KYONGO KYA ĨTHANGŨ YA MBEE | ŨNDŨ ŨTONYA KWĨKA ĨLA MŨNDŨ WENDETE WAKW’A
Nĩ Ũthũku Kwĩthĩwa na Kyeva?
Ve ĩvinda waaĩthĩwa wĩ mũwau o na ethĩwa no kwa kavinda o kanini? No kwĩthĩwa wavoie mĩtũkĩ ũkethĩa o na nĩwoolilwe nĩ kĩla kyaendeeie. Ĩndĩ kyeva nĩkĩtonya kũkua ĩvinda yĩasa kĩithela. Nthĩnĩ wa ĩvuku yĩtawa Healing a Spouse’s Grieving Heart, Dr. Alan Wolfelt aisye, “Ti ũndũ ũtonyeka ‘kũeka’ kwĩthĩwa na kyeva.” Ĩndĩ aendeee kwasya: “Ĩtina wa ĩvinda yĩana ũndũ mũna, na andũ maũtetheesya, kyeva no kĩoleke.”
Kwa ngelekany’o, sũanĩa ĩũlũ wa ũndũ Avalaamu weekie ĩla mũka wakwie. Kwosana na Maandĩko ma Kĩevelania ala maandĩkĩtwe mbeenĩ, “Avalaamu nĩwambĩĩie kũmũmetea Sala, na kũmũĩĩa.” Ndeto “nĩwambĩĩie” yĩonany’a kana Avalaamu nĩwakuie ĩvinda e na kyeva nũndũ wa kũkw’ĩĩwa nĩ mũka wake Sala. * Ngelekany’o ĩngĩ nĩ ya Yakovo, ũla wakengiwe nginya aĩkĩĩa kana mwana wake, Yosevu, nĩwooaĩtwe nĩ nyamũ mbai. Aĩ na kyeva “matukũ maingĩ,” na andũ ma mũsyĩ wake maemwa nĩ kũmũkiakisya. Ĩtina wa myaka mingĩ, Yakovo nĩwaendeeie kũthĩnĩka nũndũ wa kĩkw’ũ kya Yosevu.—Mwambĩlĩlyo 23:2; 37:34, 35; 42:36; 45:28.
Avalaamu aiĩa ĩtina wa kũkw’ĩĩwa nĩ mũka wake, Sala
O na ũmũnthĩ kwĩthĩawa kũilyĩ oou kwa andũ aingĩ ala methĩawa na kyeva nũndũ wa kũkw’ĩĩwa nĩ andũ manamendete. Kwasũanĩa ngelekany’o ii ilĩ.
-
“Mũemewa, Robert, akwie Matukũ 9, Mwei wa 7, 2008. Mũthenya ũla wakwatiwe nĩ mũisyo wa lelũnĩ wailyĩ o ta mĩthenya ĩla ĩngĩ. O tondũ tweekaa kĩla mũthenya atanamba kũthi wĩanĩ, nĩtwaĩe lĩu wa kwakya, angũna kisi, angumbatĩa, na ambĩa, ‘Nĩngwendete.’ O na kau nĩvavĩtĩte myaka thanthatũ, nĩw’aa nĩona kyeva. Ndikwona ta ngaeka kwĩthĩwa na kyeva nũndũ wa Rob.”—Gail, ũla wĩ na myaka 60.
-
“O na kau nĩ na myaka mbee wa 18 kuma nakw’ĩĩwa nĩ kĩveti kyakwa, no nĩkĩlilikanaa na nĩw’aa nĩ na kyeva. Ĩla noona kĩndũ kyanake, nĩnĩmũlilikanaa na ndyasya kethĩwa eĩ vaa ethĩwa atanĩa kĩndũ kĩu noona.”—Etienne, ũla wĩ myaka 84.
Kwoou o tondũ twoona, ti ũthũku kwĩthĩwa na kyeva na woo ĩla wakw’ĩĩwa. Andũ monanasya kyeva kwa nzĩa syĩ kĩvathũkany’o, na kwoou ti ũseo kũsilĩla andũ na kũtw’a kana maĩle kwĩthĩawa na kyeva ũndũ ũmwe ĩla makw’ĩĩwa. Ĩndĩ o na ũu wĩ o vo, tũyaĩle kwĩtũla mũtĩ ethĩwa twĩona twĩ na kyeva mũno ĩtina wa kũkw’ĩĩwa. Tũtonya ata kũmĩanĩsya na kyeva?
^ kal. 4 O nake Isaka, mwana wa Avalaamu, aĩ na kyeva kwa ĩvinda ĩasa. O tondũ vonanĩtw’e ĩkasetinĩ yĩĩ nthĩnĩ wa kĩlungu kĩla kĩ na kyongo “Ĩthĩwa na Mũĩkĩĩo ta Woo,” Isaka aĩ na kyeva o na ĩtina wa myaka ĩtatũ kuma inyia wake Sala akw’a.—Mwambĩlĩlyo 24:67.
No Wendeewʼe Nĩ Ii
MŨSYAĨĨSYA
Ũndũ Ũtonya Kwĩka Ĩla Weethĩwa na Kyeva
Mbivilia yĩ na maũndũ matonya kũtetheesya ĩũlũ wa ũndũ ũsu.
AMKENI!
Kĩla Kĩtonya Kumĩla Yĩla Mũndũ wĩ na Kyeva
Nĩ mathĩna amwe meva matonya kũkwatwa mũndũ yĩla wakw’ĩĩwa nĩ mũndũ wendete?
