na kwoou nĩ kana nĩmanyĩe ũndũ ũsu, tũneenaa na anyanya na andũ maitũ ma mũsyĩ mavinda kwa mavinda, na nĩtũmanthĩte anyanya eũ kũũ.”

 Ve thĩna ũngĩ andũ matonya kũkomana nawʼo. Robert na Liana, ala mathamie Switzerland, maisye, “Kĩla tweewʼaa kĩ vinya vyũ nĩ kĩthyomo kya kũũ o vamwe na kĩthĩo kyoo, o na tũyeeyũmbanĩtye kwondũ wa mbevo mbingĩ ĩla yĩthĩawa kũũ.” Ĩndĩ kĩla kĩtetheetye mwana-a-asa ũsu na mũka kũtavanyʼa Bulgaria me aĩkĩĩku kwa ĩvinda ya myaka 14 yu nĩ kwĩthĩwa na woni ũla waĩle, na kũlea kũkĩa kũvĩtanyʼa.

 Lilly nĩwĩkĩĩte andũ vinya mathi makatetheesye kũla kwĩ na vata mũnene wa atavanyʼa. Aisye: “Nĩnĩyoneete Yeova aindetheesya kwa nzĩa o na ndaĩ nĩsa kũisũanĩa nĩ nthĩ yakwa. Nĩthĩawa ngwatene mũnango nditetheesya angĩ, na kĩu nĩkĩndetheesye kũmũthengeea Yeova, o na nĩkĩndanĩthasya na kĩkatuma nĩkala nĩ mwĩanĩe.” O na mũũme wake, Ravil, nĩwĩtĩkĩlanĩte na ũndũ ũsu. Aisye: “Ũũ nĩwʼo thayũ ũla mũseo vyũ, nũndũ nĩtũkwatĩte mwanya mũseo wa kũmanya Aklĩsto me kĩthito kuma nthĩ syĩ kĩvathũkanyʼo, ala methĩawa na ũtũĩka mwingĩ wa kũmanyĩsya ũwʼo ũla wĩ Mbivilianĩ. Nĩnĩmanyĩĩtye maũndũ maingĩ mũno kuma kwoo.”

 Nũndũ aingĩ nĩmeyumĩtye na ngenda, “ũvoo ũũ mũseo wa Ũsumbĩ [nũtavanĩtwʼe] nthĩ yonthe.” (Mathayo 24:14) Na nũndũ ala mathamĩĩe Bulgaria nĩmonanĩtye veva wa kwĩyumya, nĩmeyooneete ũndũ Yeova wĩanĩĩtye kwenda kwa ngoo syoo na akaĩlya mĩvango yoo.—Savuli 20:1-4.