Russia Nĩnavithũkĩie Ukraine

THAŨKA

Kwakya tene Matukũ 24, Mwei wa 2, 2022, ita sya Russia nĩsyambĩĩie kũvithũkĩa Ukraine, o na kau atongoi aingĩ ma nthĩ nĩmanatatĩte ũndũ matonya kaũ ũsu ndũkaumĩle. Wʼo kaũ ũsu ũtonya kũtuma maũndũ mekala ata ĩũlũ wa nthĩ? Mũandĩki mũnene wa Ngwatanĩo ya Nthĩ (UN) wĩtawa António Guterres anaisye ũũ mĩthenya mĩvũthũ mĩvĩtu: “O na tũyĩsa kũsũanĩa kũthĩna kũla andũ meũthĩna na wanangĩko ũla ũkwĩthĩwa vo wa syĩndũ, vamwe na ũnyivu wa mũuo ũla ũkwĩthwa Europe na kĩla vandũ ĩũlũ wa nthĩ.”

Mbivilia ĩwetete kyaũ ĩũlũ wa maũndũ ta asu?

Yesũ Klĩsto nĩwathanie ĩvinda “mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ.” (Mathayo 24:7) Soma kĩlungu kĩ na kyongo, “Ni Nini Ishara ya ‘Siku za Mwisho’?,” nĩ kenda wone ũndũ Mbivilia ĩeleetye kana makaũ meanĩasya wathani wa Yesũ.
Ĩvuku ya Ũvuanyʼo yĩelekanĩtye kaũ na mũndũ wĩkalĩte ĩũlũ mbalasi ya “langi mũtune mũno,” ũla wĩ na ũkũmũ wa “kũvetanga mũuo ĩũlũ wa nthĩ.” (Ũvuanyʼo 6:4) Soma kĩlungu kĩ na kyongo, “Ala Aũme Ana Makuĩtwe Nĩ Mbalasi Naaũ?,” nĩ kana wone ũndũ wathani ũsu ũkonanĩtye na makaũ ala methĩawa kwʼo ũmũnthĩ.
Ĩvuku ya Ndanieli nĩyathanie ĩũlũ wa ngusanĩsyo ikethĩwa katĩ wa “mũsumbĩ wa ngalĩ ya ĩũlũ” na “mũsumbĩ wa ngalĩ ya ĩtheo.” (Ndanieli 11:25-45) Ĩloele vitio yĩ na kyongo, Wathani Wĩanĩĩte—Ndanieli Kĩlungu 11, nĩ kana ũmanye nĩkĩ tũtonya kwasya kana Russia vamwe na nthĩ ila ingĩ syĩ ngwatanĩo nayo nĩyo mũsumbĩ wa ngalĩ ya ĩũlũ. a
O na ĩngĩ, ĩvuku ya Ũvuanyʼo nĩyĩneeneete “kaũ wa ũla mũthenya mũnene wa Ngai Mwene Vinya Wʼonthe.” (Ũvuanyʼo 16:14, 16) Ĩndĩ ũsu ti kaũ wa nthĩ syĩkũkitana, o ta ũla ũendeee oyu. Soma kĩlungu kĩ na kyongo, “Kaũ wa Alimaketoni Nĩ Kyaũ?,” nĩ kana ũkwate ũvoo mwingangĩ ĩũlũ wa kaũ ũsu ũkethĩwa ĩvinda yũkĩte.

Nĩkĩ ũtonya kwĩthĩwa na wĩkwatyo mũseo wa ĩvinda yũkĩte?

Mbivilia yaĩtye kana Ngai akatuma “makaũ mathela kũvika kĩtulu kya nthĩ.” (Savuli 46:9) Soma kĩlungu kĩ na kyongo, “Tumaini Bora la Wakati Ujao,” nĩ kana wĩmanyĩsye mũnango ĩũlũ wa maũndũ maseo ala Ngai ũtwathĩte.
Yesũ amanyĩisye aatĩĩi make kũvoyaa Ũsumbĩ wa Ngai wũke. (Mathayo 6:9, 10) Ũsumbĩ ũsu nĩ silikalĩ ya ĩtunĩ, ĩla ĩkeanĩsya kwenda kwa Ngai kũũ nthĩ, na ũndũ ũmwe ĩkeka nĩ kũete mũuo nthĩ yonthe. Nĩ kana ũmanye ũndũ ũtonya kũtetheka nĩ Ũsumbĩ ũsu, ĩloele vitio yĩ na kyongo, Ũsumbĩ wa Ngai Nĩ Kyaũ?

Ukraine kwĩ Ngũsĩ sya Yeova mbee wa 129,000. O ta Ngũsĩ ila syĩ nthĩ ila ingĩ, Ngũsĩ isu niatĩĩaa ngelekanyʼo ya Yesũ kwa kũema kũkwata mbau maũndũ ma siasa na kũema kwĩlikya kaũnĩ. (Yoana 18:36) Kĩla vandũ ĩũlũ wa nthĩ, Ngũsĩ sya Yeova iendeee kũtavanyʼa ‘ũvoo mũseo wa Ũsumbĩ.’ Ũvoo ũsu nĩ kana Ũsumbĩ ũsu nĩwʼo ũkaminĩa andũ mathĩna onthe, ta makaũ. (Mathayo 24:14) Nĩtũũkwĩkĩa vinya ũtũmanthe nĩ kana wĩmanyĩsye ũvoo mwingangĩ ĩũlũ wa wĩkwatyo ũla Mbivilia ĩtũnengete.

a Nĩ kana ũkwate ũvoo wʼonthe ĩũlũ wa wathani ũsu, soma ilungu ii: “‘Mũsumbĩ wa Ngalĩ ya Ĩũlũ’ Ĩvindanĩ Yĩĩ ya Mũminũkĩlyo” na “Ũmũnthĩ ‘Mũsumbĩ wa Ngalĩ ya Ĩũlũ’ Nũũ?”