Wathani wa 6. Wĩa wa Kũtavany’a Nthĩ Yonthe
Wathani wa 6. Wĩa wa Kũtavany’a Nthĩ Yonthe
“Ũvoo ũũ mũseo wa Ũsumbĩ ũkatavanw’a nthĩ yonthe.”—MATHAYO 24:14.
● Vaiatea ekalaa kĩthamanĩ kĩ vaasa ũkanganĩ wa Pacific kĩsionĩ kĩtawa Tuamotu Archipelago. O na kau kĩsio kya Tuamotu kĩ na ithama vakuvĩ 80 inyaĩĩkĩte kĩsionĩ kĩnene kĩtonya kĩtalĩthaw’a ta kĩ na ũthanthau na ũasa wa maili mbee wa 310,000 (802,900 km2), kĩkalaa o andũ ta 16,000. O na kau mekalaa kũndũ kũasavĩte ũu, Vaiatea na atũi make nĩmathokeiwe nĩ Ngũsĩ sya Yeova. Nĩkĩ? Nũndũ Ngũsĩ nĩsyendaa mũno kũtavya andũ onthe ũvoo mũseo ĩũlũ wa Ũsumbĩ wa Ngai, o na ethĩwa mekalaa va.
MAŨNDŨ ALA MEKĨKĨTE MEONANY’A ATA? Ũvoo mũseo wa Ũsumbĩ ũendeee kũtavanw’a kĩla vandũ ĩũlũ wa nthĩ. Mwakanĩ wa 2010 wĩ w’oka, Ngũsĩ sya Yeova nĩsyatavanisye masaa mbilioni 1.6 nthĩnĩ wa nthĩ 236. Ũu nĩ ũndũ ũmwe na kwasya kana Ngũsĩ ĩmwe yatavanasya ndatĩka 30 kĩla mũthenya. Myakanĩ ĩkũmi mĩvĩtu, nĩmaumĩthĩtye na makanyaĩĩkya syĩndũ sya kũmanyĩsya Mbivilia mbee wa mbilioni 20.
ALA MAVĨNGAA MAKOTHAA KWASYA ATA? Ũvoo ũla wĩ Mbivilianĩ wĩthĩĩtwe ũitavanw’a kwa myaka ngili mbingĩ.
WONI ŨSU NĨ WA W’O? Nĩw’o kana andũ aingĩ nĩmethĩĩtwe maitavany’a ũvoo mũna ĩũlũ wa Mbivilia. Ĩndĩ aingĩ matavanisye o kwa kavinda kakuvĩ na kĩsionĩ o kĩnini. Ĩndĩ kĩvathũkany’o namo, Ngũsĩ sya Yeova nivangĩtwe nesa ũkethĩa no mavikĩsye ũvoo mũseo andũ milioni maana maingĩ nthĩ yonthe. Ngũsĩ sya Yeova niendeee kũtavany’a o na kau nĩsyĩthĩĩtwe iivĩngwa mũno kwa ĩvinda yĩasa nĩ ikundi sya andũ syĩ vinya mwingĩ na ite tei. * (Maliko 13:13) O na ĩngĩ, Ngũsĩ sya Yeova iyĩĩvawa nĩ kana itavany’e. Vandũ va ũu, nĩmeyumasya na ngenda kũtavany’a na maithooasya mavuku moo. Na wĩa woo wa kũtavany’a ũũngamĩawa nĩ mĩvothi ĩla andũ maumasya na ngoo ya kwenda.
WE WĨONA ATA? W’o ‘ũvoo mũseo wa ũsumbĩ’ nũendeee kũtavanw’a nthĩ yonthe? Nĩvatonyeka kwĩanĩa kwa wathani ũũ kũkethĩwa kũyonany’a kana ve maũndũ maseo me mbee witũ?
[Maelesyo ma Kwongeleela]
^ kal. 6 Nĩ kana ũkwate ũvoo mwingangĩ, ĩloele vitio ii itatũ: “Faithful Under Trials,” “Purple Triangles,” na “Jehovah’s Witnesses Stand Firm Against Nazi Assault,” ila syumĩthĩtw’e nĩ Ngũsĩ sya Yeova.
[Maelesyo Makuvĩ]
“Ethĩwa Yeova nũkũendeea kũtwĩtĩkĩlya, twĩendeea kũtavany’a ũvoo mũseo wa Ũsumbĩ na kĩthito, tũitũmĩa nzĩa syonthe ila tũtonya nĩ kana tũvikĩe andũ.”—KITABU CHA MWAKA CHA MASHAHIDI WA YEHOVA CHA 2010.