Ethĩwa Ngai tiwe ũtumaa andũ mathĩna, nũũ ũtumaa kwĩthĩwa na mayũa mate kũthela, ũkya mwingĩ, makaũ, mowau mathũku, na mĩisyo? Ndeto ya Ngai, Mbivilia, nĩyĩeleasya maũndũ atatũ ala matumaa andũ mathĩna:

1. Kwĩyenda, Ĩtomo, na Kĩmena. “Kwĩ ĩvinda yĩla mũndũ ũmwe wĩ na vinya ĩũlũ wa ũngĩ na akĩyĩka ũthũku.” (Mũtavanʼya 8:9) Mavinda maingĩ, andũ nĩmathĩnaa nũndũ wa kwĩthĩwa me ungu wa andũ me na naĩ, meyendete, na angʼendu.

2. Ĩvinda na Ũndũ Ũtataĩĩwe. Mavinda maingĩ andũ nĩmathĩnaa nũndũ “ĩvinda na ĩvuso [kana, ũndũ ũtataĩĩwe] nĩsyĩkĩkaa kwa onthe.” (Mũtavanʼya 9:11) Ũu nĩ kwasya kana andũ no makwatwe nĩ mathĩna nũndũ wa kwĩthĩwa vandũ vataĩle ĩvinda yĩtaĩle, mĩisyo nĩyĩthĩawa, na andũ no meke maũndũ mateũmaka.

3. Mũsumbĩki Mũthũku wa Nthĩ Ĩno. Mbivilia nĩyĩeleasya nesa kĩtumi kĩnene kya andũ kũthĩna. Yaasya atĩĩ: “Nthĩ yonthe ĩtwĩe nthĩnĩ wa ũla mũthũku.” (1 Yoana 5:19) “Ũla mũthũku” nĩ Satani kana Ndevili, ũla nĩ kyũmbe kya veva kĩ vinya. Mwambĩĩonĩ Satani aĩ mũlaĩka wa Ngai, ĩndĩ “ndaaĩkala nthĩnĩ wa wʼo.” (Yoana 8:44) Alaĩka angĩ nĩmeekwatanisye na Satani na maleana na Ũsumbĩki wa Ngai nĩ kana meanĩsye mawendi moo, na kwoou matwʼĩka ndaimoni. (Mwambĩlĩlyo 6:1-5) Kuma ĩvinda yĩu, Satani na ndaimoni syake nĩmatumĩte ĩũlũ wa nthĩ kwĩthĩwa na ũngʼendu mwingĩ mũno, na mũno mũno ĩvindanĩ yĩĩ. Ndevili e na ũthilĩku mũnene na nĩ ũendeee ‘kũkenga nthĩ yonthe,’ na ũu nũtumĩte ‘nthĩ yĩthĩwa na woo.’ (Ũvuanʼyo 12:9, 12) Kwa wʼo Satani nĩ mũsumbĩki ũte tei. Ewʼaa mũyo mũno yĩla andũ meũthĩna. Kwoou, Satani nĩwe ũtumaa andũ mathĩna na ti Ngai.

KWASŨANĨA ŨNDŨ ŨŨ: Mũndũ ũte tei, na wĩkaa maũndũ mathũku mũno nowe ũtonya kũtuma andũ aseo mathĩna. Kĩvathũkanyʼo na mũndũ ũsu, Mbivilia yaasya kana “Ngai nĩ wendo.” (1 Yoana 4:8) Kwoou nũndũ Ngai e wendo, Mbivilia yaĩtye, “nĩkwĩthĩwe kũasa na Ngai, atĩ eke ũthũku, na kũasa na Mwene Vinya Wʼonthe, atĩ eke naĩ.”—Yovu 34:10.

Ĩndĩ no wĩkũlye-ĩ, ‘Ngai Mwene Vinya Wʼonthe eendeea kũmwĩtĩkĩlya Satani aendeee kũsumbĩka kwa nzĩa nthũku nginya ĩndĩĩ?’ O tondũ twoona, Ngai nũmenete vyũ ũthũku, na nĩũũmĩaa mũno oona tũithĩna. Nĩkyo kĩtumi Ndeto yake ĩtwĩkĩaa vinya kwa kũtũtavya atĩĩ: ‘Mwiĩei kwĩmakĩa kwenyu kwʼonthe, nũndũ nĩwe ũmũsũvĩaa.’ (1 Vetelo 5:7) Ngai nũtwendete na e na ũtonyi wa kũvetanga mathĩna onthe na ũsili ũte wa katĩ, o tondũ kĩlungu kĩla kĩatĩĩe kĩkũelesya. a